Read urhobo Iruo rẹ Iyinkọn na 19 Bible Online

Iruo rẹ Iyinkọn na 19 - urhobo bible

Iruo rẹ Iyinkọn na 19

¹Ọke rẹ Apolọs vwọ hẹ Kọrẹnt, Pọl da wan idjerhe rẹ otọ kpo Ẹfesọs. Etiyin ọ da mrẹ idibo evo.

²Ọ da nọ ayen, Ovwan vwo Erhi Ọfuanfon na rẹ ovwan vwo segbuyota na re? Ayen da kpahe, Ẹjo, avwanre tobọ nyo sẹ Erhi Ọfuanfon herọ-ọ.

³Ọ da ta, Kẹ odẹ rẹ ono a vwọ vwẹ ame kẹ ovwan? Ayen da ta, Odẹ ri Jọn.

⁴Pọl da ta, Jọn ghine vwẹ ame rẹ ekuorhẹriẹ kẹ ovwan, yọ ta kẹ ihwo na we se ọ rọ cha vwẹ obuko mẹ na gbuyota, ọye hẹ, Jesu.

⁵Rẹ ayen vwo nyo ọnana, ayen da ghwa reyọ ame vwẹ odẹ rẹ Ọrovwohwo Jesu.

⁶Ri Pọl vwọ ghwẹ obọ kpahe ayen uyovwi nu, Erhi Ọfuanfon na da ro ayen oma; ayen da jẹ ephẹrẹ je mraro.

⁷Unu rayen da dia ihwive.

⁸Ọ da ro sinagọg ọ da gbaudu ta ota kẹ ayen emeranvwe erha, ọ phra o dje kpahe uvie rẹ Ọghẹnẹ na.

⁹Ẹkẹvuọvo rẹ evo vwo vwo udu ri rhe segbuyota-a, re ta eta ebrabra kpahe Idjerhe na vwẹ irharo rẹ ukoko na, o de si oma reyọ vẹ idibo na, ayen da phro aphro vwẹ ọguan ri Tiranọs.

¹⁰Ayen de ru ọnana ikpe ivẹ soso, ọtiọye na otu rẹ dia Esha ejobi de nyo eta rẹ Ọrovwohwo, tẹ ihwo ri Ju vẹ Grik.

¹¹Ọghẹnẹ da wan obọ ri Pọl ru iruo rẹ igbunu ride gangan,

¹²ọtiọye na emekpan vẹ ebẹre emwa rọye re vwo rhe ihwo re mwaọga, emiavwe de nẹ ayen oma erhi rẹ idẹbono da djẹ nẹ ayen oma.

¹³Etiyin ihwo ri Ju evo herọ re yan cha yan kpo dje erhi rẹ idẹbono nẹ ihwo oma, ke je vwẹ odẹ rẹ Ọrovwohwo Jesu djẹ idẹbono, tanẹ, me la wẹ vwẹ odẹ ri Jesu ri Pọl ghwoghwo na.

¹⁴Emọ ighwrẹ rẹ orherẹn rode rẹ ihwo ri Ju re se Siva kẹ eye ri ruẹ ọnana.

¹⁵Ẹkẹvuọvo erhi rẹ idẹbono na da kpahe kẹ ayen, Jesu me riẹnrẹ, Pọl me riẹnrẹ, ẹkẹvuovo wẹ ono?

¹⁶Ohwo ro vwo erhi rẹ idẹbono na de pho mu ayen, mu ayen she teye otọ, o de she rhurhu ayen, ayen da pharhe djẹ ro otafe ẹbẹban, e wan oma.

¹⁷Ihwo re dia Ẹfesọs ejobi da rhe riẹn ọnana, tẹ Ju te Grik; oshọ de rhi mu ayen ejobi; a da kpare odẹ rẹ Ọrovwohwo Jesu kpenu.

¹⁸Buebu vwẹ otu rẹ ayen na ri segbuyota nure da rhe, rhe fan oma je vwẹ obo rẹ ayen ru djahe ejobi vwọ phia.

¹⁹Buebu ri ruẹ egbẹlẹkẹ da ghwẹ ẹbe rayen koko a da torhẹ ayen vwẹ irharo rẹ ihwo ejobi; re vwo kere igho ra dẹ ẹbe na i bu te ikpahọ uriori ujuvẹ gbẹ ihwe.

²⁰Ọriọye na ota rẹ Ọrovwohwo da rhe rho phihọ.

²¹Rẹ enana vwo ru nu Pọl de roro vwẹ Erhi nẹ ọ ọye ra wan Masidonia kugbe Akaya vrẹn kpo Jerusalẹm, tanẹ, Mi de te oboyi nu, ki mi ji te Rom rhe.

²²Ro vwo ji ichuko rọye ivẹ kpo Masidonia, Timoti kugbe Erastọs, okpuyovwi rọye da daji Esha emerha.

