Read urhobo Iruo rẹ Iyinkọn na 9 Bible Online

Iruo rẹ Iyinkọn na 9 - urhobo bible

Iruo rẹ Iyinkọn na 9

¹Ẹkẹvuọvo Sọl, ọ jẹ nwẹn ẹnwẹn rẹ ozighẹ heriheri kpahe iyinkọn rẹ Ọrovwohwo na, o de bro orherẹn rode na,

²ọ da nọ ekpẹn rẹ ogangan mie ro vwo kpo Sinegọg vwo obo Damaskọs sọ mrẹ ihwo ẹvo vwọ ri nene Idjerhe na, eshare eyẹ eya, rere o mu ayen gba rhe obo Jerusalẹm.

³Asakiephana rọ vwọ yanran re o de si kẹrẹ Damaskọs, kpregede na enu da nyavwaro wra.

⁴O de she teye otọ o de nyo urhuru ọvo rọ ta kẹ, Sọl, Sọl, die sorọ wo vwo mu uvwe?

⁵Ọ da ta, Wẹ ono vwo, Ọrovwohwo? Ọ da ta, Mẹvwẹ Jesu, ru wo kpokpo na.

⁶Ẹkẹvuọvo vrẹn re wọ ro orere na, ka ta kẹ owẹ obo ru wo che ru.

⁷Ihwo re vẹ ọye gba hẹ usun de mudia fọ gbiẹi, ayen vwo nyo urhuru na ẹkẹvuọvo ayen mrẹ ohwo ọvuọvo-o.

⁸Sọl de vrẹn nẹ otọ rhe; rẹ ẹro rọye vwo rhie nu, ọ gbe sa mrẹ orẹ-ẹ; ọtiọye na ayen da tẹtẹ rhe Damaskọs.

⁹Ẹdẹ erha soso ọ mrẹ orẹ-ẹ, ọ re emu eyẹrẹ kẹ ame ẹ da-a.

¹⁰Odibo ovọ re se odẹ rọye Ananayas da hẹ Damaskọs vwẹ ọke yena. Ọrovwohwo da vuẹ vwẹ emramrẹ, Ananayas. Ọ da ta, Mẹvwẹ na, Ọrovwohwo.

¹¹Ọrovwohwo da ta kẹ, vrẹn wo kpo urhuvwu re se Streit rere wọ ra nọ ekpẹn rẹ ọshare ọvo ohwo ri Tasọs odẹ rọye Sọl vwẹ uwevwi ri Judas; nighe, ọ herọ nẹ ẹrhovwo,

¹²ọ da mrẹ ọshare re se Ananayas rọ ro uwevwi rọ rhe ghwẹ abọ kpahọ rere ọ mrẹ orẹ.

¹³Ẹkẹvuọvo Ananayas da kpahe, Ọrovwohwo, mi nyo ikun buebu kpahe ọshare nana emu umwemwu ro ru kpahe ihwo efuanfon wẹn vwẹ obi Jerusalẹm.

¹⁴Vwẹ etinẹ ro rhere na ọ reyọ ogangan mie irherẹn ride na rere ọ rhe gba ihwo na ejobi ri se odẹ wẹn.

¹⁵Ẹkẹvuọvo Ọrovwohwo da ta kẹ, Yanran, kidie o hirhe ohwo re me jẹreyọ nure rere ọ ghwa odẹ mẹ bru otu ri Keferi kugbe ivie kugbe emọ rẹ Izrẹl.

¹⁶Mi che dje kẹ ojoja ro cha re fiki mẹ.

¹⁷Ọtiọye Ananayas da yanran ọ da ro evun rẹ uwevwi na. Rọ vwọ ghwẹ abọ rọye kpahọ, ọ da ta, Omoni Sọl, Ọrovwohwo Jesu rọ vwẹ oma phia kẹ wẹ vwẹ idjerhe ro wọ wan rhe na, ọye ji uvwe bru uwe rhe rere wọ vwọ mrẹ orẹ rere wọ vwọ vọn vẹ Erhi Ọfuanfon.

¹⁸Siẹvuọvo na emuọvo kerẹ esẹn de she nẹ ẹro rọye rhe ọ da mrẹ orẹ. Etiyin o de vrẹn ọ da reyọ ame.

¹⁹Ọ da re emu oma rọye da gan. Ọ vẹ iyinkọn na da dia Damaskọs ẹdẹ buebu.

²⁰Siẹvuọvo na ọ da ro evun ri Sinegog o de ghwoghwo Jesu, tanẹ, Ọmọ rẹ Ọghẹnẹ o ruẹ.

²¹Otu ri nyoro ejobi o de gbe ayen unu, ayen da ta, Ọ dia ọshare nana ri kpokpo ihwo ri se odẹ nana vwo obi Jerusalẹm? Iroro ọvuọvo na ọ vwọ rhe obonẹ na rere o rhi mu ihwo gba vwo rhe irherẹn ride na.

