Read urhobo Iruo rẹ Iyinkọn na 6 Bible Online

Iruo rẹ Iyinkọn na 6 - urhobo bible

Iruo rẹ Iyinkọn na 6

¹Asakiephana rẹ idibo na vwo buẹ phihọ re, etiyin omaẹfẹnẹ da hẹ ohri ri Ju re jẹ Grik kugbe ihwo ri Hibru, ayen ki guẹ ihwo ri Hibru na ẹdjọuyovwi fiki rẹ eyauku rayen ra ghara emuọre gbọ kẹdẹ kẹdẹ.

²Ihwivẹ na de se idibo na ẹguare e da ta, o rhe fo ra vwọ gharẹ emuọre jẹ eghwoghwo rẹ Ota rẹ Ọghẹnẹ vwo-o.

³Eriyin na imoni, ovwan sanọ ihwo vwẹ ohri rẹ ovwan na, emamọ rẹ eshare ighwrẹ, ri vwo Erhi na kugbe ọhọ rere a vwẹ ayen mu phihọ iruo nana.

⁴Rere avwanre ruiruo rẹ ẹrhovwo kugbe eghwoghwo rẹ ota na.

⁵Ota na rẹ ayen tare na da vwerhe ihwo na ejobi evun, etiyin ayen da jẹ Stivin, ohwo rọ vọnre vẹ esegbuyota kugbe Erhi Ọfuanfon, kugbe Filip, kugbe Prokorọs, kugbe Nikanọ, kugbe Tamọni, kugbe Pamenas, kugbe Nikolas, ohwo rẹ Antiọk ro kurhẹriẹ.

⁶Ayen da vwẹ ihwo na rhe obaro rẹ iyinkọn na, ayen da nẹ ẹrhovwo ghwẹ abọ rayen kpahe ihwo na.

⁷Ota rẹ Ọghẹnẹ na da hẹre phihọ, unu rẹ idibo na de rhi buphihọ vwi Jerusalẹm, irherẹn na buebu da rhọvwe esegbuyota na.

⁸Ri Stivin, rhe vwọ vọn vẹ ẹserọphẹ vẹ ogangan, o de ruiruo rẹ eka kugbe igbunu ride vwẹ ohri rẹ ihwo na.

⁹Ẹkẹvuọvo otu evo rẹ sinegọg rẹ Egbomọphẹ (kerẹ odẹ re mu kẹ), kugbe ihwo rẹ Saerini, kugbe Alẹzanda, kugbe ayen otu ri nẹ Silisha vẹ Esha rhe, ayen de rhi nene Stivin phraphro.

¹⁰Ẹkẹvuọvo udu rẹ ayen sa gba aghwanre kugbe Erhi rọ vwọ ta ota na-a.

¹¹Etiyin ayen da bẹdẹ riẹriẹ ihwo evo kpahọ re ta nẹ, Avwanre nyoro rọ vwọ ta ota rẹ ophọphọvwe kpahe Mosis kugbe Ọghẹnẹ.

¹²Eriyin na ayen da kpare ophu rẹ ihwo na kugbe ekpako na kugbe isiẹbe na, ayen de shabọ phihọ ayen de muo rhe ẹguare,

¹³ayen de se iseri rẹ efian hwe nẹ, kọke kọke ọye ohwo nana vwọ ta eta kpahe asan ọfuanfon nana kugbe urhi na.

¹⁴Kidie avwanre nyori rọ vwọ ta nẹ, Jesu ri Nazarẹt na cha guọghọ asan nana, o mi rhe wene uruemu ri Mosis vwọ kẹ avwanre na.

¹⁵Ọke rẹ ihwo na ejobi ri tidia ẹguare na vwọ tẹrovio, ayen ejobi ri tidia ẹguare na da mrẹ opharo rọye kerẹ opharo rẹ amakashe.