Read urhobo Rom 12 Bible Online

Rom 12 - urhobo bible

Rom 12

¹Imoni mẹ, me rẹ ovwan, rere vwẹ arodọvwẹ rẹ Ọghẹnẹ, ovwan sa vwẹ oma rẹ ovwan ze izobo ọkpokpọ, rọ fọnro ro fo ẹreyọ kẹ Ọghẹnẹ, kọye hẹ ẹga rẹ erhi rẹ ovwan ga.

²We hirhe oma phihọ ohwo rẹ akpọ nana ọvo-o ẹkẹvuọvo gbe wene iroro rẹ udu rẹ ovwan phihọ ọkpokpọ, re we se vughe ọhọre rẹ Ọghẹnẹ, obo ri yoma ro fo ẹreyọ kugbe obo re gbare.

³Fiki rẹ ẹserọphẹ ra vwọ kẹ vwẹ me rẹ ohwo ọvuọvo vwẹ ohri rẹ ovwan nẹ e jẹn ohwo ọvo rhe roro oma rọye rhuarho nọ obo rọ epha jovwọ-o, ẹkẹvuọvo ovwan vwẹ oma kpotọ dẹndẹn, ọvuọvo kerẹ ọtiẹ esegbuyota rẹ Ọghẹnẹ vwọ kẹ.

⁴Kidie kirobo rẹ avwanre hẹ ugboma ọvo na ro de vwo ekuakua buebu na, rẹ ekuakua na ejobi vwo oghẹre rẹ iruo ọvo-o na,

⁵ọtiọye na avwanre, dede nẹ avwanre epha buebu na, ugboma ọvo vwi Kristi, yẹ ohwo ọvuọvo ekuakua na ohwohwo vwo so ohwohwo.

⁶Kirobo rẹ ẹse ro ru avwanre fẹnẹre, ẹserọphẹ rọ ghare kẹ avwanre na, e gbe jẹn avwanre vwẹ ayen ru iruo; ọ da dia aroẹmrẹ, e gbe jọ dia kirobo rẹ esegbuyota rẹ avwanre teri;

⁷ọ da dia ọ rẹ ẹga, o ghwe nene ẹga; ọ ro yono, o ghwe nene uyono rọye;

⁸ọ ro bruche, o ghwe nene uchebro rọye; ọ ro ru ẹse, o ghwe rhie abọ ruo; ọ rọ cha uko, e jo ruo vẹ oruru; ọ ro nẹ aruẹdọn, ọ vwẹ omavwerhovwẹ ruo.

⁹We jẹ ẹguọnọ rẹ ovwan dia ọ rẹ unu diodi-i; Jẹn umwemwu tu ovwan oma, churu obọ mu obo ri yoma.

¹⁰Wa guọnọ ohwohwo vẹ omamọ rẹ ẹguọnọ; we sivwi oseghe rẹ ọghọemuo.

¹¹We jẹ oma rhọ oruru rẹ ovwa-an, vọn vẹ oruru rẹ Erhi na, ga Ọrovwohwo na.

¹²Ghọghọ vwẹ evun rẹ iphiẹrohọ wẹn, chirako vwẹ ukpokpoghọ, wo gbe ẹdẹ rẹ ẹrhovwo-o.

¹³Toro arhọghọ fiki rẹ ọkarovwẹ rẹ irherẹn na, yono obo re ru ẹse.

¹⁴Nẹ ẹrhovwo kẹ otu ri mukpahe owẹ; nẹ ẹrhovwo wọ harha aye-en.

¹⁵Ghọghọ kẹ otu re ghọghọ, otu re viẹ nene ayen vie.

¹⁶Ovwan riẹn yenri kugbe; we phuoma-a, ẹkẹvuọvo kuoma gbe otu ri kpotọ; wọ ghwanra vwẹ evun wẹn ọvo-o.

¹⁷Wọ vwẹ umwemwu hwa osa rẹ umwemwu-u, ru obo ri shehọ vwẹ obaro rẹ ihwo ejobi.

¹⁸Udu wẹn da gba, wọ vẹ ohwo ọvuọvo ghwọ-ọ.

¹⁹Imoni mẹ, wa reihri-i, ẹkẹvuọvo jovwo kẹ ophu rẹ Ọghẹnẹ; kidie e siro nẹ, Ihriẹriọ ọ mẹ, mẹvwẹ re hwa osa, eriyin Ọrovwohwo tare.

²⁰Ẹkẹvuọvo owẹvwe de hwe ọvweghrẹ wẹn, vwẹ emu kẹ rẹ; urhuru rẹ ame de hwe, vwẹ ame kẹ da; kidie ọtiọye wo ru kẹ na ẹkuerhanre rode kọye wo koko phihọ uyovwi rọye.

²¹Wo jẹ umwemwu phi we kparobọ-ọ, ẹkẹvuọvo vwẹ uyoyovwi phi umwemwu kparobọ.