Read urhobo Iruo rẹ Iyinkọn na 5 Bible Online

Iruo rẹ Iyinkọn na 5 - urhobo bible

Iruo rẹ Iyinkọn na 5

¹Ẹkẹvuọvo ọshare ọvo re se odẹ rọye Ananayas vẹ aye rọye Safira da shẹ otọ ovọ,

²ọ vẹ aye rọye jẹ iroro kugbe ayen de si ubro rẹ igho rẹ emu rẹ ayen shere na nu, ayen da reyọ ubro ọvo rhe rhi phihọ awọ rẹ iyinkọn na.

³Ẹkẹvuọvo Pita da ta Ananayas die nẹrhẹ idẹbono vọn udu wẹn wọ vwọ vwọron ofian kẹ Erhi Ọfuanfon rọ nẹrhẹ owẹ si ubro rẹ igho rẹ otọ na nu?

⁴Ọke ra je shẹ otọ na-a, ọ dianẹ wẹ ri vworo? Ọke ra rha vwọ shẹ nu na, ọ je dia obọ wẹn ọ epha? Die jabọ wo vwo roro emu nana vwẹ udu wẹn? Ẹkẹvuọvo Ọghẹnẹ wọ vwọron ofian kẹ na ọ dia ihwo rẹ akpọ-ọ.

⁵Ọke rẹ Ananayas vwo nyo eta nana nu, o de she teye otọ o de ghwu. Oshọ rode na de mu ihwo na ejobi ri nyoro.

⁶Imighene na da rhe pharọ ayen de muo ro otafe re shi.

⁷Kerẹ uvwre rẹ unọke erha aye rọye da rhe, yẹ ọ je riẹn emu rọ phiare na-a.

⁸Pita da ta kẹ aye na nẹ, Ta kẹ vwẹ sẹ ovwan shẹ otọ na vrẹn unu nana-a. Aye na da ta nẹ, E, ọtiọye a shẹrẹ.

⁹Ẹkẹvuọvo ọ da ta kẹ aye na nẹ. Die nẹrhẹ ovwan ro ẹguare kugbe vwọ davwe Erhi rẹ Ọrovwohwo ni? Kerhọn rẹ ichiyi rẹ ihwo ri shi ọshare wẹn vwẹ anurhoro na, ayen je cha ghwa wẹ yanran.

¹⁰Siẹvuọvo aye na de she teye otọ vwẹ asan awọ rọye o de ghwu. Ọke rẹ imighene na rhe vwọ mrẹ nẹ aye na ghwuru, etiyin ayen de muo re shi kẹrẹ ọshare rọye.

¹¹Oshọ rode na de mu ishọshi na ejobi kugbe ihwo ri nyo emu nana ejobi.

¹²Ọke nana otu rẹ iyinkọn na de ru emu rẹ eka vẹ igbunu buebu kẹ ihwo na mrẹ. Ayen ejobi de koko vwẹ Ọguan ri Solomọn.

¹³Ihwo ri chekọ na yivwi kuoma gbe ayeen, ẹkẹvuọvo ihwo na de mu ọghọ rode kẹ ayen.

¹⁴Ihwo buebu efa nọ i ri jovwo ri segbuyota na da rhe vwẹ oma ba Ọrovwohwo, urogho rẹ eshare te eya,

¹⁵ọtiọye na ayen ke tobọ mu ihwo rẹ oma da na phihọ ọsuada, e de mu ayen phihọ ehwa kugbe eruẹ rere ọke rẹ Pita da wan vrẹn uhoho rọye vwo she teyọ evo oma.

¹⁶Ihwo na de mu otu rẹ oma da na vẹ otu rẹ irhi rẹ idẹbono lagha nẹ orho re riariẹ Jerusalẹm rhe, etiyin e de sivwi ayen ejobi.

¹⁷Ẹkẹvuọvo orherẹn rode na vẹ otu rọye, rẹ ukoko rẹ Sadiusi, de vrẹn, ayen vọnre vẹ ophu vẹ omaẹriọ.

¹⁸Ayen de mu otu rẹ iyinkọn na phihọ vwodi ghevweghe.

¹⁹Ẹkẹvuọvo ọke rẹ ason amakashe rẹ Ọrovwohwo de rhie ẹchẹ rẹ uwodi na phihọ ọ da reyọ ayen rhe otafe ọ da ta nẹ,

²⁰Ovwan yanran re mudia phihọ evun rẹ uwevwi rẹ ẹga na rere ovwan re ghwoghwo ota rẹ Arhọ na kẹ ihwo ejobi.

²¹Ayen vwo nyo ọnana nu, ayen da ro evun rẹ uwevwi rẹ ẹga na vwẹ urhiọke ride re yono. Ọke nana orherẹn rode na vẹ otu rọye de se ediaguare kugbe Ediọn rẹ Izrẹl ejobi koko, ayen de ji ikọn kpo obo uwodi na ra reyọ ayan rhe.

²²Ẹkẹvuọvo ọke rẹ inotu na vwo te etiyin, ayen gbe mrẹ ayen vwẹ uwodi na-a, ayen de rhivwi rhe rhe nẹ iyẹnrẹ.

