Read urhobo Iruo rẹ Iyinkọn na 3 Bible Online

Iruo rẹ Iyinkọn na 3 - urhobo bible

Iruo rẹ Iyinkọn na 3

¹Ọke ọvo ri Pita vẹ Jọn vwọ yanran kpo uwevwi rẹ ẹga na vwẹ ọke rẹ ẹrhovwo, vwẹ unọke rirhiri na.

²Ọshare ọvo rọ dia okpono nẹ evun rhe re muẹ kẹdẹ kẹdẹ kpo Anurhoro rẹ uwevwi rẹ ẹga na re se nẹ Erhuvwu, etiyin kọye ọ da yara emu mie ihwo re ruẹ uwevwi rẹ ẹga na.

³Ọ vwọ mrẹ Pita vẹ Jọn re yanran kpo uwevwi rẹ ẹga na ọ da yare emu mie ayen.

⁴Pita vẹ Jọn vwọ tẹrovio ayen da ta kẹ nẹ, Ni avwanre.

⁵Rọ vwọ tẹrovi ayen, ko roro vwẹ evun rọye nẹ ayen che ru ẹse kẹ.

⁶Ẹkẹvuọvo Pita da ta nẹ, idọnọ efuanfon vẹ iro mi vwori-i, ẹkẹvuọvo me kẹ wẹ emu mi vwori; vwẹ odẹ ri Jesu Kristi ri Nazarẹt, yan.

⁷Ọ da yọnrọn obọrhe rọye ọ da kparọ vrẹn, siẹvuọvo na iwurho rẹ awọ rọye da ghwa gan.

⁸Ro vwo pho kpenu o de mudia ọ da yan ọ vẹ ayen da ro evun rẹ uwevwi rẹ ẹga na. Ọ yan O pho O jiri Ọghẹnẹ.

⁹Ihwo na ejobi re mrẹrẹ rọ vwọ yan jiri Ọghẹnẹ,

¹⁰de vughe nẹ ọye ohwo ọvo ro tidia, yare emu vwẹ Anurhoro rẹ Erhuvwu rẹ uwevwi rẹ ẹga na; obo re phia kẹ na de gbe ayen unu o de ji mu ayen oshọ gangan.

¹¹Ọke rọ vwọ gbanọ Pita vẹ Jọn, vwẹ asan re se ọmọgua ri Solomọn, o de gbe ihwo na ejobi re djẹ rhi koko etiyin na unu.

¹²Ọke rẹ Pita vwọ mrẹ ayen ọ da ta kẹ ayen, “Ihwo rẹ Izrẹl, die sorọ re emu nana vwo gbe ovwan unu, eyẹrẹ die nẹrhẹ ovwan vwọ tẹro viẹ avwanre kerẹsiẹ ra mrẹ nẹ ogangan eyẹrẹ ẹfuọn rẹ avwanre nerhẹ ohwo nana sa yan?

¹³Ọghẹnẹ rẹ Ebraham kugbe ọrẹ Aizik kugbe ọrẹ Jekọp, Ọghẹnẹ rẹ esẹ rẹ avwanre na, vwẹ urinrin kẹ odibo rọye Jesu, ọ rẹ ovwan senre re mu kpo obaro ri Pailet, vwẹ ọke rọ vwọ ta nẹ ọye siobọ no.

¹⁴Ẹkẹvuọvo ovwan da siẹn Ọvwata Ọvuọvo na ro Fonro na, ovwan da nọ ekpẹn rẹ ozighẹ rere e siobọ no kẹ ovwan.

¹⁵Ovwan de hwe ọ ro vwo arhọ, ohwo rẹ Ọghẹnẹ kpare vrẹn nẹ ughwu na. Ọna avwanre hẹ iseri rọye na.

¹⁶Vwẹ odẹ rọye kugbe esegbuyota vwọ kpahe odẹ rọye na, ọye ru ohwo nana rẹ ovwan mrẹre na rẹ ovwan je riẹn na gan. Esegbuyota rọ wan oma ri Jesu rhe na ọye kẹ ohwo nana oma ọkpokpọ vwẹ irharo rẹ ovwan ejobi na.

¹⁷Asakiephana imoni, Me riẹnre nẹ fiki rẹ ijẹriẹn ovwan vwo ru emu nana, kirobo rẹ isun rẹ ovwan ji ru rhe.

¹⁸Ẹkẹvuọvo obo rẹ Ọghẹnẹ wan unu rẹ emraro na ejobi ta phihọ otọ jovwo nẹ Kristi rọye cah re oja na, ọye ọ ru gba na.

¹⁹Ovwan gbe kurhẹriẹ rere ephoro imwemwu rẹ ovwan nu, rere omamọ rẹ eyere rẹ arhọ na vwo nẹ obọ rẹ Ọrovwohwo na bru ovwan rhe.

²⁰Rere o vwo ji Jesu Kristi re vwo mu na vwo rhe ovwan.

²¹Ohwo rẹ odjuvwu cha reyọ bẹsiẹ re vwo ru emu na ejobi gba rẹ Ọghẹnẹ wan unu rẹ emraro rẹ efuanfon rọye ta rhabae na gba.

²²Mosis da ta, Ọrovwohwo Ọghẹnẹ na cha vwẹ ọmraro ọvo vwo muẹ kẹ ovwan vwẹ ohri rẹ imoni rẹ ovwan na kirobo rọ vwo vwẹ mu na. Ovwan ke cha kerhọn ri kemu kemu rọ cha ta kẹ ovwan.

²³Kọ cha dia nẹ ohwo kohwo rọ kerhọn rẹ omraro yena-a ka guọghọ kufia nẹ ohri rẹ ihwo na.

²⁴Ọtiọye na emraro na ejobi ghwoghwiro, nẹ ọke ri Samuẹl rhe rhiri re te ọke rẹ emraro rẹ ukuko na, aroẹmrẹ ọvuọvo na ọye ayen ejobi mrẹre kpahe ẹdẹ nana.

²⁵Ovwan ke emọ rẹ emraro na vwẹ oma rẹ ọphọ na rẹ Ọghẹnẹ vẹ esẹ rẹ ovwan rere, rọ vwọ ta kẹ Ebraham nẹ, Uvwiẹ wẹn kọye cha nẹrhẹ Uvwiẹ rẹ akpọ na ejobi vwo ebruphihọ.

²⁶Ọke rẹ Ọghẹnẹ vwọ kpare odibo rọye na vrẹn nu, o de ke jo bro ovwan rhe, ọ da kẹ ovwan ebruphihọ rere ovwan ohwo ọvuọvo vwo kurhẹriẹ nẹ imwemwu rẹ ovwan.