Read urhobo Iruo rẹ Iyinkọn na 26 Bible Online

Iruo rẹ Iyinkọn na 26 - urhobo bible

Iruo rẹ Iyinkọn na 26

¹Agripa da ta kẹ Pọl Me rhọvwe kẹ wẹ gbe gu ẹkẹn unu wẹn. Etiyin Pọl da riẹn obọ phia o de gu ẹkẹn unu rọye.

²Mi rori nẹ mi yovwi uyovwi nẹ obaro wẹ, Ovie Agripa, ọye mi de che gu ẹkẹn unu mẹ nonẹ na kpahe urhi ejobi rẹ ihwo ri Ju vwo mu vwe na,

³fikiridie wọ nabọ riẹn uruemu ejobi kugbe aphro rẹ ihwo ri Ju; fiki rẹ ọtiọye na me rẹ wẹ gba nabọ kerhọn mẹ.

⁴Oka rẹ eyere mẹ nẹ ọke-emọ rhe, ri mi yeri vwẹ ohri rẹ ẹgborho mẹ vwi Jerusalẹm, ihwo ri Ju na ejobi nabọ riẹn.

⁵Ayen riẹnrẹ rhabae rhe, ọ da dianẹ ayen rhọvwe se oseri rọye, nẹ kirobo rẹ uruemu rẹ ẹko rẹ ega rẹ avwanre gan te me nabọ yeri eyere ri Farisi.

⁶Asakiephana ka vwẹ ovwẹ guẹdjọ fiki rẹ iphiẹrohọ vwẹ evun rẹ ive rẹ Ọghẹnẹ ve kẹ esẹ rẹ avwanre,

⁷ive rẹ orua ihwivẹ rẹ avwanre phiẹrohọ o te ayen obọ, kọye ayen vwọ nabọ gọ te ason te uvo. Fiki rẹ iphiẹrohọ nana kọye ihwo ri Ju vwo mu vwe na, E Ovie!

⁸Die nẹrhẹ ovwan je segbuyota nẹ Ọghẹnẹ kpare irivwi vrẹn?

⁹Okpuyovwi mẹ o mu vwe ẹro nẹ mi ru emu buebu vwo gbe kpahe odẹ ri Jesu ri Nazarẹt na.

¹⁰Mi ru ọtiọye vwi Jerusalẹm; vwẹ ogangan rẹ irherẹn ride na vwọ kẹ vwẹ, ọ dia ihwo efuanfon na ọvo mi mu phihọ uwodi-i, ẹkẹvuọvo ọke ra vwọ teye ayen hwe me je rhọvwe phihọ.

¹¹Mi hwe ayen vwẹ ọke ejobi vwi sinagọg ejobi mi ki rhe ru ayen rere ayen phọphọ, rẹ ophu mẹ vwọ tua kpahe ayen, me da vwọ tua ayen mu vwẹ irere efa.

¹²Fikirẹ ọna kọye me vwọ yanran kpo Damaskọs irherẹn ride na ri ji vwe ayen da kẹ vwẹ ogangan.

¹³Vwẹ oghẹruvo koko, E ovie, vwẹ idjerhe me da mrẹ enu rọ nyavwaro, gala gala kerẹ ọnre, rọ bẹre mu vwe kugbe ihwo re vẹ ovwẹ gba hẹ usun.

¹⁴Rẹ avwanre ejobi vwo she teye otọ, mi de nyo urhuru rọ ta kẹ vwẹ vwẹ ephẹrẹ ri Hibru, Sọl, Sọl, die wo vwo kpokpo uvwe? Ọ miavwe owẹ ru wọ da vwẹ owo dje umwegba.

¹⁵Me da ta, Wẹ ono vwo, Ọrovwohwo? Ọrovwohwo da ta, Mẹvwẹ Jesu ru wo kpokpo na.

