Read urhobo Iruo rẹ Iyinkọn na 25 Bible Online

Iruo rẹ Iyinkọn na 25 - urhobo bible

Iruo rẹ Iyinkọn na 25

¹Asakiephana ri Fẹstọs rhi vwo te ubrotọ rọye, rẹ ẹdẹ erha vwọ wan nu o de nẹ Sizaria kpo Jerusalẹm.

²Ọrherẹn rode na kugbe ihwo ride ri Ju da vuẹ kpahe Pọl; kẹ ayen bio phihọ,

³kẹ ayen rẹ nẹ o mu ọghọ kẹ ayen re a rhoma vwi Pọl rhivwi kpo Jerusalẹm, re a hwa phihọ hẹrhẹ ra teyọ hwe vwẹ idjerhe.

⁴Fẹstọs da vuẹ ayen nẹ obo uwodi vwi Sizaria a da sẹro rọye, yẹ okpuyovwi rọye guọnọ oboyi ra phẹrẹkpẹ.

⁵Ọtiọye, ọ tare, gbe jẹn ihwo ri vwo ogangan vwẹ ohri rẹ ovwan nene uvwe ra, ọ da dianẹ ayen mrẹ obo re chọre vwẹ obọ rẹ ohwo na, ayen ki gu muo.

⁶Ọke rọ vwọ dia ohri rẹ ayen kerẹ ẹdẹ ẹrenre eyẹ ihwe, ọ da yanran kpo Sizaria; vwẹ ẹdẹ rivẹ o de tidia umukpe rẹ ẹdjọ ọ da tanẹ a gba ra reyọ Pọl rhe.

⁷Rọ vwọ rhire, ihwo ri Ju ri nẹ Jerusalẹm rhe de mudia riariẹ họ, e da vwẹ irhi egangan vwo muo yẹ ayen se dje ayen muo-o.

⁸Pọl de gu ẹkẹn unu rọye, Me chọ urhi rẹ ihwo ri Ju-u, eyẹ urhi kpahe uwevwi rẹ ẹga na-a, eyẹ me je chọ urhi ri Siza kakaka-a.

⁹Ẹkẹvuọvo ri Fẹstọs, vwọ guọnọ ọghọ mu kẹ ihwo ri Ju, ọ da ta kẹ Pọl, Wọ guọnọ nẹ wo kpo Jerusalẹm, rere a dia oboyi de guẹdjọ rẹ irhi nana re vwo mu we na kẹ vwẹ?

¹⁰Ẹkẹvuọvo Pọl da ta, Mi mudia vwẹ obaro rẹ umukpe rẹ ẹdjọ ri Siza, etiyin hẹ asan ra da vwẹ ovwe guẹdjọ; mi ru ihwo ri Ju chọ-ọ, kirobo rẹ ekpuyovwi wẹ riẹnre.

¹¹Ọ da dianẹ mi ru oruchọ, re me da chọ urhi ro fo ughwu, me guọnọre nẹ me pharhe vabọ-ọ; ẹkẹvuọvo urhi na rhe mu vwe-e, ohwo ọvuọvo sa vwẹ ovwẹ kẹ aye-en. Mi mu ẹdjọ mẹ rhe Siza.

¹²Etiyin Fẹstọs, vẹ otu rẹ ẹguare vwọ jẹ iroro nu, ọ da kpahe, Wo mu ẹdjọ wẹn rhe Siza nure; obo ri Siza kọye wọ cha ra.

¹³Asakiephana rẹ ẹdẹ evo vwọ wan nu, Agripa ovie vẹ Bẹnaesi da rhe Sizaria rhi dede.

¹⁴Rẹ ayen vwọ hẹ etiyin krekri re, Fẹstọs da nẹ iyẹnrẹ ri Pọl kẹ ovie, tanẹ, Ohwo ovo ri Fẹliks yan jovwo vwẹ uwodi hẹ etiyin;

¹⁵re me vwọ hẹ Jerusalẹm, irherẹn ride kugbe ekpako ri Ju da nẹ iyẹnrẹ kẹ vwẹ kpahọ, nẹ e bru hwe.

¹⁶Me da kpahe kẹ ayen nẹ ọ dia uruemu rẹ ihwo ri Rom rere e vwo bru hwe ohwo-o jokpa nẹ ọ re mu imu kugbe ọ re muru vwẹ unu kanre unu, ra da vwẹ uphẹn kẹ re ọye ọvo vwẹ unu rhan ota re mu barọ na.

¹⁷Ọke rẹ ayen rhi vwo koko vwẹ etinẹ, mi rhe hwẹ ọke-e, ẹkẹvuọvo vwẹ ẹdẹ rivẹ mi de re tidia umukpe rẹ ẹdjọ me da ta nẹ, a reyọ rhe.

¹⁸Ọke rẹ otu ri muro vwo mudia, ayen sa mrẹ urhi ọbrabra kirobo ri mi rori vwo muo-o;

¹⁹ẹkẹvuọvo ayen vwo aphro ọvo rẹ ayen vẹ ọye phra kpahe egagọ rẹ ohwo ọvo re se Jesu, ro ghwuru, ri Pọl rhoma tanẹ o vrẹn nẹ ushi rhe.

²⁰Ofu rẹ obo ra guọnọ otọ rẹ ota nana wan de dje vwe, ke me nọrọ sẹ ọ guọnọre nẹ o kpo obo Jerusalẹm ra dia oboyi de vwo guẹdjọ rẹ imu nana.

²¹Ẹkẹvuọvo ri Pọl vwo mu ẹdjọ rọye rhe Ọba na ke me tanẹ a gba sẹro rọye vwẹ uwodi bẹsiẹ rẹ Siza ọvo vwo brorhiẹ na, ke me tanẹ a gba yọnrọn bẹsiẹ me vwọ reyọ vwo rhe Siza.

²²Agripa da ta kẹ Fẹstọs, Ekpuyovwi mẹ guọnọ ohwo na nyo. Ọ da ta, odẹ ro cha, ku wo che nyo.

²³Kọye rẹ ọke vwo rhie Agripa vẹ Benaesi da rhe vẹ oghovwiẹ rode, ayen da ro ọguan na vẹ inotu rẹ ofovwi na vẹ ihwo ride rẹ orere na. Rẹ Fẹstọs vwo se a da vwẹ Pọl rhe.

²⁴Fẹstọs da ta, Ovie Agripa kugbe ovwan re vẹ avwanre gbe koko vwẹ etinẹ, wa mrẹ ohwo nana rẹ ihwo ri Ju ejobi koko siọbe kpahe vwo rhe vwe, vwẹ obi Jerusalẹm kugbe etinẹ, ri kperẹ nẹ o fo ohwo rọ dia akpọ-ọ.

²⁵Ẹkẹvuọvo me mrẹre nẹ o ru emu ọvuọvo ro fo ughwu-u; kirobo rẹ okpuyovwi rọye vwo mu ẹdjọ rọye rhe Siza na, ke me tanẹ mi vwo rhe.

²⁶Ẹkẹvuọvo me mrẹ ugogo rẹ emu ọvuọvo ri mi si rhe ọrovwovwe kpahọ-ọ. Fiki rẹ ọtiọye na kọye me vwo rhe ovwan, marho, kẹ owẹ, Ovie Agripa, nẹ, ọke ma da guọnọ otọ rọye nu, ke me mrẹ obo ri mi si kpahọ.

²⁷Kidie me mrẹ nẹ o vwo otọ-ọ, re me de vwọ vwẹ ohwo re mu phihọ uwodi vwọ yanran ye me mrẹ urhi ọvuọvo vwo muo-o.