Read urhobo Rom 14 Bible Online

Rom 14 - urhobo bible

Rom 14

¹Ohwo rẹ esegbuyota rọye lọhọre vwẹ ohri rẹ ovwan, we dede reyọ, ẹkẹvuọvo ọ dia orhiẹ a tanẹ ebruhwe-e.

²Ohwo ọvo vwo esegbuyota rọ vwọ re emu ejobi, yẹ ohwo rọ lọhọre ria ifọ ọvo.

³E jẹn ohwo rọ ria na vwẹ ọ ro jẹriọ na vwọ jehwẹ-ẹ, ọ ro jẹriọ rha vwẹ ọ rọ ria vwọ jehwẹ-ẹ, kidie Ọghẹnẹ dedire reyọ nure.

⁴Ono hẹ owẹ rọ vwẹ odibo rẹ ohwo ọfa vwo guẹdjọ? Onini rọye ọvo ri se brorhiẹ kẹ ọye ọvo ri se bruhwe. Ọ sa rease, kidie Onini rọye ọvo ri se bru ocha cha.

⁵Ohwo ọvo mimu ọghọ kẹ ẹdẹ ọvo nọ ọfa, ọfa mi rhe mu ọghọ kẹ ẹdẹ na ejobi gba. E ji kohwo kohwo segbuyota kirobo rẹ udu rọye dje kẹ.

⁶Ohwo ro mu ọghọ kẹ ẹdẹ na, o muro kẹ Ọrovwohwo. Ọ rọ ria emu, ọ rerọ vwo mu ọghọ kẹ Ọrovwohwo, kidie ọ vwẹ ẹkpẹvwẹ kẹ Ọghẹnẹ; ohwo ro jẹriọ, ọ vwẹ i jẹriọ vwo mu ọghọ kẹ Ọrovwohwo ọ me vwẹ ẹkpẹvwẹ kẹ Ọghẹnẹ.

⁷O vwo ohwo ọvuọvo rọ rhọ kẹ oma rọye-e, o ji vwo ohwo ọvuọvo ro ghwẹ kẹ oma rọye-e.

⁸Owenẹ avwanre rhọ, avwanre rhọre kẹ Ọrovwohwo, owenẹ avwanre ghwu, avwanre ghwuru kẹ Ọrovwohwo; owenẹ avwanre rhọ eyẹ avwanre ghwu, avwanre hẹ obọ rẹ Ọrovwohwo.

⁹Kidie fiki rẹ ọna ọye Kristi vwo ghwu rọ ke rhoma varhe, rere ọ vwọ dia Ọrovwohwo rẹ ihwo ekpokpọ kugbe i ri ghwuru.

¹⁰Ẹkẹvuọvo wẹ, die nẹrhẹ owẹ guẹdjọ rẹ oniọvo wẹn? Eyẹ owẹ, die wọ vwọ jẹ oniọvo wẹn fia? Kidie avwanre ejobi che mudia vwẹ obaro rẹ ekete rẹ ẹdjeguo rẹ Ọghẹnẹ;

¹¹kidie e siro, Kirobo re me herọ na eriyin Ọrovwohwo tare, mẹvwẹ ohwo kohwo ejobi che diguẹ kẹ, unu kunu ejobi ko che jiri Ọghẹnẹ.

¹²Eriyin na ohwo ọvuọvo kọ cha vwẹ unu gbe ikun rẹ oma rọye kẹ Ọghẹnẹ.

¹³E gbi jẹn avwanre guẹ ohwohwo ẹdjọ-ọ, ẹkẹvuọvo e gbe jẹn avwanre roro ọna mrẹ nẹ ohwo ọvuọvo rha dia ukọn kẹ oniọvo rọye-e eyẹ vwọ so okpetu kẹ-ẹ.

¹⁴Me riẹnrẹ o ji mu vwe ẹro nẹ vwẹ oma rẹ Ọrovwohwo Jesu, o vwo emu ọvuọvo ro jẹfuọ-ọn; ẹkẹvuọvo kọ dia gbegbe kẹ wẹ ọ da dianẹ wo sere ogbegbe.

¹⁵Ọ da dianẹ fiki rẹ emuọre kọye wo vwo gbe oniọvo wẹn ẹgua, yi wo gbi nẹne urhi rẹ ẹguọnọ na-a. Wọ rha vwẹ fiki rẹ emuọre hwe ohwo ri Kristi vwẹ fiki rọye ghwu-u.

¹⁶Wo rhe jẹn a ta ota ọbrabra kpahe emu esiri ri wo ruru-u.

¹⁷Kidie uvie rẹ Ọghẹnẹ na dia ọ rẹ emuọre kugbe udi ẹda-a ẹkẹvuọvo ọ rẹ ọvwata kugbe ufuoma kugbe aghọghọ vwẹ oma rẹ Erhi Ọfuanfon.

¹⁸Kidie ohwo rọ nabọ vwẹ oma kpotọ ga Kristi uruemu rọye ko jẹ Ọghẹnẹ ihwo rẹ akpọ ki ji jiro.

¹⁹E gbe jẹn avwanre nene idjerhe rẹ ufuoma rere avwanre ru esegbuyota rẹ ohwohwo gan.

²⁰Ovwan vwẹ fiki rẹ emuọre guọghọ iruo rẹ Ọghẹnẹ kuẹfia-a. Emu na ejobi fonre, ẹkẹvuọvo ọ ọchọre ọ da dianẹ emuọre ru wọ ria nẹrhẹ ohwo ọfa she.

²¹O fori rere ohwo vwo jẹ uvwo rẹ eranvwe ẹriọ eyẹ ro vwo jẹ udi ẹda eyẹ kemu kemu rọ nẹrhẹ oniọvo wẹn she eruo.

²²Esegbuyota ru wo vwori na, wo vworo kẹ oma wẹn vẹ Ọghẹnẹ; aghọghọ kẹ ohwo re vwo guẹdjọ fiki rẹ obo ro ruẹ-ẹ.

²³Wo de vwo iroro ivẹ kpahe obo ru wọ rere, ẹgua rọye ko ku we, fikiridie wọ rerọ vwẹ esegbuyọta-a; kidie kemu kemu re ruru ro vwo esegbuyota-a kẹ umwemwu ọ dia.