Read urhobo Rom 1 Bible Online

Rom 1 - urhobo bible

Rom 1

¹Pọl, odibo ri Jesu Kristi, re seri nẹ ọ rhe dia ọyinkọn, re vwo mu nẹ o ghwoghwo iyẹnrẹ esiri rẹ Ọghẹnẹ

²ro veri jovwo vwẹ unu rẹ emraro rọye vwẹ evun rẹ ẹbe efuanfon na.

³Iyẹnrẹ esiri kpahe Ọmọ rọye, re vwiẹri vwẹ orua ri Devid vwẹ ọ rẹ ugboma

⁴re dje phia nẹ Ọmọ rẹ Ọghẹnẹ vwẹ ogangan kirobo rẹ Erhi ọfuanfon na vwe rọ phia vwẹ oma rẹ evrẹnushi rọye nẹ ughwu, ọye hẹ Jesu Kristi Ọrovwavwanre,

⁵oma rọye avwanre wan vwo ẹserọphẹ vwọ dia ọyinkọn rere mi vwo se ihwo re vwẹ ọghọ kẹ ri vwo esegbuyota kpahe odẹ na vwẹ ohri rẹ ẹgborho na ejobi,

⁶ji kugbe ovwan re seri rhe dia ihwo ri Jesu Kristi;

⁷Re vwo rhe ovwan ejobi rẹ evun rẹ ayen vwerhe Ọghẹnẹ vwi Rom, re seri ne rhe dia irherẹn; Ẹserọphẹ vẹ ufuoma ro nẹ obọ rẹ Ọghẹnẹ Ọsẹ rẹ avwanre kugbe Ọrovwohwo Jesu Kristi nene ovwan dia.

⁸Ẹsosuọ, me kpẹvwẹ Ọghẹnẹ mẹ vwẹ oma ri Jesu Kristi fiki rẹ ovwan ejobi, fikiridie usi rẹ esegbuyota rẹ ovwan hrabọ ro akpọ na ejobi re.

⁹Kidie Ọghẹnẹ hẹ iseri mẹ, ohwo re me vwẹ erhi mẹ ejobi ga vwẹ evun rẹ iyẹnrẹ esiri rẹ Ọmọ rọye, obo ri mi se odẹ rẹ ovwan te kẹdẹ kẹdẹ vwẹ evun rẹ ẹrhovwo mẹ.

¹⁰Ke me rẹ Ọghẹnẹ nẹ ọ da dia obo rọ guọnọre o gbe ru idjerhe na phẹ re mi vwo se bru ovwan rhe.

¹¹Kidie urhuru rẹ ovwan si vwe, rere me vwẹ ọchuko rẹ ẹse rẹ erhi na kẹ ovwan rọ kẹ ovwan ogangan vwo mudia gan.

¹²Obo re me ta na ọna nẹ, ọke mi de bru ovwan rhire avwanre ohwohwo ki ru esegbuyota rẹ ohwohwo gan, te ọ rẹ ovwan kugbe ọmẹ.

¹³Imoni mẹ, mẹ guọnọre nẹ ovwan riẹn nẹ, ọke buebu me vwọ guọnọ bru ovwan rhe jovwo (ẹkẹvuọvo use buebu kọye da vwẹ ji), rere me vwọ mrẹ asan re erere rẹ owian mẹ vwẹ ohri rẹ ovwan kugbe ohri ri Keferi ri chekọ na.

¹⁴Mẹvwẹ ọreosa rẹ ihwo ri Grik vẹ ihwo rẹ Ivwevwe, vwọ kẹ otu re ghwanre vẹ otu rẹ ẹkpa;

¹⁵kidie ọ davwẹ kẹ vwẹ ri mi vwo ghwoghwo iyẹnrẹ esiri na vwọ kẹ ovwan re hẹ obi Rom.

¹⁶Kidie oma rẹ iyẹnrẹ esiri na sa vo ovwẹ-ẹ: kidie ọye hẹ ogangan rẹ Ọghẹnẹ ro ruẹ iruo rẹ esivwo kẹ ohwo kohwo ro segbuyota ejobi, ẹsosuọ vwọ kẹ ihwo ri Ju tavwe ro ki te ihwo ri Grik.

