Read urhobo Iruo rẹ Iyinkọn na 4 Bible Online

Iruo rẹ Iyinkọn na 4 - urhobo bible

Iruo rẹ Iyinkọn na 4

¹Rẹ ayen vwọ ta eta na kẹ ihwo na, etiyin irherẹn na kugbe inotu rẹ uwevwi rẹ ẹga na kugbe Sadiusi na de bro ayen rhe,

²ophu de mu ayen fikiridie ihwo na ghwoghwo Jesu ro vrẹn nẹ ughwu na.

³Etiyin ayen de mu ayen phihọ uwodi bẹsiẹ rẹ ọke vwo rhie, kidie ọke na kpo ovwọnvwọn re.

⁴Ẹkẹvuọvo ihwo buebu ri nyo ota na de segbuyota; unu rẹ ihwo uriorin iyorin.

⁵Vwẹ irhiọke isun rayen kugbe ekpako na kugbe isiẹbe na de rhi koko vwi Jerusalẹm,

⁶vẹ Annas orherẹn rode na kugbe Kafas kugbe Jọn kugbe Alẹzanda kugbe ekru rẹ orherẹn rode na ejobi.

⁷Ọke rẹ ayen vwo mu ayen phihọ uherevie, ayen da nọ ayen, Ogangan rẹ ono eyẹ odẹ rẹ ono ovwan vwo ru ọnana?

⁸Etiyin Pita rẹ Erhi Ọfuanfon vọn oma na, da ta kẹ ayen, Isun rẹ ihwo na kugbe ekpako,

⁹ọ da dianẹ fiki rẹ emu esiri re ruru kẹ okpono nana nonẹ na, kọye ovwan vwọ nọ avwanre orhiẹn rẹ obo re nẹrhẹ oma rẹ oshare nana gan,

¹⁰ovwan gba riẹn ọnana ihwo rẹ Izrẹl ejobi, nẹ odẹ ri Jesu Kristi ri Nazarẹt, rẹ ovwan kanre mu agbagba, rẹ Ọghẹnẹ rhọvwọ nẹ ughwu na, ọye nẹrhẹ e sivwi ọshare nana ro mudia vwẹ obaro rẹ ovwan na.

¹¹Ọnana olalọ rẹ ovwan ebọuwevwi na senre kọye rhoma rhe dia ọrovwuyovwi vwẹ ubienyẹ.

¹²Esivwo rha hẹ oma rẹ ohwo ofa-a, kidie odẹ ọfa rha hẹ otọ rẹ odjuvwu re mu kẹ ihwo ro se sivwi avwanre-e.

¹³Asakiephana rẹ ayen vwọ mrẹ udu ri Pita kugbe Jọn, rẹ ayen ke rha mrẹ vughe nẹ e yono aye-en, nẹ ayen ihwo ghevweghe, o de gbe ayen unu; ayen da mrẹ vughe nẹ ayen vi Jesu gba dia jovwo.

¹⁴Ẹkẹvuọvo rẹ ayen rha mrẹ emuọvọ ta-a fiki rẹ ohwo re sivwiri na ro mudia kẹrẹ ayen na,

¹⁵isun na djẹ ayen nẹ ẹguare na ro otafe, ayen da ra jẹ iroro kugbe,

¹⁶ta ne, Kidie avwanre che ru ihwo nana? Kidie nẹ okpoka rode wan oma rẹ ihwo nana phia kẹ ihwo ri Jerusalẹm ejobi mrẹ, ọ dia obo ra phro-o.

¹⁷Ẹkẹvuọvo rere o vwo jẹ hrabọ ro ohri rẹ ihwo na, e jẹn avwanre kpokpa phihọ ayen obọ nẹ ayen gbe ta ota na ọfa kẹ ohwo ọvuọvo vwẹ odẹ nana-a.

¹⁸Etiyin ayen de se ayen ayen de ji urhi kẹ ayen nẹ ayen rha vwẹ odẹ ri Jesu ta ota eyẹ yono kakaka vwẹ odẹ ri Jesu-u.

¹⁹Ẹkẹvuọvo Pita kugbe Jọn da kpahe kẹ ayen, o de fo vwẹ obaro rẹ Ọghẹnẹ ra vwo kerhọn rẹ ovwan jẹ Ọghẹnẹ vwo, ovwan ọvo gbe brorhiẹ nana.

