Read urhobo Iruo rẹ Iyinkọn na 23 Bible Online

Iruo rẹ Iyinkọn na 23 - urhobo bible

Iruo rẹ Iyinkọn na 23

¹Pọl, vwọ tẹrovi ẹguare na, ọ da ta, Imoni, evun esiri me vwọ ga Ọghẹnẹ mẹ rhi te nonẹ na.

²Orherẹn rode na Ananayas da ta kẹ ayen otu ri mudia kẹrẹ nẹ a ghwiẹ unu rọye.

³Etiyin Pọl da ta kẹ, Ọghẹnẹ cha ghwiẹ wẹ, wẹ ọvwareidjotọ na! Wo tidia vwẹ ovwẹ guẹdjọ nene urhi yu wo rhe gbobọnyẹ urhi na ta nẹ a ghwiẹ vwẹ?

⁴Otu ri mudia kẹrẹ da ta, Wọ harha orherẹn rode rẹ Ọghẹnẹ?

⁵Pọl da ta, Me riẹnre rẹ, imoni, nẹ orherẹn rode rẹ; kidie e siro nẹ, Wo yivwaro kpahe osun rẹ ihwo wẹ-ẹn.

⁶Ẹkẹvuọvo ri Pọl vwọ mrẹ vughe nẹ abọvo Sadiusi abọ rivẹ ki Farisi, o de kperi vwẹ evun rẹ ẹguare na, Imoni, mẹvwẹ Farisi, ọmọ ri Farisi, fiki ri phiẹrohọ re vrẹnushi rẹ irivwi ọye a vwọ vwẹ ovwẹ guẹdjọ na.

⁷Rọ vwọ ta ọnana nu, aphro de rhi she vwẹ uvwre ri Farisi vẹ Sadiusi; ọghwẹgbe na da ghare.

⁸Kidie Sadiusi na tare nẹ evrennshi herọ-ọ, eyẹ emakashe, eyẹ erhi, ẹkẹvuọvo Farisi na rhọvwe phihọ ayen ejobi.

⁹Ọsẹghẹ rode na de rhi she; evo vwẹ isiẹbe ri Farisi vrẹn mudia e da ta, Avwanre mrẹ ornchọ vwẹ oma rẹ ohwo nana-a. Kidie ọ epha ọ da dianẹ erhi eyẹ amakashe ta ota kẹ?

¹⁰Rẹ aphro na rhe vwọ gan re, onotu na, rẹ oshọ muẹ nẹ ayen cha vwẹ abọ sha Pọl, da vuẹ isodje na nẹ ayen yanran ra vwẹ ẹgba reyọ nẹ ohri rẹ ayen re ayen vwo kpo obo ogba.

¹¹Vwẹ ason rọ kpaherọ Ọrovwohwo de mudia kẹrẹ ọ da ta, Jẹn udu wẹn gan, kidie obo ru wo se oseri kẹ vwẹ vwi Jerusalẹm na, ọtiọye wo ji che se oseri kẹ vwẹ vwi Rom.

¹²Rẹ ọke vwo rhie, ihwo ri Ju de re se umẹ ayen de duvwu iyori kẹ oma nẹ ayen hwe Pọl nu-u ayen re emu-u ayen da ame-e.

¹³Ayen ihwo ri se ume na te ihwo ujuvẹ.

¹⁴Ayen de bru irherẹn ride na kugbe ekpako na ayen da ta, Avwanre nabọ duvwu iyori kẹ oma kokoroko nẹ kpẹsiẹ rẹ ayen hwe Pọl nu-u ayen re emu-u ayen je da ame-e.

¹⁵Ovwan, vẹ otu rẹ ẹguare na, gba vuẹ rhe onotu na rọ reyọ rhe ovwan, kerẹsiẹ ra da mrẹ nẹ ovwan cha nabọ guọnọ otọ rẹ ota na gbagba. Bẹsiẹ ro vwo te etinẹ yẹ avwanre reyerọ hwe nure.

¹⁶Asakiephana ọmọ rẹ oniọvo ri Pọl nyo nẹ ayen hwa phihọ hẹrhẹ; ọtiọye ọ da yanran bru Pọl vwẹ obo ogba.

