Read urhobo Iruo rẹ Iyinkọn na 28 Bible Online

Iruo rẹ Iyinkọn na 28 - urhobo bible

Iruo rẹ Iyinkọn na 28

¹Rẹ avwanre vwọ rhẹrhẹ ruotọ nu, avwanre da riẹn nẹ Mọlta e se ubrotọ na.

²Ihwo re dia asan na de ni aruedọn rẹ avwanre gangan, kidie ayen koko erhanre kẹ avwanre dia ayen de rhe dede avwanre ejobi, fikiridie yẹ osio ra rho ekpahe ki rhe mu.

³Pọl vwo du ekru irhe o da vwẹ ayen mu erhanre na, etiyin asiweri de ne ogidi erhanre na rhe ọ da gbanọ obọ rọye.

⁴Oke re ihwo re dia asan na vwọ mrẹ ọrọdekọ na rọ gbanerọ obọ, ayen da ta kẹ ohwohwo, Ohwo nana dẹn ozighẹ o ruẹ. Dede nẹ ọ vabọ rẹ ughwu rẹ abadi na, ye obo ro ruru na che jọ rhọ-ọ.

⁵Okpuyovwi rọye ghwrara, de phorho ọrọdekọ na phihọ erhanre ye emuọvo ruro-o.

⁶Ayen ke hẹrhẹ vẹ iphiẹrohọ nẹ ọ cha vwọ eyẹ o che muẹ she kpregede ro de ghwu, ẹkẹvuọvo re ayen rha vwọ hẹrhẹ kreki jẹ emu ọvuọvo phia kẹ-ẹ, ayen de ku iroro rhẹriẹ ayen da ta nẹ ẹdjọ o ruẹ.

⁷Asakiephana otọ ọvo rọ kẹrẹ ayen vwẹ etiyin na kẹ otọ rẹ osun rẹ ubrotọ na, re se odẹ rọye Pọbliọs, ọ reyọ avwanre nu ọ ke rha ghẹrẹ avwanre gangan ẹdẹ erha soso.

⁸Da yẹ ọsẹ ri Pọbliọs na ra mwa ọga rẹ evuekuo vẹ odo, Pọl da ra mrẹ ọ da nẹ ẹrhovwo kẹ, rọ vwọ ghwẹ obọ kpahọ o de sivwo.

⁹Rẹ ọnana vwọ phia nu, ihwo re hẹ ubrotọ na re mwa ọga rhe da rhe e de sivwi ayen.

¹⁰Ayen de ru ẹse buebu kẹ avwanre, ọke rẹ avwanre che vwo bi, ayen da ghwẹ kemu kemu rẹ avwanre guọnọre phihọ okọ kẹ avwanre.

¹¹Rẹ emeranvwe erha vwọ wan nu avwanre da ro okọ ro wo phihọ ubrotọ na fiki rẹ ohwahwa na, okọ rẹ ihwo rẹ Alekzandria, ra ka oka rẹ Iniọvo Ivẹ phiho, avwanre de bi.

¹²Re vwo bi te Sirakius, avwanre da dia etiyin ẹdẹ erha.

¹³Kẹ etiyin avwanre de bi ghrẹghẹ avwanre ki rhi te Rhegiọm, rẹ ẹdẹ ọvo vwọ wan nu odju ro nẹ obuko ọnre cha de rhi dju, vwẹ ẹdẹ rivẹ avwanre de rhi te Puteọli.

¹⁴Etiyin avwanre da mrẹ imoni na, ri se avwanre nẹ avwanre vẹ ayen dia ẹdidjala ọvo. Ọtiọye na avwanre de rhi te Rom.

¹⁵Ọke rẹ imoni re hẹ etiyin, vwo nyo kpahe ẹcha rẹ avwanre, ayen da yan ugbo ro sheri te Eki rẹ Apiọs kugbe oyan rẹ uwevwi rẹ Erhorha won phihọ rhe vwa avwanre. Rọ vwọ mrẹ ayen Pọl da kpẹvwẹ Ọghẹnẹ udu rọye da ga.

¹⁶Ọke rẹ avwanre rhi vwo te Rom, a da rhovwe kẹ Pọl nẹ ọ dia asan obọ roye san, ọ vẹ isodje re rhẹrẹ.

