Read urhobo Iruo rẹ Iyinkọn na 2 Bible Online

Iruo rẹ Iyinkọn na 2 - urhobo bible

Iruo rẹ Iyinkọn na 2

¹Rẹ ẹdẹ ri Pẹntikọst na vwo te, ayen ejobi de koko asan ọvo.

²Kpregede na edo ọvo de do nẹ obo odjuvwu rhe kerẹ ogirobo ọ da rhe vọn uwevwi na ejobi rẹ ayen tidia na.

³Ọ da phia kẹ ayen kerẹsiẹ ra mrẹ imwerhanre sansan, o de she mu uyovwi rẹ ayen ọvuọvo.

⁴Erhi Ọfuanfon na da ro ayen oma kẹ ayen jẹ ephẹrẹ efa, kirobo rẹ Erhi na mu ayen vwọ ta.

⁵Ọke yena ihwo ri Ju re dia Jerusalẹm, ẹyọnrọn irhi ri nẹ ẹgborho kẹgborho rẹ akpọ na rhe.

⁶Fiki rẹ edo nana urogho na ejobi de rhi bi koko, o de gbe ayen unu, fikiridie ayen ohwo ọvuọvo nyo eta rẹ ayen ta vwẹ ephẹrẹ re de vwiẹ ayen.

⁷Oshọ de mu ayen o de ji gbe ayen unu, ta nẹ, Enana ejobi re ta eta na dia ihwo ri Galili?

⁸Kemavọ ayen ghwa vwọ jẹ ephẹrẹ re de vwiẹ avwanre?

⁹Ihwo ri Patia kugbe Mid kugbe Elam kugbe ihwo re dia Mẹsopotemia, Judia kugbe Kapadosha, Pọntus kugbe Esha.

¹⁰Frigia kugbe Pamfilia, Ijipt kugbe ubrotọ ri Libia re hẹ Saeren, kugbe erhorha ri nẹ Rom rhe, ihwo rẹ Ju kugbe i ri kurhẹriẹ.

¹¹Ihwo ri Krit kugbe Arebia, avwanre de nyo rẹ ayen vwọ jẹ ephẹrẹ rẹ avwanre vwo gbe ikun rẹ iruo egangan rẹ Ọghẹnẹ.

¹²Udidi de mu ayen o de gbe ayen unu, ayen ke ta kẹ ohwohwo nẹ otọ rẹ emu nana rhọ?

¹³Ẹkẹvuọvo otuẹvo ke vwẹ ayen jehwẹ nẹ, udi ọkpokpọ ri mu ayen.

¹⁴Ẹkẹvuọvo Pita, vẹ uhwọvo na vwo mudia, ọ da ta kẹ ayen nẹ, ihwo ri Judia kugbe ihwo re dia Jerusalẹm ejobi, wa gba riẹn ọnana, rere ovwan kerhọn rẹ eta mẹ.

¹⁵Ihwo nana da udi-i, kirobo rẹ ovwan roro na ọnana irhioke vwobọ;

¹⁶ẹkẹvuọvo ọnana ota ri Joẹl rẹ ọmraro na tare.

¹⁷Ọghẹnẹ tare nẹ, oba rẹ ọke na de rhi tere ki mi ku Erhi mẹ na phihọ oma rẹ ihwo ejobi, emeshare vẹ emetẹ rẹ ovwan ke cha mraro, imighene rẹ ovwan ke cha mrorẹ, ekpako re ovwan ke cha vwerhẹ evwerhẹ

¹⁸uyota, ki mi ku Erhi mẹ phihọ oma rẹ idibo mẹ rẹ eshare vẹ idibo me rẹ emetẹ vwẹ ọke yena; kẹ ayen cha mraro.

¹⁹Ke me cha vwẹ igbunu phia vwẹ obo odjuvwu eka buebu ke cha phia vwẹ akpọ na, ọbara, kugbe erhanre, kugbe ighworighwo rẹ ivwirhi;

²⁰ọnre na ko che mu ebri emeranvwe na ko che hirhe phihọ ọbara, kẹsiẹye ẹdẹ rẹ Ọrovwohwo na ki rhi te, ẹdẹ rode na kọ vwẹ oma phia.

²¹O de ru nure kohwo kohwo ro se odẹ rẹ Ọrovwohwo na kọ cha rhọ.

²²Ihwo rẹ Izrẹl, Ovwan nyo eta nana: Jesu ri Nazarẹt, ohwo rẹ Ọghẹnẹ rhọvwe kẹ ro ji mu ovwan ẹro vwẹ iruo ride vẹ igbunu rẹ eka buebu ro ruru vwẹ ohri rẹ ovwan kirobo rẹ ekpuyovwi rẹ ovwan riẹnre.

²³Jesu nana, ọye a vwọ kẹ ihwo re riẹn urhi-i re kanrọ mu agbagba hwe, kerẹ iroro rẹ Ọghẹnẹ jẹ kpahọ vẹrhe.

²⁴Ẹkẹvuọvo Ọghẹnẹ kpaerọ vrẹn, a rhanrọ nẹ obi rẹ ughwu, fikiridie ughwu sa daji-i.

