Read urhobo Rom 11 Bible Online

Rom 11 - urhobo bible

Rom 11

¹Me nọre nẹ, kẹ Ọghẹnẹ siẹn ihwo rọye? Kaka vwo! Mẹvwẹ rọ ta ota na je vwọ ohwo rẹ Izrẹl, uvwiẹ rẹ Ebraham, ohwo rẹ orua ri Bẹnjamin.

²Ọghẹnẹ sa siẹn ihwo rọye rọ riẹnre rhabae na-a. We nyo obo rẹ ọbe ọfuanfon na ta kpahe Ilaija, obo rọ rẹ Ọghẹnẹ kẹ Izrẹl te?

³Ọrovwohwo, ayen hwe emraro wẹn ghwu, ayen kporo egbada wẹn te otọ, mẹvwẹ ọvo ro chekọ na, ayen je guọnọ arhọ mẹ hwe.

⁴Ẹkẹvuọvo kidie Ọghẹnẹ kpahe kẹ? Me je sẹro rẹ ihwo uriori ighwrẹ ri ji shiguẹ kẹ Baal dẹvo-o.

⁵Ọtiọye vwẹ ọke nana umuku rẹ ihwo ji cheko, ra jẹreyọ vwẹ ẹserọphẹ.

⁶Ẹkẹvuọvo ọ da dia ọ rẹ ẹserọphẹ, yọ gbe dia ifiki rẹ iruo ọfa-a; ọ da dia eriyin manẹ ẹserọphẹ gbe hẹ ẹserọphẹ-ẹ.

⁷Kidie ọfa? Obo rẹ Izrẹl guọnọre te ayen obọ-ọ. Otu ra jẹreyọ na vworo, ye udu rẹ otu ri chekọ je gan,

⁸kirobo re siro, Ọghẹnẹ da kẹ ayen erhi ri rhurhu, ẹro rere ayen jẹ orẹ ẹmrẹ erhọn rere ayen jẹ ẹme enyo rhiri rhi te nonẹ na.

⁹Devid tare, Gbe jẹ orẹ rayen hirhe phihọ ugodo vẹ ufi, uyere kugbe ekan kẹ ayen.

¹⁰Jẹn ẹro rayen mu ebri rere ayen jẹ orẹ ẹmrẹ; rere ayen rioja rẹ ukpokpoma rayen bẹdẹ.

¹¹Ọtiọye na me nọre, kẹ ayen di yẹghrẹ re ayen vwọ mrasan she? Kaka vwo! Ẹkẹvuọvo fiki rẹ eshe rayen esivwo vwo bru ihwo ri Keferi rhe, rere Izrẹl vwọ reoma.

¹²Asakiephana ọ da dianẹ urhi ẹchọ rayen da nẹrhẹ akpọ na fe, eshe rayen da nẹrhẹ ihwo ri Keferi fe, komavọ ọ dia jovwo ọ da dianẹ ayen mndia gan?

¹³Asakiephana ovwan Keferi me ta kẹ na. Re me vwọ hẹ ọyinkọn ri Keferi na, ke me vwẹ ikọn ẹyan mẹ na herẹ,

¹⁴rere ihwo mẹ ihwo ri Ju vwọ reoma kpahe ayen, se se sivwi ihwo evo rhọ.

¹⁵Ẹsiọn rẹ ihwo ri Ju da nẹrhẹ arhuẹrẹ akpọ na kugbe, ẹreyọ rayen kẹ arhọ rẹ evrenushi?

¹⁶Ohọrọ rẹ omamọ da vwerhe, eduru na ejobi kọ je vwerhe rhe, awọ rẹ urhe da vwerhe, ọtiọye eghọn rọye je dia.

¹⁷Ọ da dianẹ a nyavwe eghọn rẹ urhe na evo kufia, ra da vwẹ owẹ, oghọn rẹ urhe ọfa vwọ tamuo, rọ da vwẹ ame rẹ urhe rẹ ọliv na vwọ ghẹrẹ oma rọye,

¹⁸wo rhe herẹ kẹ eghọn rẹ uvi rẹ urhe ri chekọ na-a. Wo de heri gba karohọ nẹ ọ dia owẹ re ghẹrẹ awọ na-a, ẹkẹvuọvo awọ na re ghẹrẹ owẹ.