¹⁷Kidie iyẹnrẹ esiri na re vwẹ ọvwata rẹ Ọghẹnẹ phia vwẹ oma rẹ esegbuyota fiki rẹ esegbuyota; kirobo re siro, Ohwo rọ wan oma rẹ esegbuyota dia ọvwata kọ rhọ.

¹⁸Kidie a vwẹ ophu rẹ Ọghẹnẹ phia nẹ odjuvwu rhe kpahe ihwo ri ruẹ orukuruku, re reyọ umwemwu vwọ tua uyota rẹ Ọghẹnẹ muotọ.

¹⁹Kidie obo ra sa riẹn vwẹ oma rẹ Ọghẹnẹ ọ pha phẹphẹ kẹ ayen, fikiridie Ọghẹnẹ djere kẹ ayen nure.

²⁰Nẹ ẹtuọhọ rẹ akpo na rhe ugboma rọye re jẹmrẹ na, kọye hẹ, ogangan rẹ ọrho rọye ri bẹdẹ na, a mrẹrẹ vughe vwẹ oma rẹ emu rọ mare. Vwẹ ọtiọye na ayen gbe mrẹ asa gun phihọ-ọ;

²¹dede nẹ ayen riẹn nẹ Ọghẹnẹ o ruẹ yẹ ayen rhe mu ọghọ kẹ kerẹ Ọghẹnẹ-ẹ eyẹ vwọ vwẹ ẹkpẹvwẹ kẹ-ẹ, ẹkẹvuọvo ayen da rhe dia ihwo aphro ghevweghe vwẹ iroro rayen, udu rẹ ẹkpa rayen na de rhi mu ebri.

²²Ayen roro nẹ ayen ghware, dayẹ ẹkpa ayen ruẹ,

²³ayen de wene urinrin rẹ Ọghẹnẹ ro jeghwo na phihọ uhoho rẹ ohwo rẹ akpọ ro ghwẹ eyẹ ọphran eyẹ eranvwe vẹ esẹn.

²⁴Fiki rẹ ọnana kugbe urhuru sivwe ofefe rẹ udu rẹ ayen Ọghẹnẹ de siobọ nẹ ayen kẹ iruo rẹ inuhu, rere ayen vwọ phọphọ oma rayen.

²⁵Kidie ayen wene uyota rẹ Ọghẹnẹ kpẹ ofian, ayen da vwẹ ẹga vẹ ejiro vwọ kẹ uhoho ra mare nọ ekpuyovwi rẹ Ọmẹma na, ohwo re jiri bẹdẹ! Isẹ.

²⁶Fiki rẹ ọnana Ọghẹnẹ vwo siobọ nẹ ayen kẹ ọmeme ọbrabra re o kpokpo ayen. Ọ dianẹ eya na ọvo re reyọ oma esiri ra ma kẹ ayen vwo gbe igberadja-a,

²⁷ẹkẹvuọvo ekpuyovwi rẹ eshare na gbobọnyẹ eya rẹ ayen bru ra ke fian nene eshare jẹ oma vo aye-en osa rẹ oruchọ rẹ ayen ruru kọye a hwa kẹ ayen.

²⁸Kirobo rẹ ayen rha rhọvwe reyọ phihọ Ọghẹnẹ na-a, Ọghẹnẹ de siobọ nẹ ayen kẹ udu ọbrabra rẹ ayen re ayen vwo ru obo ri je ayen.

²⁹Udu rayen da vọn vẹ orukuruku, ozighi, urhuru, ọhoho. E vọnre vẹ omẹriọ, ozighẹ, ẹghwọ, ophiẹvwe, ota ọbrabra, iguegu,

³⁰ophọphọvwe, omaetuo rẹ Ọghẹnẹ, aroeyivwo, uhrerhe, eyan, onyonyo, ijọghọ emuo kẹ ọsẹ vẹ oni,

³¹jiroro evwo, jesegbuyota evwo, jẹguọnọ evwo, jaruẹdọn evwo.

³²Dede na yẹ ayen riẹn ekan rẹ Ọghẹnẹ harhẹ ihwo ri ru oghẹre rẹ imu tiọna na nẹ i fo ughwu na, yẹ ayen ghwe ruẹ ayen, ihwo efa ri ji ghwe ruẹ na ayen ghwe kuvwie nene ayen.