¹⁷Rẹ ẹdẹ erha vwo wan nu o de se ekpako rẹ ihwo ri Ju re hẹ etiyin koko, re ayen vwo koko re, ọ da ta kẹ ayen, Imoni, dede nẹ mi ru emuọvo kpahe ihwo na eyẹ uruemu rẹ esẹ rẹ avwanre-e na, yẹ e mu vwe kanre nẹ Jerusalẹm rhe rhi phihọ abọ rẹ ihwo ri Rom.

¹⁸Re ayen vwọ guọnọ otọ rẹ ota na vwẹ obọ mẹ, ayen da guọnọ siobọ nẹ uvwe, fikiridie orhiẹn rẹ ughwu re bruhwe vwe na vwo otọ-ọ.

¹⁹Ẹkẹvuọvo ọke rẹ ihwo ri Ju na vwo sen, koye gba vwẹ vwo mu ẹdjọ mẹ vwo rhe Siza — dede na yi mi vwo urhi ri mi vwo mu ẹgborho mẹ-ẹ.

²⁰Fiki rẹ ọnana kọye mẹ vwọ guọnọ ovwan mrẹ re me vwọ nẹ iyenrẹ kẹ ovwan, rọ vwo dianẹ fiki rẹ iphiẹrohọ rẹ Izrẹl a vwọ vwẹ igoni kanre ovwẹ na.

²¹Ayen da ta kẹ, Avwanre je mrẹ ọbe re si nẹ Judia rhe kpahe ọwe-e, imoni na ọvuọvo re rhe obonẹ je nẹ iyẹnrẹ ẹye ta ota ọbrabra kpahe owẹ-ẹ.

²²Ẹkẹvuọvo avwanre guọnọ nyo mie we obo ru wo rori, kidie vwọ kpahe ota rẹ ẹko na asan ejobi ọye a da ta ota kpahọ.

²³Ọke rẹ ayen vwo bru ẹdẹ kẹ nu, ayen buebu de bro rhe asan ro wori. Ọ da nabọ rhie ota na phihọ kẹ ayen nẹ irhiọke re te ovwọnvwọn, ro se oseri rẹ uvie rẹ Ọghẹnẹ na rere o vwo dje Jesu kẹ ayen nẹ evun rẹ urhi ri Mosis na kugbe emraro na rere o vwo mu ayen ẹro.

²⁴Obo rọ tare na de mu otu evo ẹro, yẹ evo phra.

²⁵Ọtiọye na, rẹ ọsẹghẹ vwọ hẹ ohri rẹ ayen re, ayen de kpo, vwẹ ọke ri Pọl vwọ ta ota nana nẹ: Erhi Ọfuanfon na riẹn ta rọ vwọ ta kẹ esẹ rẹ ovwan vwẹ unu rẹ Aizaya ọmraro na:

²⁶Yanran bru ihwo nana, re wọ ta, Ovwan che ghine nyo yọ cha rọ ovwa-an, ovwan cha mrẹ orẹ yu we che vughe-e.

²⁷Kidie udu rẹ ihwo nana djeri, erhọn rayen e họhọhọ kẹ eme-enyo, ẹro rayen rhurhuru, ayen da vwẹ ẹro rayen vughe, ayen da vwẹ erhọn rayen nyo ẹme, rẹ udu rayen de vwo ẹruọ, i de kurhẹriẹ mi de sivwi ayen.

²⁸Gbe jẹn ovwan riẹn ọnana nẹ esivwo rẹ Ọghẹnẹ na e vwiro rhe otu ri Keferi nure, ayen cha kerhọn.

²⁹Ọke rọ vwọ ta eta nana nu, ihwo ri Ju na de kpo, aphro rode da hẹ ohri rẹ ayen.

³⁰O dia etiyin ikpe ivẹ soso ọye ọvo re ghẹrẹ oma rọye, ọ de dede ayen otu ri bruro rhe ejobi.

³¹O ghwoghwo uvie rẹ Ọghẹnẹ yo yono kpahe Ọrovwohwo Jesu Kristi phẹnphẹn a gbarọ-ọ.