²²Ẹkẹvuọvo ogangan rẹ Sọl da rho phihọ, ọ da phọphọ otu ri Ju re dia Damaskọs ro vwo dje phia nẹ Jesu ghine Kristi na.

²³Rẹ ẹdẹ buebu vwọ wan nu, otu ri Ju na da jẹ iroro nẹ e hwe.

²⁴Ẹkẹvuọvo Pọl da riẹn iroro rayen. Ayen ke rhẹrẹ anurhoro na te ason te uvo, rere ayen hwe;

²⁵ẹkẹvuọvo idibo rọye de muo phihọ evun rẹ obere vwẹ ason ayen da lọrọ wan igbẹhẹ na rhe otọ.

²⁶Ọke ro rhi vwọ te Jerusalẹm ọ da guọnọ kuoma gbe idibo na; oshọ rọye ko mu ayen ejobi, kidie ayen rhe segbuyota nẹ o hirhe phihọ odibo nure-e.

²⁷Ẹkẹvuọvo Banabas da reyọ vwo rhe iyinkọn na ọ de dje kẹ ayen obo rọ mrẹ Ọrovwohwo vwẹ obi idjerhe rọ ta ota kẹ, kugbe obo rọ gbavwudu ghwoghwo odẹ ri Jesu vwo obi Damaskọs.

²⁸Kọye o da yanrhe yankpo vwẹ ohri rẹ ihwo na vwo obi Jerusalẹm.

²⁹Ọ da gbavwudu vwo ghwoghwo ota na vwẹ odẹ rẹ Ọrovwohwo. Ọ de nene ihwo rẹ Ju re jẹ Grik na ta ota phro aphro; ẹkẹvuọvo ayen ke guọnọ hwe.

³⁰Rẹ imoni na vwọ riẹn ayen da reyọ rhe Sizaria, ayen de vwo kpo Tasọs.

³¹Ọtiọye na oma de rhi fu ishọshi rọ hẹ Judia, Galili kugbe Sameria ejobi ayen de mudia gan; ke yan vwẹ evun rẹ oshọẹdjẹ rẹ Ọrovwohwo kugbe uchebro rẹ Erhi Ọfuanfon na ayen de rhi bu phihọ.

³²Asakiephana ri Pita vwo kpenẹ kpenẹ vwẹ ohri rẹ ayen ejobi, o de rhi ki te asan rẹ ihwo efuanfon na re dia Lida.

³³Oboyi ọ da mrẹ ọshare ọvo re se Eneas, ohwo ro shevwerhẹ ehwa rẹ ọga ẹgbukpe ẹrenre re ro ghwoma.

³⁴Pita da ta kẹ, Eneas, Jesu Kristi sivwi uwe; gbe vrẹn wo kpirhi ẹrue wẹn siẹvuọvo na o de vrẹn.

³⁵Ihwo ejobi re dia Lida kugbe Sharọn da mrẹ, ayen de kurheriẹ bru Ọrovwohwo rhe.

³⁶Ọke yena odibo ọvo da herọ vwẹ obi Jọpa re se Tabita, otọ rọye Dọkas eyẹ Uzo, O ru ẹse mamọ, oki rhe vwo uruemu esiri.

³⁷Vwẹ ọke yena kọ rhe mwọga o de ghwu; ọke rẹ ayen vwọ họ nu, ayen de muo phihọ ubruwevwi rọ hẹ obenu.

³⁸Ri Lida vẹ Jọpa vwọ kẹre oma na idibo na, vwo nyo nẹ Pita hẹ oboyi, ayen de ji eshare ive bro ra ra rẹ, nẹ, Biko kpare owọ bru avwanre rhe.

³⁹Ọtiọye na Pita vrẹnri o de nene ayen ra. Ọke rọ vwọ rhire, ayen da rọye kpo ubruwevwi rọ hẹ obenu na. Eya uku na ejobi de mudia kẹrẹ re ayen vwọ viẹ, yẹ ayen ghwe dje kẹ emwa buebu kugbe iwun buebu ri Dọkas ko kẹ ayen vwẹ ọke rọ vẹ ayen vwọ herọ.

⁴⁰Ẹkẹvuọvo Pita da djẹ ayen ro otafe o de diguẹ ọ da nẹ ẹrhovwo; ro vwo hirhe opharo ku orivwi na ọ da ta, Tabita, vrẹn. O de rhiẹ ẹro rọye, ọke rọ vwọ mrẹ Pita o de vrẹn tidia.

⁴¹Ọ da riẹn obọ rọye kẹ o da kparọ vrẹn mudia. Ro vwo se ihwo efuanfon na kugbe eyauku na ejobi rhe ọ da vwẹ aye na ọkpokpọ kẹ ayen.

⁴²Usi rọye da rhe hrabọ ro evun ri Jọpa ejobi, ihwo buebu de se Ọrovwohwo gbuyota.

⁴³O de nene Saimọn, osiophiẹn na dia ẹdẹ buebu vwi Jọpa.