Read urhobo Iruo rẹ Iyinkọn na 21 Bible Online

Iruo rẹ Iyinkọn na 21 - urhobo bible

Iruo rẹ Iyinkọn na 21

¹Rọ vwọ yan jẹ ihwo na vwo nu o de bi, phiọnphiọn re te Kọs, ẹdẹ rivẹ ayen de te Rhodes, kẹ etiyin ayen nu kpo Patara.

²Rẹ ayen vwọ mrẹ okọ rọ samuẹ kpo Fonisha, avwanre da ruọ, me de bi yanran.

³Ọke rẹ avwanre vwọ kparo mrẹ Saeprọs, ma da vwẹ obọhwẹre nyẹ me de bi kpo Siria, me de re duvwu Taya; kidie etiyin a da cha fa emu no okọ na.

⁴Rọ vwọ guọnọ idibo na mrẹ nu, avwanre da dia etiyin ẹdẹ ighwrẹ. Ayen da wan oma rẹ Erhi ta kẹ Pọl nẹ o kpo Jerusalẹmu-u.

⁵Ọkẹ rẹ ẹdẹ rẹ avwanre vwọ gba vwẹ etiyin nu, avwanre vrẹnri me de mu oyan rẹ avwanre phihọ; ayen ejobi, vẹ eya vẹ emọ, de sun avwanre rhiri rhi te ughere rẹ orere na; me vwo shiguẹ vwẹ erhuru na avwanre da nẹ ẹrhovwo yere ohwohwo kẹ ẹdẹ ọfa.

⁶Etiyin avwanre da ro okọ, ayen de rhivwi kpo.

⁷Ọke rẹ avwanre vwo bi ubiokọ rẹ Taya re nu, avwanre de rhi duvwu Ptọlemais; avwanre de yere imoni na avwanre vẹ ayen de dia etiyin ẹdẹ ọvo.

⁸Rẹ ọke vwo rhie avwanre de vrẹn rhi bi te Sizaria; avwanre da ro uwevwi ri Filip oghwoghwo iyẹnresiri na, ọvo vwẹ usun rẹ ighwrẹ na, ma da dia etiyin.

⁹O vwo emetẹ ẹne ri ji kpo orọvwe-e, re mraro.

¹⁰Rẹ avwanre vwọ dia etiyin emerha, ọmraro ọvo re se Agabọs de nẹ Judia rhe.

¹¹Ọghwa yan bru avwanre rhe o de gbobọ phihọ umuamwa ri Pọl ọ da vwọ gba abọ vẹ awọ rẹ omobọ rọye, ọ da ta, Enẹ Erhi Ọfuanfon na tare, Ọtiọna ihwo ri Ju re hẹ Jerusalẹm cha gba ohwo ro vwo umuamwa nana rẹ ayen de muo vwo rhe ihwo ri Keferi.

¹²Ọke rẹ avwanre vwo nyo ọnana, avwanre vẹ ihwo re hẹ etiyin da rẹ nẹ o kpo Jerusalẹmu-u.

¹³Etiyin Pọl da kpahe, Die ovwan ruẹ, rẹ ovwan vwọ vwẹ oviẹ miovwẹ udu mẹ? Kidie me choma ọ dianẹ kẹ uwodi ọvo-o ẹkẹvuọvo tobọ ughwu dede vwi Jerusalẹm vwi fiki rẹ odẹ rẹ Ọrovwohwo Jesu.

¹⁴Ọke ra gbe sa djẹ-ẹ, avwanre ki rovwori tanẹ, Ọrovwohwo gbe ru ọhọre rọye.

¹⁵Rẹ ẹdẹ nana vwọ wan nu avwanre de muegbe avwanre de kpo Jerusalẹm.

¹⁶Idibo na evo ri nẹ Sizaria rhe de nene avwanre, ayen de sun avwanre te uwevwi ri Mesin ohwo ri Saeprọs, ọvo vwẹ idibo rẹ ẹsosuọ, kẹ etiyin avwanre wo phihọ.

¹⁷Ọke rẹ avwanre rhi vwo te Jerusalẹm, imoni na de dede avwanre vẹ aghọghọ.

¹⁸Vwẹ ẹdẹ rọ kpaherọ Pọl vẹ avwanre de kpo obo ri Jems; ekpako na ejobi je hẹ etiyin.

¹⁹Re vwo yere ayen nu, o de gbe kẹ ayen ọvuọvo obo rẹ Ọghẹnẹ ruru vwẹ ohri ri Keferi na vwẹ oma rẹ odibo egbe rọye.

²⁰Ọke rẹ ayen vwo nyo, ayen de jiri Ọghẹnẹ. Ayen da ta kẹ, Wọ mrẹre, omoni, obo rẹ ayen buebu uriori kpahe uriori vwẹ ohri rẹ ihwo ri Ju ri segbuyota; nẹ oruru rẹ urhi na je riọ vwẹ ayen evun,

²¹E gbe kẹ ayen kpahe owẹ nẹ wo yono ihwo ri Ju ejobi re hẹ ohri ri Keferi nẹ ayen siẹn Mosis, wọ ta kẹ ayen nẹ ayen yanvwa emọ raye-en eyẹ vwọ yọnre uruemu raye-en.