²³Vwẹ oma rẹ ọke yena edo ko rhi mu vwẹ fikirẹ rẹ Idjerhe rẹ Ọrovwohwo na.

²⁴Kidie ọshare ọvo re se Demitris, odjogu, ro duvwẹ ẹshẹ rẹ idọnọ efuanfon kẹ ẹdjọ Atẹmis, ọ da rhe vwẹ okpoeki kẹ ewena na.

²⁵O de se ayen koko, vẹ ewena ri ruẹ oghẹre rẹ iruo ọvo na, ọ da ta, Ihwo, ovwan riẹnre nẹ efe rẹ avwanre vwenẹ iruo nana o nurhe.

²⁶Ovwan mrẹre ovwan ji nyo nẹ ọ dia Ẹfesọs ọvo-o ẹkẹvuọvo degbenẹ ubrotọ rẹ Esha na ejobi ọye Pọl nana da djẹ ihwo buebu, tanẹ, ẹdjọ rẹ a vwẹ obọ duvwu dia Ọghẹnẹ-ẹ.

²⁷Ọna okpetu rode ọ dianẹ eki rẹ avwanre na ọvo ri che she-e ẹkẹvuọvo uwevwi rẹ ẹga rẹ ẹdjọ rode na Atẹmis na ji che she rhe, erhuvwu rọye kọ cha ghwọrọ, ẹdjọ rẹ Esha kugbe akpọ na ejobi ga.

²⁸Ọke rẹ ayen vwo nyo ọnana ophu de mu ayen, ayen de kperi, Atẹmis hẹ ẹdjọ rode rẹ ihwo rẹ Ẹfesọs!

²⁹Ozighi de she vwẹ evun rẹ orere na; ayen da họrhọ kpo obo ọguan, re kpono Gayọs kugbe Aristakọs, ihwo ri Masidonia re vẹ Pọl gba yan oyan na.

³⁰Pọl da guọnọ ra ro ohri rẹ ozighi na, ẹkẹvuọvo idibo na da sen kẹ;

³¹Inotu rẹ ihwo rẹ Esha na evo, re dia igbeyan rọye, de ji ohwo bro ra ra rẹ nẹ ọ lagha oma siẹ kẹrẹ ọguan na-a.

³²Vwẹ ọke yena yẹ ihwo na re do evo kperẹ kpo obonẹ, efa kperẹ kpo oboyi; kidie ọghwẹgbe na de rhi zighi ku, buebu riẹn obo rẹ ayen rhi vwo si koko-o.

³³Ọghwẹgbe na de bi Alẹkzanda họ, kọye ihwo ri Ju vwọ ka obaro. Alẹkzanda ko kpogho obọ rọ vwọ guọnọ ta ota kẹ ihwo na.

³⁴Ẹkẹvuọvo rẹ ayen rhe vwọ mrẹ vughe nẹ ohwo ri Ju o ruẹ, edo na da rhoma ga phihọ kerẹ oma rẹ unọke ivẹ vwẹ unu ọvo ta nẹ, Atẹmis hẹ ẹdjọ rode rẹ ihwo rẹ Ẹfesọs!

³⁵Rẹ osiọbe rẹ orere na vwo fue edo na nu, ọ da ta, Ihwo rẹ Ẹfesọs, didi ohwo vwẹ orere rẹ Ẹfesọs na ri jẹ riẹn nẹ etinẹ na hẹ esiri rẹ Atẹmis ẹdjọ rode na, kugbe oragha ọfuanfon ro she nẹ enu rhe?

³⁶Rẹ ovwan vwọ riẹn nẹ ọnana dia obo ra sa phro-o na, mane ku we fotovwi we rhe mu ru zighi zighi-i.

³⁷Kidie we di mu ihwo nana rhe ọ dianẹ ki gbe ẹgua-a eyẹ ke ta ota rẹ ophọphọvwe kpahe ẹdjọ-ọ rẹ avwanre na-a.

³⁸Ọ da dianẹ Dẹmitris kugbe otu rẹ ewena rọye vẹ ohwo ọvo vwo ota, ẹguare rhie phihọ, iguẹdjọ je herọ; e jẹn ayen ohwohwo si ọbe vwo mu ohwo.

³⁹Ẹkẹvuọvo ovwan da rha guọnọ emu ọfa a sa ta vwẹ ọguan rẹ ediọn.

⁴⁰Kidie oshọ mu avwanre hwẹ nẹ e che si ọbe se avwanre fiki rẹ ozighi re gberi nonẹ na, o vwo obo rẹ avwanre se dje nẹ ọ ghwa ekuvwie nana rhe-e.

⁴¹Rọ vwọ ta ọnana nu ọ da hra ọghwẹgbe na.