Read urhobo Iruo rẹ Iyinkọn na 27 Bible Online

Iruo rẹ Iyinkọn na 27 - urhobo bible

Iruo rẹ Iyinkọn na 27

¹Ọke ra vwọ ta nẹ avwanre gbe bi kpo Itali, ayen da vwẹ Pọl vẹ ihwo efa ra kanre kẹ onotu rẹ ujori rẹ Unuofovwi rẹ Ọgọsta, re se Juliọs.

²Rẹ ayen vwọ ro okọ rẹ Adrametiọm, ro che bi nene erhuru rẹ Esha, avwanre de bi okọ vwọ hẹ abadi, Aristakọs, ohwo ri Masidonia da dia Tẹsaionaika de nene yanran.

³Ẹdẹ rivẹ avwanre de duvwu Saidọn, Juliọs da nabọ vwẹ ẹro te Pọl, ọ da vwẹ ọke kẹ nẹ ọ ra mrẹ igbeyan rọye rere ayen ghẹrẹ.

⁴Etiyin ayen de bi okọ vwọ hẹ abadi ayen de bi wan iphro ri Saiprọs, kidie odju na rhan avwanre rhivwi.

⁵Rẹ avwanre vwọ sa abadi na rọ hẹ abọ oboyi ri Silisha vi Pamfilia mu nu, avwanre de rhi te Mira vwi Laisia.

⁶Etiyin onotu rẹ ujori na da mrẹ okẹ rẹ Alekzandria ro biẹ kpo Itali, o de phi avwanre phihọ.

⁷Avwanre de bi erherha vwẹ ẹmẹdẹ evo, kẹ ẹgbẹgba avwanre rhi vwo te Nidọs, rẹ odju na rhe jẹ avwanre biẹ kpo obaro-o na, avwanre de kpuyovwi ro iphro ri Krit vwẹ abọ oboyi ri Salmonẹ.

⁸Rẹ avwanre vwọ vwẹ ogogangan biẹ nene orhotọ re, avwanre de rhi te asan re se Omamọ Erhuru, rọ kẹrẹ orere ri Lasea.

⁹Rẹ avwanre vwọ ghwọrọ ọke buebu na, yẹ ubiokọ na vọnre vẹ okpetu fikiridie ọke rẹ owẹvwe echiro na ghwiẹre, Pọl de bru ayen uche,

¹⁰tanẹ, Irivwovwe, me mrẹ vughe nẹ oma ẹwan kugbe emu buebu che ghwru vwẹ ubiokọ na, ọ dianẹ ekuakua re hẹ evun rẹ okọ na ọvo-o, ẹkẹvuọvo ji te arho rẹ avwanre rhe.

¹¹Ẹkẹvuọvo onotu rẹ ujori na da kerhọn rẹ olori rẹ okọ na kugbe ọ ro vwo okọ na vwọ nọ obo ri Pọl tare.

¹²Fiki robo rẹ erhuru na je wo phihọ vwẹ ohwahwa na-a na, ihwo buebu da vuẹ nẹ e bi ro abadi na, ọkeọvo ayen mi se bi te Foniks, erhuru ri Krit, re ayen vwo nene odju rẹ ohwahwa na.

¹³Ọke rẹ odju rẹ obọrhe ọnre vwo djuẹ phiọrọ phiọrọ re, rẹ ayen vwo roro nẹ obo rẹ ayen guọnọre te ayen obọ nure, ayen de mu ọtan phihọ okọ ayen de bi nene orhotọ, ri Krit.

¹⁴Ẹkẹvuọvo nanana ogiribo de rhi dju nẹ obo otọ rhe, re se odju rẹ ohwahwa;

¹⁵ọke ro vwo mu okọ na re udu rọye gbe sa gba odju na-a, avwanre ke fọ kẹ okọ na nẹ o gbe bo.

¹⁶Ro vwọ bo nene imiphro ọvo re se Kauda, avwanre da vwẹ ẹgbẹgba gba okọ na,

¹⁷ra vwọ rhan aphiana nu, ayen da vwe ifi si okọ na, etiyin, re oshọ vwo mu ayen nẹ okọ na chẹ muotọ, ayen da lọrọ aphiana na rhe otọ, kẹ avwanre di muẹ bo.

¹⁸Re ogiribo na vwo muẹ okọ na gangan, vwẹ ẹdẹ rivẹ kẹ ayen kpara oghwa rayen phihọ ame;

¹⁹ẹdẹ rerha ayen da kpare aphiana vẹ irhe rẹ okọ na phihọ ame.

²⁰Ọke ra rha mrẹ ọnre eyẹ isiọ vwẹ ẹdẹ buebu-u, re oma gbe rha gba ogiribo na-a, iroro rẹ avwanre vwọ rhọ de ghwe ne avwanre evun.

²¹Re ayen vwọ re emu kri re na, Pọl de mudia vwẹ ohri rẹ ayen ọ da ta, Ihwo, manẹ ovwan kerhọn mẹ ovwan e rhe bi ne Krit rhe-e, kọye soro ra cha vwọ mrẹ oma ẹwan vẹ eghwro nana.

