Read urhobo Iruo rẹ Iyinkọn na 20 Bible Online

Iruo rẹ Iyinkọn na 20 - urhobo bible

Iruo rẹ Iyinkọn na 20

¹Rẹ ozighi na vwo fue nu, Pọl de re se idibo na ro vwo bru ayen uche nu ọ da yan jẹ ayen vwo kpo Masidonia.

²Rọvwọ wan abọ nana ejobi vrẹn nu o de bru ayen uche gangan, o de rhi te Gris.

³Kẹ etiyin ọ diare emeranvwe erha, rẹ ihwo ri Ju vwọ jẹ iroro rẹ ehwe kpahọ jo che biẹ kpo Syria, ọ da rhẹriẹ iroro rọye, o de rhivwi ra wan Masidonia.

⁴Sopata rẹ ohwo ri Biria, ọmọ ri Paerọs, de nene; ihwo ri Tẹsalonaika ivẹ Aristakọs kugbe Sẹkọndọs ji nene; kugbe Gayọs ohwo ri Dabe, kugbe Timoti ohwo rẹ Ẹsha, Taekikọs kugbe Trofimọs.

⁵Enana da ka obaro ra hẹrhẹ avwanre vwi Troas,

⁶ẹkẹvuọvo ọke rẹ orẹ rẹ Ikara ro Jephuo vwọ ghwiẹ nu avwanre de bi nẹ Filipae, avwanre vwo bi ẹdẹ iyori nu avwanre da vwa ayen vwi Troas, avwanre da dia etiyin ẹdẹ ighwrẹ.

⁷Vwẹ ẹdẹ rẹsosuọ vwẹ ẹdidjala na, rẹ avwanre vwo koko che vwo bru ikara, Pọl da ta ota kẹ ayen, yọ vwẹ ẹro so nẹ irhiọke kẹ ọye mu oyan; ọ da ta ota na krekri re te uherevie ason.

⁸Irhukpẹ buebu ra la vwẹ ubruwevwi rẹ obenu rẹ ayen de koko na.

⁹Emeghene ọvo re se Yutikọs tidia evakpo. Ri Pọl vwọ ta ota na o de shero ovwerhẹ; rẹ ovwerhe na vwo muo gangan re, o de phre she nẹ ubruwevwi rerha rhe o de ghwe ghwu.

¹⁰Ẹkẹvuọvo Pọl de wo bro rhe ọ da riẹn oma nene, ọ da gbanọ ọ da ta, We guegue-e, kidie o ghwuru-u.

¹¹Ri Pọl vwo yeri kpo obenu nu rẹ ayen vwo bru ikara na re nu, ọ vẹ ayen de gbe ikun krekri re te irhiọke, ọ ke yan jẹ ayen vwo.

¹²Ayen de mu ọmọ na kpo ọkpokpọ, udu rẹ ayen da gan.

¹³Ẹkẹvuọvo rẹ avwanre ra vwọ ro okọ, avwanre de bi kpo Asọs, kẹ avwanre roro nẹ avwanre dia etiyin de mu Pọl, kidie ọtiọye a rhuẹrẹ phihọ jovwo, kidie okpuyovwi rọye guọnọ wan ọ rẹ otọ yanran.

¹⁴Rọ vwọ vwa avwanre vwẹ Asọs, avwanre da reyọ phihọ okọ me de bi kpo Mitilin.

¹⁵Ri me vwo bi nẹ etiyin ẹdẹ rivẹ avwanre de hirhe aro ku Kiọs; ẹdẹ rivẹ avwanre de te Samos; ẹdẹ rọ kpaerọ avwanre de rhi te Milẹtọs.

¹⁶Kidie Pọl jẹ iroro vẹrhe nẹ ọye bi wan Ẹfesọs, rere ọye vwo jẹ ọke ẹghwọrọ vwẹ Esha; kidie o bru okpakpa kpo Jerusalẹm, sẹ, ọye sa vwa orẹ ri Pẹntikọst.

¹⁷Vwi Milẹtọs o de ji ikọn re se ekpako rẹ ishọshi rẹ Ẹfesọs.

¹⁸Rẹ ayen vwo bro rhe, ọ da ta kẹ ayen. Okpuyovwi rẹ ovwan riẹnre obo re me dia ohri rẹ ovwan te vwẹ ọke na ejobi nẹ ẹdẹ rẹsosuo rẹ owọ mẹ vwo te otọ rẹ Esha.