¹⁶Ẹkẹvuọvo gbe vrẹn mudia; kidie fiki rẹ ọnana me vwọ vwẹ oma phia kẹ wẹ, re me vwẹ owẹ mu re wọ ga vwẹ re wo re se iseri kẹ imu nana re wọ vwọ mrẹre na kugbe efa re me cha vwọ phia kẹ wẹ,

¹⁷ro che si uwe nẹ obọ rẹ ihwo na kugbe obọ rẹ ihwo ri Keferi ihwo ri mi che ji uwe bru ra.

¹⁸Wo che rhie ẹro rayen, rere ayen kurhẹriẹ nẹ ebri kpo urhukpẹ vwo nẹ ogangan rẹ Idẹbọnọ vwo bru Ọghẹnẹ, rere ayen mrẹ evwoghovwo rẹ imwemwu kugbe ẹdia vwẹ ohri rẹ ihwo rẹ esegbuyota ru fon vwẹ evun mẹ.

¹⁹Vwẹ ọtiọye na, E Ovie Agripa, mi rhe vwo udu kẹ emramrẹ rẹ odjuvwu na-a,

²⁰ẹkẹvuọvo ki mi ke ghwoghwo vwi Damaskọs, o ki rhi te Jerusalẹm ra wan orho ri Judia ejobi, kugbe otu ri Keferi rhe, rere ayen kurhẹriẹ bru Ọghẹnẹ rhe re ayen ru uruemu ro fori kẹ ekuorhẹriẹ rayen.

²¹Ki fiki rẹ ọnana ihwo ri Ju vwo shabọ phihọ ovwẹ vwẹ evun rẹ uwevwi rẹ ẹga na re vwọ guọnọ ovwẹ hwe.

²²Rhi te nonẹ na ọchuko ri mi vwori kẹ obọ rẹ Ọghẹnẹ o nurhe, kọye mi vwo mudia vwẹ etinẹ se oseri kẹ ọmọ te ọkpako, tanẹ ọ rha vrẹn emu ọfa-a vwọ nọ obo rẹ emraro na kugbe Mosis tare nẹ e cha phia;

²³nẹ Kristi na cha reoja, nẹ, ọ vwọ dia ohwo rẹsosuọ ro ke vrẹn nẹ ughwu rhe na, ko che ghwoghwo orẹmrẹ kẹ ihwo na ji kugbe otu ri Keferi.

²⁴Ọke ro vwo guẹ ẹkẹn unu rọye, Fẹstọs da van ta, Pọl, wọ mwa orhuẹ; erianriẹn wẹn rode na phi we phihọ ọrhuẹ re.

²⁵Ẹkẹvuọvo Pọl da ta, me mwa orhuẹ-ẹ, ajuwe Fẹstọs, ẹkẹvuọvo uyota na dẹn me ta.

²⁶Kidie ovie riẹn kpahe imu nana ejobi, wẹ kọye me ta kẹ gbonozẹ na; kidie o mu vwe ẹro nẹ imu nana ọvuọvo ro pho we wan herọ-ọ, kidie e ru onana vwẹ ehoho-o.

²⁷Ovie Agripa, wo se emraro na gbuyota vwẹ etiyin na? Me riẹnre nẹ wo sere gbuyota.

²⁸Agripa da ta kẹ Pọl, Vwẹ ọmọke krẹn na wo ghwe ru vwe phihọ ohwo ri Kristi!

²⁹Pọl da ta, Owenẹ ọkrẹre eyẹ o grori, mane kẹ Ọghẹnẹ rhọvwere nẹ ọ dia owẹ ọvo-o ẹkẹvuọvo ji te ayen ejobi rhe ri nyo vwe nonẹ na rhe dia kirobo re me epha na jokpa rẹ igoni nana ọvo ri nuro.

³⁰Etiyin ovie na de vrẹn, ọ vẹ osun na kugbe Benaisi kugbe ayen otu ri tidia kẹrẹ;

³¹rẹ ayen vwo si oma reyọ nu, ayen da ta kẹ ohwohwo, Ohwo nana ru emu ọvuọvo ro fo ughwu eyẹ ekanrọ-ọ.

³²Agripa da ta kẹ Fẹstọs, Mane esiobọ nẹ ohwo nana ọ dianẹ ọ kpare ẹdjọ na vwo rhe Siza-a.