²²Asakiephana me rẹ ovwan nẹ ovwan vwo udu; kidie ohwo ọvuọvo che ghwu nẹ ohri rẹ ovwa-an, ẹkẹvuọvo okọ na ọvo.

²³Kidie vwẹ ason nana dẹn na amakashe rẹ Ọghẹnẹ re me ga na ro ji vwovwe na de rhi mudia kẹrẹ ovwẹ,

²⁴ọ da ta, Pọl, wọ dje oshọ-ọ, wo che mudia dẹn vwẹ obaro ri Siza, gbe nighe, Ọghẹnẹ vwẹ ihwo re vẹ owẹ gbe bi ejobi vwọ kẹ wẹ.

²⁵Ọtiọye na gbe vwo udu, ihwo, kidie mi vwo esegbuyota kpahe Ọghẹnẹ nẹ ọ cha dia dẹn kirobo rọ ta kẹ vwẹ na.

²⁶Ẹkẹvuọvo odju na che mu avwanre ro ubrotọ ọvo.

²⁷Ọke rẹ ason rihwẹnẹ vwo te, re avwanre vwo bo samuẹ abadi rẹ Adria, otu ri biẹ okọ na da vwẹ omoma riẹn nẹ ayen re siẹ kẹre otọ.

²⁸Ọtiọye na ayen de mu ọtan phihọ ame o de kodo te esabọ uje, ayen rhe bi hẹ obaro emerha ayen de muo phihọ o de kodo te esabọ ihwiori.

²⁹Re oshọ vwo mu ayen nẹ okọ na che dje eragha, ayen de mu etan ẹne phihọ ame vwẹ obo eghuvwu, ke hẹrhẹ ọke ro che rhie.

³⁰Rẹ otu ri biẹ okọ na vwọ guọnọ djẹ nẹ evun rẹ okọ na, rere ayen vwọ nyẹ ẹbẹre ro kpotọ vwẹ okọ na phihọ abadi, vwẹ omeru nẹ ọtan na ayen muẹ phihọ ame,

³¹Pọl da ta kẹ olotu rẹ ujori na kugbe isodje na, Jokpa nẹ ihwo nana daji okọ na-a, ovwan cha sa rhọ-ọ

³²Etiyin isodje na de vwrẹ ufi na, okọ na de mu bo yanran.

³³Re ọke na vwo muegbe rẹ erhie, Pọl da vuẹ ayen ejobi nẹ e re eme emu, tanẹ, nonẹ ọ vwo gba ẹdẹ ihwẹne rẹ ovwan vwọ ruẹ ẹnwan wa je re emu-u, wa vwe emuọvo te unu-u.

³⁴Vwẹ ọtiọye na me rẹ ovwan nẹ wa re emu, ọ ke ovwan ogangan, kidie ogẹto rẹ uyovwi rẹ ovwan ọvuovo che ghwru-u.

³⁵Ọke rọ vwo ta ọnana nu, ọ da reyọ ikara, rọ vwo kpẹvwẹ Ọghẹnẹ vwẹ irharo rẹ ayen ejobi o de bro ọ da riọ.

³⁶Oma rẹ ayen da gan ayen da re eme emu

³⁷(Avwanre ejobi ihwo ujori ivẹ gbẹ ujorha gbe ihwe gbẹ esan re hẹ okọ na.)

³⁸Ọke rẹ ayen vwọ re evun vọn nu, ayen de mu eghwa nẹ okọ na, a da kpare ayen phiho evun rẹ abadi.

³⁹Rẹ ọke rhi vwo rhie, ayen gbi vughe otọ na-a, ẹkẹvuọvo ẹro rẹ ayen da kpo asan ro siuvun vwẹ erhuru na, kọye ayen jẹ iroro kpahe nẹ ayen che bi oko na vwara.

⁴⁰Ọtiọye na ayen da kpare etan na phihọ abadi, ayen da rhan ifi re vwo churu uvi re vwo muẹ eghuvwu na, ayen da rhan aphiana rẹ obaro na phihọ kẹ odju mu rere o mu ayen kpo erhuru na.

⁴¹Ẹkẹvuọvo rọ ghwa vwọ vwarẹ erhuru na okọ na de ghwe muotọ, ẹroro rẹ okọ na da ran mu kpoi o gbi se kpogho-o, omimi na de vwirhi eghuvwu rẹ okọ na.

⁴²Isodje na da jẹ iroro nẹ e hwe ihwo ra kanre na, eyẹ e da rhẹrhẹ wotọ ke djẹ vabọ;

⁴³ẹkẹvuọvo olotu rẹ ujori na, rọ vwo guọnọ Pọl sivwi, o gbi jẹ ayen ru obo rẹ ayen rori na-a. Ọ da ta kẹ otu re sa rhẹrhẹ nẹ ayen phọ phihọ ame rere ayen rhẹrhẹ wotọ.

⁴⁴I ri chekọ evo ro enu rẹ ephapha eyẹ ebẹre rẹ okọ na. Ke ọtiọye ayen ejobi vwọ rhẹrhẹ ruotọ.