¹⁷Pọl de se ọvo vwẹ onotu rẹ ujori na ọ da ta, Reyọ emeghene na vwo rhe onotu na; kidie o vwo obo rọ cha ta kẹ.

¹⁸Ọtiọye na ọ da reyọ o de vwo rhe onotu na ọ da ta, Pọl rọ hẹ imu na ọye ratẹ me vwẹ emeghene na rhe we, o vwo obo rọ cha ta kẹ owẹ.

¹⁹Onotu na da yọnrọn obọ, rọ vwọ reyọ vwọ hẹ akakọ ọ da bẹbẹ nọ, Die wọ guọnọ ta kẹ vwẹ?

²⁰Ọ da ta, Ihwo ri Ju na rhọvwe kugbe nẹ a ta kẹ wẹ nẹ odẹ rọ cha na wọ reyọ Pọl vwọ rhe ẹguare, kerẹsiẹ ra da mrẹ nẹ ayen nabọ guọnọ otọ rẹ ota na vwẹ obọ rọye.

²¹Ẹkẹvuọvo wọ rhọvwa kẹ aye-en; kidie ihwo kerẹ ujuvẹ hwa phihọ hẹrhẹ, ayen duvwu iyori kẹ oma nẹ kpẹsiẹ rẹ ayen hwe Pọl nu-u ayen re emu-u eyẹ da ame-e; asakiephana ayen muegbe nure, re hẹrhẹ o ru gba ro che nẹ obọ wẹn rhe.

²²Onotu na da de siobọ nẹ emeghene na kpo, ọ da ta kẹ nẹ, Wọ ta kẹ ohwo ọvuọvo nẹ wọ vuẹ vwẹ ọnana-a.

²³Etiyin o de se ivẹ vwẹ inotu rẹ ujori na ọ da ta, Vwẹ unọke erha rẹ ason muegbe rẹ isodje uri vẹ otu re gua iyesi ujorha gbẹ ihwe kugbe ihwo uri re yọnre oshuẹ rere ayen kpo Sizaria.

²⁴Guọnọ iyesi vwọ kẹ Pọl re ọ gua, re wọ reyọ dẹndẹn vwo rhe Fẹliks osun.

²⁵O de si ọbe vwọ kpahọ.

²⁶Mẹvwẹ Kladiọs Laisias ri si ọbe nana rhe Ajuwẹ, osun Feliks, mi yere uwe.

²⁷Ihwo ri Ju ri mu ohwo nana, kẹ ayen guọnọ hwe, kọye me vẹ isodje na de rhi sivwo mie ayen, kidie mi nyori nẹ ọmotọ ri Rom o ruẹ.

²⁸Re me vwọ guọnọ urhi rẹ ayen vwo muo re, ke me reyerọ rhe ẹguare rayen.

²⁹Me da rhe mrẹ nẹ ayen muro fiki rẹ urhi rayen, ẹkẹvuọvo ayen mrẹ urhi ro fo ekanrọ eyẹ ughwu vwo muo-o.

³⁰Re vwo rhie vwẹ ọnana nẹ ayen se umẹ kpahe ohwo na, siẹvuọvo na mi de ghwe muo vwo rhe we, me da rha vuẹ otu ri muro nẹ ayen wan fi rere ayen rhi gu kpahọ kẹ wẹ.

³¹Ọtiọye na isodje na kirobo rẹ a vuẹ ayen, ayen da reyọ Pọl vwẹ ason rhi te Antipatris.

³²Vwẹ irhiọke rivẹ ayen de rhivwi rhe ogba, ayen da yan jẹ otu re gua esi na ọvo ni gbe suo yanran.

³³Ọke rẹ ayen rhi vwo te Sizaria ayen da vwẹ ọbe na kẹ osun na, ayen da vwi Pọl kẹ.

³⁴Ro vwo se ọbe na, ọ da nọ ekpẹn rẹ ubrotọ ro nurhe. Ọke ra vwọ vuẹ nẹ Silisha.

³⁵Ọ da ta, Mi che nyo we vwẹ ọke rẹ otu ri mu we da rhe, O de ji urhi nẹ muo phihọ uwodi rẹ Herọd.