²²Kidie e ru vwo? Ayen che nyo dẹn nẹ wọ rhere.

²³Gbe ru obo re ma ta nẹ wo ru. Avwanre vwo ihwo ẹne ri ve ive;

²⁴reyọ ihwo nana rere wo phorho oma wẹn vẹ ayen re wọ jẹ ẹkẹn arhọghọ rayen, rere a wanre iyovwi rayen. Kẹ enẹ ayen vwọ riẹn nẹ uyota hẹ ikun re gbe kpahe owẹ na-a yẹ ẹkẹvuọvo okpuyovwi wẹn je yọnre urhi na.

²⁵Ẹkẹvuọvo vwọ kẹ otu ri Keferi ri segbuyota na, avwanre si ọbe rhe ayen kpahe orhiẹn rẹ avwanre bruru nẹ ayen gha obo ra vwọ gọ iye kugbe ọbara kugbe eranvwe ro mu ghwu kugbe ọfanrhiẹ.

²⁶Etiyin Pọl da reyọ ihwo na, ẹdẹ rivẹ o de phorho oma rọye vẹ ayen ayen de kpo uwevwi rẹ ẹga na, ra vuẹ ovuẹ rẹ ẹdẹ rẹ omaephorho na vwọ gba kugbe okẹ rẹ ayen ohwo ọvuọvo cha kẹ.

²⁷Ọke rẹ ẹdẹ ighwrẹ na cha joma vwọ gba re, ihwo ri Ju ri nẹ Esha rhe, re mrẹrẹ vwẹ evun rẹ uwevwi rẹ ẹga na, da kpare otu na ejobi vwọ so ayen, ayen de shabọ phihọ,

²⁸ayen de kperi, Ihwo rẹ Izrẹl, cha avwanre uko! Ọnana hẹ ohwo ro yono ihwo vwi kasan kasan kpahe ihwo na kugbe urhi na kugbe etinẹ na; ọ rọ marho ọ rha je ghwa ihwo ri Grik rhe uwevwi rẹ ẹga na rhi vwo gbe asan ọfuanfon nana ẹgua.

²⁹Kidie ayen ka mrẹ jovwo vẹ Trofimọs ohwo rẹ Ẹfesọs vwẹ evun rẹ orere na, kẹ ayen rori nẹ Pọl reyerọ rhe uwevwi rẹ ẹgan na.

³⁰Etiyin orere na ejobi de rhe se ọghovwiẹ, ihwo na de rhi si koko; ayen de shabọ phihọ Pọl ayen de kpono nẹ evun rẹ uwevwi rẹ ẹga na, siẹvuọvo na a da ghwa kanre ẹchẹ na.

³¹Rẹ ayen vwọ guọnọ hwe re ovuẹ de ghwe bru onotu rẹ isodje nẹ ozighi hẹ Jerusalẹm ejobi.

³²Siẹvuọvo ọ da ghwa ghwẹ isodje kugbe inotu rẹ uriori, ọ da djẹ bru ayen; ọke rẹ ayen vwọ mrẹ onotu na kugbe isodje na, ayen da da obọ rẹ ehwe ri Pọl ji.

³³Etiyin onotu na da rhe o de muo, ọ da tanẹ a vwẹ igoni ivẹ kanrọ. Ọ da nọ oka rẹ ohwo rọ epha kugbe obo ro ruru.

³⁴Evo vwẹ evun rẹ otu na de kperi unu ovo, evo rhe kperẹ ọfa; rọ rha sa mrẹ uyota rọ ghwa ozighi na rhe na-a, o de ji urhi nẹ e muo kpo obo ogba rẹ isodje na.

³⁵Ro rhi vwo te egana na, kidie isodje na muro kpahe akoko fiki rẹ ozighi rẹ otu na;

³⁶Kidie ihwo na re nene gbidi, ji kperẹ, E muo yanran!

³⁷Ra ghwa cha vwọ reyọ Pọl vwo te ogba rẹ isodje na, ọ da ta kẹ onotu na, Wọ rhọvwere nẹ me ta omota kẹ wẹ? Ọ da ta, Wọ jẹ Grik?

³⁸Wọ dia ohwo rẹ Ijipt, ro gbe ozighi dẹvọ na ro de sun ihwo uriori ẹne izighẹ kpo obo evun rẹ aghwa?

³⁹Pọl da kpahe, Mẹvwẹ ohwo ri Ju ro nẹ Tasọs rhe vwi Silisha, ọmotọ rẹ okporere rode; me rẹ wẹ, jẹn uvwe ta ota kẹ ihwo na.

⁴⁰Rọ vwọ rhọvwe kẹ nu, Pọl, vwo mudia vwẹ ugana na, o de kpogho obọ kẹ ihwo na; rẹ asan ejobi vwọ fọ riẹi nu, ọ da jẹ Hibru vwo ta ota, tanẹ,