²⁵Fikiridie Devid mraro rọye, Me mrẹ Ọrovwohwo na vwẹ obaro mẹ vwẹ ọke ejobi, udu bru vwe-e kidie ọ hẹ obọrhe mẹ;

²⁶eriyin na oma da vwerhe udu mẹ, ẹrẹnvwe mẹ da ghọghọ; ugboma mẹ kọ dia vwẹ evun rẹ iphiẹrohọ.

²⁷Fikiridie wọ cha yan jẹn erhi mẹ vwo vwẹ evun rẹ ushi-i, eyẹ wo che se siobo nẹ Ọvuọvo Ọfuanfon wẹn na nẹ o gbo-o.

²⁸Wo ru uvwe vwọ riẹn idjerhe rẹ arhọ na nure; vwẹ aro wẹ wo de che ru uvwe vọn vẹ omavwerhovwẹ.

²⁹Imoni, ju vwe ta kẹ ovwan phephẹ nẹ Devid osẹ rẹ avwanre rode ji ghwu ede ji sho, ushi rọye je herọ te ọke nana.

³⁰Ọmraro o ruẹ, ọ riẹnre nẹ. Ọghẹnẹ ji vẹ kẹ nẹ vwẹ uvwiẹ rọye na a da cha reyọ ohwo ọvo vwo tidia ekete rọye na.

³¹Ọ da mraro ta ota kpahe evrẹnushi ri Kristi na, nẹ a yan jovwo vwẹ ushi-i, eyẹrẹ ugboma rọye gbori-i.

³²Jesu nana ọye Ọghẹnẹ kpare vrẹn, avwanre ejobi nana iseri kẹ.

³³Eriyin na a da kparọ kpenu vwẹ obọrhe rẹ Ọghẹnẹ Ọsẹ na ro ji ru ive rẹ Erhi Ọfuanfon na kẹ, kọye o ji kuẹ avwanre rẹ ovwan mrẹ na re ovwan ji nyo na.

³⁴Kidie Devid yeri kpo idjuvwu-u; ẹkẹvuọvo ekpuyovwi rọye tare nẹ, Ọrovwohwo ta kẹ Ọrovwovwe nẹ, tidia vwẹ obọrhe mẹ,

³⁵bẹsiẹye me vwọ vwẹ ivwighrẹ wẹn hwaọtọ kẹ wẹ chiyi.

³⁶Jẹ uwevwi rẹ Izrẹl ejobi riẹn ọnana gbagba nẹ Jesu rẹ ovwan kanre mu agbagba na, ọye Ọghẹnẹ vwo mu Ọrovwohwo kugbe Kristi.

³⁷Ọke rẹ ayen vwo nyo onana udu de bru ayen, ayen da ta kẹ Pita vẹ iyinkọn ri chekọ na nẹ, Imoni, Kidie avwanre che ru?

³⁸Pita da ta kẹ ayen nẹ, Kurhẹriẹ rere ovwan ohwo ọvuọvo reyọ ame vwẹ odẹ ri Jesu Kristi fiki rẹ evwoghovwo rẹ imwemwu rẹ ovwan; ovwan ke cha mrẹ okẹ rẹ Erhi Ọfuanfon na reyọ.

³⁹Kidie ive na ọ rẹ ovwan kugbe emọ rẹ ovwan kugbe ayen ejobi re hẹ isi, kugbe ayen uche otu ọvuọvo rẹ Ọrovwohwo Ọghẹnẹ rẹ avwanre che se vwọ kẹ.

⁴⁰Ji kugbe eta efa ọtiọye na buebu o vwo bru ayen uche, tanẹ, ovwan sioma rẹ ovwan nẹ edje nana ri ghwruru na.

⁴¹Ọtiọye na a da vwẹ ame kẹ ihwo re reyọ ota rọye na, ayen otu re keri kugbe ukoko na vwẹ ẹdẹ yena na da dia ihwo uriori erha.

⁴²Kọke kọke ayen vwo koko vwẹ uyono rẹ iyinkọn na ayen me re kugbe ayen me nẹ ẹrhovwo kugbe.

⁴³Oshọ de mu kohwo kohwo; otu rẹ iyinkọn na de ru emu rẹ igbunu kugbe eka buebu.

⁴⁴Uche ihwo ri segbuyota na de kuoma vẹ eyere rayen kugbe ọvo.

⁴⁵Ayen da shẹ etọ vẹ ekuakua rẹ ayen ejobi, ayen da ghare ayen kẹ ihwo na ejobi, kirobo rẹ ohwo ọvuọvo guọnọre.

⁴⁶Kẹdẹ kẹdẹ kọye ayen vwo koko vwẹ uwevwi rẹ ega kugbe ọre kugbe vwẹ iwevwi rayen, re ayen vwọ ria emu vẹ aghọghọ vẹ udu esiri.

⁴⁷Kẹ ayen jiri Ọghẹnẹ ayen ohwohwo ke vwẹ ẹro esiri ni ohwo. Kẹdẹ kẹdẹ kọye Ọrovwohwo vwọ vwẹ ihwo re sivwi rhọ vwọ ba ayen.