Read urhobo Iruo rẹ Iyinkọn na 24 Bible Online

Iruo rẹ Iyinkọn na 24 - urhobo bible

Iruo rẹ Iyinkọn na 24

¹Rẹ ẹdẹ iyori vwọ wan nu orherẹn rode na Ananayas vẹ ekpako evo kugbe ọtota, re se Tẹtulọs da rhe. Ayen de guẹdjọ rayen kpahe Pọl vwọ kẹ osun na;

²Ọke re vwo se, Tetulọs de gu kpahọ, nẹ: Ajuwẹ Feliks, rẹ avwanre vwọ wan oma wẹn mrẹ ufuoma buebu na, kugbe uphẹ ru wọ vwọ kẹ avwanre, eravwọ buebu eye a rhuẹrẹ phihọ vwẹ evun rẹ ẹgborho nana,

³kidjerhe kidjerhe kugbe kasan kasan avwanre vwọ reyọ ọnana vẹ aghọghọ.

⁴Ẹkẹvuọvo re mi vwo jẹ ọke wẹn ehwe, me rẹre rere vwẹ arodọvwẹ wẹn wọ kerhọn rẹ avwanre emẹrha.

⁵Kidie avwanre rhe mrẹ nẹ ohwo nana vwenẹ ohwo okpetu, ro sivwẹ oseghe vwẹ ohri rẹ ihwo ri Ju re hẹ akpọ na ejobi, kugbe olori rẹ ẹko rẹ ihwo ri Nazarẹt.

⁶Ọ davwe oma re o rhi vwo gbe uwevwi rẹ ẹga na ẹgua, ẹkẹvuọvo avwanre de shabọ phihọ.

⁷Laisias da rhe vwẹ egba sivwo mie avwanre.

⁸Wọ da nọ orhiẹn kẹ oma wẹn ko wọ mrẹ otọ rẹ emu ejobi rẹ avwanre vwi fiki rọye muo na.

⁹Ihwo ri Ju na ejobi da rhọvwe phihọ obo ro guru na nẹ ghene ọtiọye.

¹⁰Rẹ osun na vwo dju obọ kẹ nẹ ọ gba ta ota, Pọl da kpahe; Re me vwọ mrẹ vughe nẹ ikpe buebu re wo vwo guẹdjọ vwẹ ẹgborho nana, ke me vwẹ aghọghọ gu ẹkẹn unu mẹ.

¹¹Kirobo ru wo se keri mrẹ, ọ je vrẹn ẹdẹ ihwive mi kpo Jerusalẹm kpo ẹga-a;

¹²ayen mrẹ vwẹ rọ vẹ ohwo ọvuọvo phra aphro-o eyẹ me vẹ otu gbe ozighi-i, vwẹ uwevwi rẹ ẹga eyẹ vwi sinagọg na-a, eyẹ vwẹ evun rẹ orere-e.

¹³Eyẹ se dje mu vwe obo rẹ ayen guẹ kpahe ovwẹ vwẹ etinẹ na-a.

¹⁴Ẹkẹvuọvo me rhọvwe ọna kẹ wẹ nẹ, Idjerhe na, rẹ ayen se ẹko na, ọye me wan gọ Ọghẹnẹ Ọsẹ rẹ avwanre, mi de segbuyota kemu kemu rẹ urhi na djeri eyẹ rẹ emraro na si phihọ otọ,

¹⁵vẹ iphiẹrohọ kpahe Ọghẹnẹ rẹ ekpuyovwi rẹ ayen vwori, nẹ evrẹnushi herọ kẹ ihwo, te ihwo ọsoso te i ri jẹ ọsoso ẹdia.

¹⁶Vwẹ ọtiọye na ki mi vwo omamọ rẹ udu kẹ Ọghẹnẹ kugbe ihwo rẹ akpọ.

¹⁷Asakiephana rẹ ikpe evo vwọ wan nu ke me ghwa ọko kugbe okẹ vwo rhe ẹgborho mẹ.

¹⁸Ri mi vwo ruẹ ọnana re, ayen da mrẹ vwẹ ri mi phorho oma nure vwẹ uwevwi rẹ ẹga, me ghwẹ otu nene oma vwo siẹvo kẹ edo-o. Ẹkẹvuọvo ihwo ri Ju evo ri nẹ Esha rhe —

¹⁹manẹ kẹ ayen rhe etinẹ re ayen gu kpahe ovwẹ kẹ wẹ, ọ da dianẹ ayen vwo obo rẹ ayen gu kpahe ovwẹ.

²⁰Eyẹ gba tobọ jẹ ihwo nana ta obo re chọre rẹ ayen mrẹre vwẹ ọke re me vwọ hẹ evun rẹ ẹguare,

²¹jokpa rẹ emu nana ọvo na ri mi kperi phia ri mi vwo mudia vwẹ ohri rẹ ayen, Vwi fiki rẹ evrẹnushi rẹ irivwi ọye a vwọ vwẹ ovwẹ guẹdjọ kẹ wẹ nonẹ na.

²²Ẹkẹvuọvo Fẹliks, vwo vwo erianriẹn rẹ Idjerhe na ghaghare na, ọ da kpare ota na kpo obaro, tanẹ, Ọke rẹ Laisias onotu na da rhe, ki mi brorhiẹ rẹ ota na.

²³Etiyin ọ da vwẹ urhi kẹ onotu rẹ ujori nẹ a reyọ vwo kpo uwodi ẹkẹvuọvo a vwẹ uphẹn kẹ, igbeyan rọye re cha mrẹ vwẹ emu kẹ a djẹ aye-en.

²⁴Ẹdẹ evo vwọ wan nu Fẹliks vẹ aye rọye Drusila, ohwo ri Ju, da rhe; o de re se Pọl o de nyo mie kpahe esegbuyota vwi Kristi Jesu.

²⁵Rọ vwọ phra kpahe ọsoso kugbe oma-ẹnyẹ kugbe ẹdjọeguo rọ cha, Fẹliks de guegue ọ da ta, Yanran tavwe; me da mrẹ uphẹn mi che se we.

²⁶O phiẹrohọ nẹ Pọl che jẹ ọye imigho ẹkẹ-ẹ. Ko dje sese ọ vẹ ọye mie gbe ikun.

²⁷Ẹkẹvuọvo ọke rẹ ikpe ivẹ vwọ wan nu, Pọkiọs Fẹstọs de rhi wene Fẹliks; re o vwo phoro aro kẹ ihwo ri Ju, ọ da yan jẹ Pọl vwo vwẹ uwodi.