¹⁹Ku wọ tane, a nyavwe eghọn evo kufia rere a mrasan vwẹ owẹ tamu.

²⁰Ọyena uyota. Fiki ri jesegbuyota rayen a vwọ nyavwe ayen kufia, ẹkẹvuọvo fiki rẹ esegbuyota kọye a rha vwọ reyọ owẹ tamuọ. Wọ ghwa yan eya-an, djẹ oshọ rẹ Ọghẹnẹ.

²¹Kidie Ọghẹnẹ hwe uvi rẹ urhe na, kẹ owẹwẹ ra vwọ tamu.

²²Gbe ni arodọvwẹ vẹ aroesio rẹ Ọghẹnẹ; aroesio kẹ otu ri sheri, ẹkẹvuọvo arodọvwẹ rẹ Ọghẹnẹ dia ke owẹ, wo de nene arodọvwẹ rọye; ọ rha dia eriyi-in ka je nyavwe owẹ kufia.

²³Mrẹmrẹ ihwo efa na, ayen de siobọ nẹ ijesegbuyota rayen, ka je vwẹ ayen tamuo, kidie Ọghẹnẹ vwo ogangan ra vwọ vwẹ ayen tamuo.

²⁴A da vwẹ owẹ re si nẹ urhe ọfa toto rhe na vwọ tamu uvi rẹ ọliv na, komavọ ọphẹre te ra vwọ vwẹ ekpuyovwi rẹ eghọn rẹ ọliv dẹn na vwọ tamuo.

²⁵Wọ da rha ghwanre kẹ omobọ wẹn ọvo, imoni mẹ, me guọnọre nẹ ovwan riẹn igbunu nana, udu ogangan bru abọvo rẹ ihwo rẹ Izrẹl rhe, bẹsiẹ rẹ unu rẹ ihwo ri Keferi vwọ gba,

²⁶ọtiọye na ihwo rẹ Izrẹl ejobi ke sivwi ayen; kirobo re siro nẹ, Osivwi na ko nẹ Zayọn rhe, kọ djẹ ijẹfuọn nẹ Jekọp;

²⁷ọnana kọye hẹ ọphọ re me vẹ ayen cha re ri mi de phorho imwemwu rayen nu.

²⁸Vwẹ oma rẹ iyẹnrẹ esiri na ayen kẹ ọvweghrẹ rẹ Ọghẹnẹ fiki rẹ ovwan; ẹkẹvuọvo vwẹ oma rẹ ẹjẹreyọ ayen kẹ ihwo eghaghare fiki rẹ esẹ rayen ride.

²⁹Kidie okẹ kugbe use rẹ Ọghẹnẹ a sa rhan rhivwi-i.

³⁰Kirobo rẹ ayen mu oma kpenu rẹ Ọghẹnẹ vwọ siẹn ayen na, asakiephana kẹ ayen je mrẹ arodọvwẹ fiki ri jẹ ọghọ evwo,

³¹ọtiọye ovwan ji ke mu oma kpenu jovwo ọke rẹ arodọvwẹ rọye vẹ ovwan vwọ herọ, kirobo ro ji ni arodọvwẹ kẹ ovwan na eriyin o ji ni kẹ ayen rhe.

³²Kidie Ọghẹnẹ phoro ijẹọghọ evwo rẹ ovwan ejobi kufia, rere ọ vwọ mrasan reyọ ovwan ejobi.

³³E, nighe ekodo vẹ efe kugbe ẹghwanre vẹ erianriẹn rẹ Ọghẹnẹ! Mavọ orhiebro rọye gba te ono sa riẹn idjerhe ro neneri.

³⁴Kono sa riẹn iroro rẹ Ọrovwohwo, eyẹ kono hẹ ọvwiroro rọye?

³⁵Eyẹ kono ru ẹse kẹ ro de jẹ ẹkpẹvwẹ?

³⁶Kidie obọ rọye emu na ejobi nẹ cha, ọye re ma ayen, ọye nẹrhẹ ayen dia. Ọye a vwẹ ejiro kẹ bẹdẹ. Isẹ.