¹⁹Me ga Ọrovwohwo vwẹ oma evwokpotọ vẹ oviẹ vẹ edavwini re vwa vwẹ vwẹ oma rẹ iroro umwemwu rẹ ihwo ri Ju;

²⁰obo ri mi si emu ọvuọvo rọ vwẹ erere kẹ ovwan nu-u, mi yono ovwan vwẹ azagba ji nẹ uwevwi kpo uwevwi,

²¹ri mi se oseri kẹ ihwo ri Ju vẹ ihwo ri Grik ni kurhẹriẹ bru Ọghẹnẹ rhe ri vwo esegbuyota kpahe Ọrovwavwanre Jesu Kristi.

²²Nighe, asakiephana, mi kpo Jerusalẹm, ọ gba phihọ ovwẹ vwẹ obo erhi, me riẹn obo re phia kẹ vwẹ vwẹ oboyi-i;

²³jokpa nẹ Erhi Ọfuanfon se oseri kẹ vwẹ vwi korere korere nẹ imu vẹ oja ra hẹrhẹ ovwẹ.

²⁴Ẹkẹvuọvo mi se arhọ mẹ gbe emuọvo-o eyẹ kọ ghare kẹ oma mẹ-ẹ, ọ da dianẹ me sa yan oyan mẹ na kugbe odibo egbo re me reyọ miẹ Ọrovwohwo Jesu, re mi vwo se oseri kẹ iyẹnrẹ esiri rẹ ẹserọphẹ rẹ Ọghẹnẹ.

²⁵Asakiephana, gbe nighe, me riẹnre nẹ ovwan re me dia ohri rọye yanrhe yankpo ghwoghwo iyẹnrẹ esiri rẹ uvie na gbe cha mrẹ opharo mẹ ofa-a.

²⁶Vwe ọtiọye me se oseri kẹ ovwan nonẹ na nẹ abọ mẹ pha fuanfon kpahe ọbara rẹ ovwan ejobi.

²⁷Kidie mi sioma reyọ vwo jẹ iroro rẹ Ọghẹnẹ e dje kẹ ovwa-an.

²⁸Wa kẹnoma rẹ ovwan kugbe uchuru na ejobi, rẹ Ẹrhi Ọfuanfon na vwọ kẹ ovwan nẹ wa vwẹ ẹro te, re wa ghẹrẹ ishọshi rẹ Ọrovwohwo rọ vwẹ ọbara robọ rọye dẹ.

²⁹Me riẹnre nẹ ọke mi de kpo nu ikpohrokpo re djoma cha rhe ohri rẹ ovwan, i che jẹ igodẹ na vwo ẹghwọrọ-ọ.

³⁰Ihwo re chahe eta rhẹriẹ cha rhe ohri rẹ ovwan, ki che si idibo na ba oma.

³¹We gbe jeje oma, re wa karohọ nẹ ikpe erha soso mi gbẹdẹ-ẹ te ason te uvo me vwọ vwẹ oviẹ brẹ ovwan uche.

³²Asakiephana mi mu ovwan phihọ obọ rẹ Ọghẹnẹ kugbe ota rẹ ẹsẹrọphẹ rọye, rọ sa kpọ ovwan vi rọ ke rha ghare uku kẹ ovwan vwẹ ohri rẹ ihwo re rufon nure na.

³³Urhuru rẹ idọnọ ọfuanfon eyẹ oro eyẹ amwa rẹ ohwo ọfa si vwe-e.

³⁴Ekpuyovwi rẹ ovwan riẹnre nẹ abọ nana vwenẹ re kọn ekọn rẹ obo re da vwẹ ejobi, ji kugbe ayen otu re vẹ ovwẹ gba herọ na.

³⁵Vwẹ evun rẹ emu na ejobi mi vwo dje kẹ ovwan nẹ owian ọtiọye na a sa vwọ cha otu rẹ evwiẹrẹ uko, je me karohọ eta rẹ Ọrovwohwo Jesu, obo rọ tare nẹ, Ẹrhovwo herọ kẹ ọkokẹ nọ ohwo ra kẹ.

³⁶Rọ vwọ ta ọtiọye nu, o de shiguẹ ọ vẹ ayen ejobi da nẹ ẹrhovwo.

³⁷Ayen ejobi da viẹ ayen da gbanọ Pọl ayen da fiọnfiọn unu.

³⁸Ọ rọ ma da ayen ki fiki rẹ ota rọ tare, nẹ ayen gbe mrẹ opharo rọye ọfa-a. Ayen de rhi suo rhi te okọ.