²³Avwanre mrẹ uwodi na ra nabọ kanre yẹ otu rẹ ohẹrhẹ na nabọ mudia anurhoro, ẹkẹvuọvo avwanre vwo rhiẹ echẹ na avwanre rha mrẹ ohwo ọvuọvo vwẹ evun rọye-e.

²⁴Ọke rẹ onotu rẹ uwevwi rẹ ẹga na kugbe irherẹn ride na vwo nyo eta nana nu, iroro rẹ ayen da rhe tagha vwẹ oma rẹ ayen, vẹ igbevwunu rẹ obo re cha phia.

²⁵Ohwo ọvo da rhe ta ke ayen nẹ, Ihwo rẹ ovwan mu phihọ uwodi na i mudia vwẹ evun rẹ uwevwi rẹ ẹga na ri yono ihwo.

²⁶Etiyin onotu na vẹ iruiruo na da ra reyọ ayen rhe dẹndẹn, vẹ oshọ rẹ ihwo na de rhe phi ayen hwe.

²⁷Ọke rẹ a vwọ reyọ ayen rhe nu, a da vwẹ ayen mudia obaro rẹ ẹguare na. Orherẹn rode na da nọ ayen orhiẹ,

²⁸tanẹ, Avwanre ji urhi kẹ ovwan gangan nẹ ovwan vwẹ odẹ nana yono ihwo-o, dede na yẹ ovwan rhoma hrabọ ro Jerusalẹm yono ihwo rere avwanre vwọ re abe rẹ ọbara rẹ ohwo nana.

²⁹Ẹkẹvuọvo Pita kugbe otu rẹ iyinkọn na da kpahe nẹ, Avwanre se mu ọghọ kẹ Ọghẹnẹ nọ ihwo rẹ akpọ.

³⁰Ọghẹnẹ rẹ esẹ rẹ avwanre kpare Jesu vrẹn ohwo rẹ ovwan kanre mu urhe hwe.

³¹Ọghẹnẹ da kparo kpenu phihọ obọrhe rọye rere ọ dia Osun kugbe Osivwi, vwọ kẹ Izrẹl fiki rẹ ekuorhẹriẹ kugbe evwoghovwo rẹ imwemwu.

³²Avwanre kẹ iseri rẹ emu nana ejobi, ọtiọye je hẹ Erhi Ọfuanfon na rẹ Ọghẹnẹ vwọ kẹ ayen otu ri mu ọghọ kẹ.

³³Ọke rẹ ayen vwo nyo ọnana ophu de mu ayen gangan ayen da guọnọ ayen hwe.

³⁴Ẹkẹvuọvo Farisi ọvo vwẹ evun rẹ ẹguare na re se odẹ rọye Gamaliẹl, o yono rẹ urhi na, rẹ ihwo na ejobi mu ọghọ kẹ, ro vwo mudia ọ da ta nẹ a vwẹ ihwo na phihọ otafe tavwe.

³⁵Ọ da ta kẹ ayen nẹ, Ihwo rẹ Izrẹl, wa jomaotọ kpahe emu rẹ ovwan guọnọ ihwo nana ruẹ na.

³⁶Kidie rhi te ọke rọ wanre na, Tiudas de mu, ro se oma rọye ohwo ọvo, ihwo buebu, ri te ujori ẹne, de kuoma gbe; ẹkẹvuọvo a da teyọ hwe ihwo ri nenire ejobi da hrabọ ukoko na de rhi hirhe phihọ odiodi.

³⁷Rẹ ona vwọ no nu Judas ohwo ri Galili de mu vwẹ ọke re vwo kere ihwo o de se ihwo buebu ba oma; o ji ghwu rhe, ihwo ro se ba oma na ejobi da hrabọ.

³⁸Ọtiọye vwẹ ọnana rọ hẹ otọ na me ta kẹ ovwan nẹ, ovwan yan jẹ ayen vwo; kidie iroro nana eyẹ iruo nana da dia ọ rẹ ihwo rẹ akpọ, o che she.

³⁹Ẹkẹvuọvo ọ da dianẹ obọ rẹ Ọghẹnẹ o nurhe, ovwan che se gere ayen she-e. Ọghẹnẹ kọye ekpuyovwi rẹ ovwan che muẹ kpaha na.

⁴⁰Ayen da reyọ uchebro rọye, rẹ ayen vwo se otu rẹ iyinkọn na rhe uwevwi nu, ayen da fa ayen e de ji urhi kẹ ayen nẹ ayen gbi se odẹ ri Jesu-u, e de siobọ nẹ ayen kpo.

⁴¹Etiyin ayen de vrẹn nẹ ẹguare na, re ghọghọ fiki robo re vwo kere ayen phihọ ihwo re reoja rẹ ophọphọvwe fiki rẹ Odẹ na.

⁴²Kẹdẹ kẹdẹ unu rayen gbe ka-a rẹ ayen vwo yono ihwo vwẹ evun rẹ uwevwi rẹ ega na kugbe nẹ uwevwi kpo uwevwi vwo ghwoghwo nẹ Jesu ọye hẹ Kristi na.