Read urhobo Iruo rẹ Iyinkọn na 8 Bible Online

Iruo rẹ Iyinkọn na 8 - urhobo bible

Iruo rẹ Iyinkọn na 8

¹Sọl je rhọvwe phihọ ughwu rọye na. Vwẹ ẹdẹ yena ukpokpogho rode da rhe dia kẹ ishọshi na vwi Jerusalẹm; ayen ejobi da hra ro otọ ri Judia kugbe Sameria, jokpa rẹ iyinkọn na ọvo yi nuro.

²Ihwo ri vwo erhi rẹ egagọ de mu Stivin re shi, ayen da nabọ vwere uvweri rode kẹ.

³Ẹkẹvuọvo Sọl de phi ohra phihọ ishọshi na, kọ yan ro evun rẹ uwevwi kuwevwi, re mu eshare kugbe eya o mi mu ayen phihọ uwodi.

⁴Ọke nana ihwo re hrabọ na da yanran kpo asan kasan re ghwoghwo ota na.

⁵Filip da yanran kpo orere ri Sameria, o de gbe ikun ri Kristi na kẹ ayen.

⁶Otu buebu da kerhọn rẹ obo ri Filip tare, ọke rẹ ayen vwo nyo je mrẹ eka buebu ro ruru.

⁷Kidie irhi ri jẹfuọn na de vrẹn nẹ omarẹ otu buebu, ayen de kperi phia; etiyin e de sivwi ihwo buebu ri ghwoma kugbe ikpono.

⁸Ọtiọye na orere na da rhe vọn vẹ aghọghọ rode.

⁹Ẹkẹvuọvo ọshare ọvo herọ re se ọde rọye Saimọn ohwo ro ruẹ egbẹlẹkẹ vwẹ orere na ro guegue egborho ri Sameria rọ tanẹ ọye ohwo rode.

¹⁰Ayen ejobi ke kerhọn rọye, te ohwo otete te ohwo rode, tanẹ, ohwo nana hẹ ogangan rẹ Ọghẹnẹ yena re se ọrode.

¹¹Ayen da kerhọn rọye, fikiridie ọke grogro re ọye ọ vwẹ egbẹlẹkẹ guegue ayen.

¹²Ẹkẹvuọvo ọke rẹ ayen vwo se Filip gbuyota ro vwo ghwoghwo iyẹnrẹ esiri rẹ uvie rẹ Ọghẹnẹ kugbe odẹ ri Jesu Kristi, a da vwe ame kẹ ayen, te eshare te eya.

¹³Ekpuyovwi ri Saimọn dede ji segbuyota, rọ vwọ reyọ ame nu, ko nene Filip kọke kọke. Oshọ de muo gangan rọ vwọ mrẹ eka vẹ emu rẹ igbunu ri Filip ruru.

¹⁴Ọke rẹ iyinkọn re hẹ Jerusalẹm vwo nyo nẹ ihwo ri Sameria reyọ ota rẹ Ọghẹnẹ na re, ayen de ji Pita kugbe Jọn ra,

¹⁵ayen da ra nẹ ẹrhovwo kẹ ayen rere ayen vwo Erhi Ọfuanfon na;

¹⁶kidie o ji she mu aye-en, a de vwẹ ame kẹ ayen vwẹ odẹ rẹ Ọrovwohwo Jesu vwobọ.

¹⁷Etiyin ayen da ghwẹ abọ rayen kpahe ayen, ayen da reyọ Erhi Ọfuanfon na.

¹⁸Asakiephana ri Saimọn vwọ mrẹ nẹ fiki rẹ obọ ẹghwẹ kpahọ rẹ iyinkọn na nẹrhẹ a vwẹ Erhi Ọfuanfon na kẹ ihwo na, ọ da vwẹ igho kẹ ayen,

¹⁹ta nẹ, Je kẹ vwẹ ogangan nana rhe, rere kohwo kohwo re me ghwẹ abọ mẹ kpahe vwo se vwo Erhi Ọfuanfon na,

²⁰Ẹkẹvuọvo Pita da ta kẹ, Te owẹ vẹ idọnọ efuanfon wẹn ghwọrọ kufia, fikiridie wo rori nẹ wọ sa vwẹ igho de okẹ rẹ Ọghẹnẹ!

²¹Wo vwo obọ eyẹ ẹkẹn vwẹ ota nana-a, kidie udu wẹn vẹ Ọghẹnẹ shephihọ-ọ.

