Read urhobo Iruo rẹ Iyinkọn na 18 Bible Online

Iruo rẹ Iyinkọn na 18 - urhobo bible

Iruo rẹ Iyinkọn na 18

¹Rẹ ọnana vwọ wan nu o de nẹ Atẹns kpo Kọrẹnt.

²Ọ da mrẹ ohwo ri Ju ọvo re se Akuila, ohwo ri Pọntus, ro ghwe nẹ Itali rhe vwobọ ọ vẹ aye rọye re se Prisila, fikiridie Kladiọs djẹ ihwo ri Ju ejobi nẹ Rom. Ọ da yanran ra mrẹ ayen;

³rẹ ayen ejobi vwọ chua oghẹre rẹ eki ọvo na ọ vẹ ayen ke dia, ayen ki ru iruo, kidie ibọkpọ ayen rhuo.

⁴Ọ vẹ ayen ke phra aphro vwi Sinagọg kẹdidjala kẹdidjala, o de dje mu ihwo ri Ju vi ihwo ri Grik.

⁵Ọke ri Sailas kugbe Timoti vwọ nẹ Masidonia rhe, yi Pọl ghwe gboma phihọ eghwoghwo rẹ ota na, ro se oseri muẹ ihwo ri Ju na nẹ Kristi na hẹ Jesu.

⁶Ọke rẹ ayen vwọ phra vwo djekan, o de tuetue iwun rọye ọ da ta kẹ ayen, Ọbara rẹ ovwan dia iyovwi rẹ ovwan! Abọ mẹ fonro. Kẹ ọke na yanran ki mi bru ihwo ri Keferi ra.

⁷O de vrẹn nẹ etiyin o de kpo uwevwi rẹ ọshare ọvo re se Taitos Jọstọs, ọgọ Ọghẹnẹ; uwevwi rọye ghwa kẹrẹ Sinagọg na.

⁸Krispọs, osun ri sinagọg na, de se Ọrovwohwo gbuyota, ọ vẹ evwruwevwi rọye ejobi; ihwo ri Kọrẹnt na buebu ri nyo Pọl de segbuyota ayen da reyọ ame.

⁹Vwẹ ason ọvo Ọrovwohwo da ta kẹ Pọl vwẹ emramrẹ, Wọ djẹ oshọ-ọ, ẹkẹvuọvo ta ota na wo rhurhu unu-u;

¹⁰kidie me vẹ owẹ herọ, ohwo che se mu we rọ da wan wẹ oma-a; kidie mi vwo ihwo buebu vwẹ orere nana.

¹¹Ọ da dia ẹgbukpe gbẹ emeranvwe esan, ro yono ota rẹ Ọghẹnẹ vwẹ ohri rẹ ayen.

¹²Ẹkẹvuọvo ọke ri Galio vwọ hẹ osun rẹ Akaya, ihwo ri Ju na de kuoma gbe vwọ so Pọl ayen de muo vwọ rhe ẹguare,

¹³tanẹ, ohwo nana gba ihwo phihọ ne a gọ Ọghẹnẹ yo fori kẹ urhi rẹ avwanre-e.

¹⁴Ẹkẹvuọvo ri Pọl ghwe che vwo rhiẹ unu rọye, Galio da ta kẹ ihwo ri Ju, Ọ da dianẹ kẹ eta rẹ oruchọ eyẹ kẹ urhi ẹchọ ọbrabra, ke me mrẹ obo ri mi vwo chirako rẹ ovwan, E ihwo ri Ju;

¹⁵ẹkẹvuọvo ọ da dia oma rẹ enanọ kpahe eta kugbe edẹ kugbe urhi rẹ ovwan, ovwan ọvo nenesi rọye; me senre me sa dia oguẹdjọ rẹ imu nana-a.

¹⁶Ọ da djẹ ayen nẹ ẹguare na.

¹⁷Ayen ejobi de shabọ phihọ Sọstẹnis, osun ri Sinagọg na, ayen de hwẹ vwẹ obaro rẹ ẹguare na. Ẹkẹvuọvo Galio davwerhọn rẹ ọnana-a.

¹⁸Rẹ ọnana vwọ wan nu Pọl da je rhoma dia ẹdẹ buebu, o ji imoni na vwo o de bi kpo Siria, ọ vẹ Prisila kugbe Akuila. Vwi Sẹnkria o de bru ẹto rọye, kidie o ve ive.

¹⁹Ayen de rhi te Ẹfesọs, o de ji ayen vwo vwẹ etiyin; ẹkẹvuọvo ekpuyovwi rọye da yanran kpo sinagọg ọ vẹ ihwo ri Ju ke phra aphro.

²⁰Ọke rẹ ayen vwọ ta kẹ nẹ ọ vẹ ayen dia etiyin krekri, ọ da sen;

²¹ẹkẹvuọvo rọ vwọ yan jẹ ayen vwo ọ da ta, Ọghẹnẹ da rhọvwe mi ji che rhivwi bru ovwan rhe, o de bi kpo Ẹfesọs.

²²Ọke ro vwo duvwu Sizaria, o de wotọ re yere ishọshi na, tavwe ro ki kpo Antiọk.

²³Rọ vwọ dia etiyin emerha o de vrẹn nẹ etiyin ko nẹ asan kpasan vwẹ ubrakpọ ri Galesha kugbe Frigia, ro vwo ruẹ idibo na gan.

²⁴Asakiephana ohwo ri Ju ọvo re se Apolọs, ohwo rẹ Alezandria, da rhe Ẹfesọs ọgbota, rọ riẹn ọbe ọfuanfon na gangan.

²⁵E yoniro phihọ idjerhe rẹ Ọrovwohwo na; rẹ oruru rẹ erhi na vwo muo, ọ da ta ota o de yono emu gbagba kpahe Jesu, dede na yẹ amẹ-ẹreyọ ri Jọn o vwori.

²⁶Kọ ta ota vẹ aroeyivwo vwẹ evun ri sinagọg; ẹkẹvuọvo ọke ri Prisila kugbe Akuila vwo nyo, ayen da reyọ ayen de rhie idjerhe rẹ Ọghẹnẹ na kẹ gbagba.

²⁷Ọke rọ cha vwọ samu kpo Akaya imoni na de bro uche, ayen de si ọbe rhe idibo na nẹ ayen reyọ. Ọke ro vwo te oboyi, ọ da chọ ayen otu rẹ wan oma rẹ ẹserọphẹ segbuyota uko gangan.

²⁸Kidie ọ da vwẹ ogangan rẹ aphro rọye geri ihwo ri Ju na she vwẹ azagba, ro vwo dje nẹ ọbe ọfuanfon na rhe nẹ Kristi na hẹ Jesu.