²⁰Kidie obo rẹ avwanre mrẹre kugbe ọ rẹ nyori na o vwo ọke re vwọ jẹ ayen ẹta-a.

²¹Rẹ ayen vwọ rhoma guegue ayen nu, ayen de siobọ nẹ ayen kpo, ayen mrẹ idjerhe rẹ vwo hwe aye-en, fiki rẹ ihwo na; kidie ihwo na ejobi jiri Ọghẹnẹ fiki rẹ obo re phiare na.

²²Kidie ohwo na re sivwiri na ọkpako vrẹ ohwo rẹ ukpe ujuvẹ re.

²³Ọke re vwo siobọ nẹ ayen nu ayen da yanran bru igbeyan rẹ ayen re gbe ikun rẹ obo rẹ irherẹn ride na kugbe ekpako na ta kẹ ayen.

²⁴Rẹ ayen vwo nyo nure, ayen de ku urhuru gbe ọvo kperi se Ọghẹnẹ nẹ, Ọrovwohwo Ovie, ọ rọ ma odjuvwu na kugbe akpọ na kugbe abadi na kugbe emu kemu ejobi re hẹ evun rẹ ayen,

²⁵ọ rọ unu ri Devid ọsẹ rẹ avwanre, odibo wẹn, rọ wan oma rẹ Erhi Ọfuanfon vwọ ta ota nẹ, Die nẹrhẹ Egedjọ na do, ihwo na de roro iroro fefe?

²⁶Iviẹ rẹ akpọ na ghwẹ oma rẹ ayen koko vwọ suọ, isun rẹ akpọ na si koko, vwọ so Ọrovwohwo kugbe ọ rọ vwẹ evwri ghworo na.

²⁷Ghinẹ nyota vwẹ orere nana ayen de sioma koko vwọ so odibo wẹn ọfuanfon na Jesu, ru wọ vwẹ evwri ghworo na, ri Herọd kugbe Pọntiọs Pailet, vẹ Keferi na kugbe ihwo rẹ Izrẹl,

²⁸de ru kemu kemu rẹ obọ wẹn kugbe iroro wẹn jẹ phihọ otọ rhahae rhe.

²⁹Asakiephana Ọrovwohwo, gbe ni eguegue rayen, rere wọ kẹ idibo wẹn aroeyivwo vwo ghwoghwo ota na,

³⁰rere wọ riẹn obọ wẹn vwo sivwi, rere eka vẹ igbunu vwọ wan odẹ rẹ odibo ọfuanfon wẹn Jesu phia.

³¹Ọke rẹ ayen vwọ nẹ ẹrhovwo nu, asan rẹ ayen de koko na de mu kpogho; Erhi Ọfuanfon na da ro ayen ejobi oma ayen de ghwoghwo ota rẹ Ọghẹnẹ na vẹ aroeyivwo.

³²Ọke nana ayen otu ri segbuyota na de vwo udu ọvo kugbe iroro ọvo, ohwo ọvuọvo rọ tanẹ obo rẹ ọye vwori na kẹ ọ rọye ọvo herọ-ọ, ẹkẹviọvo ayen de vwo kemu kemu kugbe.

³³Otu rẹ iyinkọn na de se oseri rẹ evrẹnnshi rẹ Ọrovwohwo Jesu na vẹ ogangan rode, a da vwẹ ẹserọphẹ rode na vwọ kẹ ayen ejobi.

³⁴Ọ rhe vwo ohwo rẹ emu ọvuọvo kanre vwẹ ohri rẹ ayen na-a, kidie otu rẹ ayen buebu ri vwo otọ eyẹ iwevwi da shẹ ayen, ayen da ghwẹ obo rẹ ayen shẹre na ejobi rhe.

³⁵Ayen da ghwẹ ayen phihọ awọ rẹ iyinkọn na; a da gharọ kẹ ohwo ọvuọvo rẹ emu kanre.

³⁶Kẹ enẹ Josẹf je shẹ otọ rọye ohwo rẹ iyinkọn na mu odẹ kẹ nẹ Banabas (otọ rọye, Ọmọ rẹ obruche) ohwo ri Livae, ohwo ri Saiprọs,

³⁷ọ da ghwẹ igho rẹ otọ na rhe awọ rẹ iyinkọn na.