²²Kurhẹrie nẹ umwemwu wẹn nana, rere wọ rẹ Ọrovwohwo na, siẹvo vwobọ a cha vwẹ iroro rẹ udu wẹn na vwo ghovwo uwe.

²³Kidie me mrẹre nẹ wọ hẹ evun rẹ ame ro muenu kugbe evun rẹ ọghrọrọ rẹ orukuruku.

²⁴Etiyin Saimọn da kpahe kẹ, Rẹ Ọrovwohwo kẹ vwẹ, rere emu wọ tare na vwo jẹ uvwe ebro cha.

²⁵Ọke rẹ ayen vwo se oseri vwọ ta ota rẹ Ọrovwohwo na nu, ayen de rhivwi kpo Jerusalẹm, ji ghwoghwo iyẹnre esiri na vwẹ ighwre rẹ Sameria;

²⁶Ẹkẹvuọvo amakashe rẹ Ọrovwohwo da ta kẹ Filip, Vrẹn wo kpo obọrhe ọnre na vwẹ idjerhe ro nẹ Jerusalẹm kpo Gaza. Idjerhe nana aton.

²⁷Ọ de vrẹn ọ da yanran. Nighe, ọghwara ọvo ohwo rẹ Etiopia, onotu rẹ Kandase ovie aye rẹ ihwo rẹ Etiopia, kọye vwẹ ẹro te efe rọye. Ọ rhe Jerusalẹm jovwo rhe ẹga,

²⁸ko rhivwi kpo; yo tidia vwẹ evun rẹ akpẹrẹ rọye, ko se ọbe rẹ Aizaya rẹ ọmraro na.

²⁹Erhi na da ta kẹ Filip, yanran ra ro akpẹrẹ nana.

³⁰Ọtiọye na Filip da djẹ bro o de nyo ro vwo se ọbe rẹ Aizaya rẹ ọmraro na, ọ da nọ, Obo ru wo se na ro owẹ?

³¹Ọ da ta, Komavọ me sa vwọ riẹn, jokpa nẹ ohwo ọvo djere kẹ vwẹ? Ọ de se Filip rhi tidia kẹrẹ.

³²Asakiephana ọbe ọfuanfon ro se na kọna. Kerẹ ogodẹ re suẹn re hwe eyẹ omogode ro diunu vwẹ obaro rẹ ohwo rọ vwọrọ ẹto rọye, ọtiọye o che rhie unu rọye-e.

³³Vwẹ oma evwokpotọ rọye e gbi brorhiẹ ọsosọ kẹ-ẹ. Kono se dje orua rọye? kidie e hwere nẹ akpọ na

³⁴Ọghwara na da ta kẹ Filip, Biko, Ono ọmraro na ta ota nana kpaha vwo, vwọ kpahe oma rọye gbenẹ ohwo ọfa?

³⁵Etiyin Filip de rhie unu rọye, o de muhọ ẹta nẹ asan ọvuọvo rẹ ọbe ọfuanfon na rhe o de gbe ikun rẹ iyẹnrẹ esiri ri Jesu vwọ kẹ.

³⁶Rẹ ayen vwo nene idjerhe yanran ayen de rhi te asan ame ọvo, ọghwara na da ta, Nighe, ame hẹ etinẹ! Kidie rha djẹ vwẹ ame ẹreyọ? [

³⁷Filip da ta, Wo de ghine segbuyota vwẹ udu wẹ, ku wọ sa reyọ; ọ da kpahe, Mi segbuyota nẹ Jesu Kristi hẹ Ọmọ rẹ Ọghẹnẹ.]

³⁸Ọ da ta nẹ, a da akpẹrẹ na ji; ayen ihwo ivẹ, Filip kugbe ọghwara na de wotọ ro evu rẹ ame na, ọ da vwẹ ame kẹ.

³⁹Ọke rẹ ayen vwo nẹ evun rẹ ame na rhe nu Erhi rẹ Ọrovwohwo de mu Filip yanran; ọghwara na gbe mrẹ ọfa-a, ọ da ghọghọ kpo.

⁴⁰Ẹkẹvuọvo obo Azọtọs, kọye a da mrẹ Filip ro ghwoghwo iyẹnrẹ esiri na kẹ orho na ejobi bẹsiẹ ro rhi vwo te Sizaria.