Read urhobo Iruo rẹ Iyinkọn na 22 Bible Online

Iruo rẹ Iyinkọn na 22 - urhobo bible

Iruo rẹ Iyinkọn na 22

¹Imoni kugbe esẹ, we nyo ẹdjọ rẹ unu mẹ ri mi che gu kẹ ovwan.

²Rẹ ayen vwo nyo nẹ ọ jẹ ephẹrẹ ri Hibru kẹ ayen, ayen da nabọ kerhọn. Ọ da ta;

³Mẹvwẹ ohwo ri Ju, re vwiẹri vwi Tasọs vwi Silisha, ra ghẹre vwẹ orere nana vwẹ agada ri Gamaliẹl, re yonori kokoroko kpahe uruemu rẹ urhi rẹ esẹ rẹ avwanre, rẹ oruru rẹ Ọghẹnẹ riọ vwẹ evun kirobo rẹ ovwan ejobi epha nonẹ na.

⁴Mi kpokpo Idjerhe nana re te ughwu, me gba mi muẹ te eshare te eya phihọ uwodi,

⁵kirobo rẹ orherẹn rode kugbe ẹguare rẹ ekpako na se se oseri. Ayen ri si ọbe kẹ vwẹ vwo rhe imoni na, ki mi kpo Damaskọs re mu ayen otu re hẹ oboyi gba rhe Jerusalẹm rhi gbo oja kẹ.

⁶Re me vwọ yanran re ki mi che si kẹrẹ Damaskọs, vwẹ oma rẹ oghẹruvo siẹvuọvẹ na enu da nyavwanro riariẹ ovwẹ họ.

⁷Mi de she teye otọ mi de nyo urhuru rọ ta kẹ vwẹ nẹ, Sọl, Sọl, Die wo vwo kpokpo uvwe?

⁸Me da kpahe, Wẹ ono vwo, Ọrovwohwo? O da ta kẹ vwẹ, Mẹvwẹ Jesu ri Nazaret ru wo kpokpo na.

⁹Asakiephana ihwo ri nene uvwe mrẹ urhukpẹ na yẹ ẹkẹvuọvo ayen nyo urhuru rẹ ohwo rọ ta ota kẹ vwẹ na-a.

¹⁰Me da ta, Kidie mi ru, Ọrovwohwo? Ọrovwohwo da ta kẹ vwẹ, Vrẹn, ru wo kpo Damaskọs, kẹ oboyi a da ta kẹ wẹ obo ra rhuẹrẹ phihọ kẹ wẹ nẹ wo ru.

¹¹Re me gbe sa mrorẹ-ẹ fiki rẹ urhukpẹ na rọ ro vwẹ ẹro, ihwo ri nene uvwe na, ke vwẹ obọ tẹtẹ ovwe rhi te Damaskọs.

¹²Ohwo ọvo re se Ananayas, ogba rẹ egagọ kirobo rẹ urhi epha, rẹ ihwo ri Ju re dia oboyi gbe ikun rọye yoyovwi,

¹³de bru uvwe rhe, o mudia kẹrẹ ovwẹ ọ da ta kẹ vwẹ, Oniọvo Sọl, gba mrorẹ. Siẹvuọvo na me da mrorẹ me da mrẹ.

¹⁴Ọ da ta, Ọghẹnẹ rẹ esẹ rẹ avwanre vwẹ owẹ mu nẹ wọ riẹn ọhọre rọye, re wọ mrẹ ohwo rẹ Ọsoso na re wo nyo urhuru ro nẹ unu rọye rhe;

¹⁵kidie wọ cha dia iseri kẹ kugbe ihwo ejobi rẹ obo ru wọ mrẹre kugbe obo ru wo nyori.

¹⁶Asakiephana kidie wọ hẹrhẹ? Vrẹn re wọ reyọ ame, re wọ họ imwemwu wẹn fia, re wo se odẹ rọye.

¹⁷Ọke ri mi vwo rhivwi rhe Jerusalẹm re me vwọ nẹ ẹrhovwo vwẹ uwevwi rẹ ẹga, me da mrẹ emramrẹ

¹⁸Me da mrẹ rọ ta ota kẹ vwẹ, Jọphẹre re wọ vrẹn nẹ Jerusalẹm, fikiridie ayen rhọvwe phihọ oseri ru wo se kẹ vwẹ na-a.

¹⁹Me da ta, Ọrovwohwo, ekpuyovwi rẹ ayen riẹnre nẹ mi muẹ ihwo ri se we gbuyota vwi sinagọg ọvuọvo phihọ uwodi mi hwe evo.

²⁰Ọke re vwo sun ọbara ri Stivin te otọ, mi mudia etiyin me rhọvwe phihọ, mẹvwẹ re yọnrọn iwun rẹ ayen otu ri hwere ghwu.

²¹Ọ da ta kẹ vwẹ, Bi nẹ etiyin; kidie mi che ji uwe yanran shesheri bru otu ri Keferi.

²²Kẹ etinẹ ayen kerhọn rọye ba; ayen da van ayen da ta, We si oka rẹ ohwo ọtiọnana nẹ akpọ na! Kidie o fo ohwo rọ rhọ-ọ.

²³Rẹ ayen vwo kperẹ rẹ ayen vwo kpogho iwun rayen rẹ ayen vwọ ghwẹ ekpẹn kuẹ enu,

²⁴Onotu na da vuẹ ayen nẹ ayen muo phihọ evun rẹ ogba, o da ta nẹ a vwẹ ugbudia fa vwo guegue, sa sa mrẹ obo re sorọ rẹ ayen vwo kperẹ nene na.

²⁵Ẹkẹvuọvo ọke rẹ ayen vwọ vwẹ ifi gba nu, Pọl da ta kẹ onotu na ro mudia kerẹ na, Ọ fo kẹ wẹ re wọ vwẹ ugbudia fa ọmotọ ri Rom, ye ji brorhiẹ hwe-e?

²⁶Ọke rẹ onotu rẹ ujori na vwo nyo ọyena, o de bru onotu na ọ da ta kẹ, Die wo che ruẹ na? Kidie ohwo nana ọmotọ ri Rom.

²⁷Ọtiọye na onotu na da rhe ọ da ta kẹ, Ta kẹ vwẹ, wẹ ọmotọ ri Rom? Ọ da ta, E.

²⁸Onotu na da kpahe, Igho obuebu me vwọ dẹ ọmotọ nana. Pọl da ta, ẹkẹvuọvo ọmotọ mẹ ọ rẹ uvwiẹ.

²⁹Ọtiọye na ayen otu re cha vwẹ ugbudia guegue na da ghwa yan jovwo kpata kpata; oshọ de mu onotu na, kidie ọ mrẹ vughe nẹ Pọl ọmotọ ri Rom ọye ọye gbare na.

³⁰Ẹkẹvuọvo rẹ ọke vwo rhie, rọ vwọ guọnọ riẹn obo re nẹrhe ihwo ri Ju vwo muo, ọ da rhan ifi no, o de se irherẹn ride na kugbe ẹguare nẹ e rhe gba, ọ da vwẹ Pọl rhi mudia vwẹ obaro rẹ ayen.