Read urhobo Rom 15 Bible Online

Rom 15 - urhobo bible

Rom 15

¹O fori rere avwanre ihwo re ganre na vwo chirako rẹ otu re evwiẹre na, avwanre rhe nene ojevwe rẹ oma rẹ avwanre ọvo-o.

²E jẹ avwanre ọvuọvo ru obo ri je ohwohwo fiki rẹ erhuvwu rọye, rere o vwo mudia gan.

³Kidie Kristi guọnọ erhuvwu rẹ oma rọye-e; ẹkẹvuọvo, kirobo re siro, ekan ra harhe ovwan ejobi uyovwi mẹ i she phihọ.

⁴Kidie kemu kemu re si phihọ otọ rhabae rhe, e si ayen phihọ otọ kẹ eyono rẹ avwanre, rere vwẹ erhiori kugbe uchebro ro nẹ ẹbe ọfuanfon na rhe avwanre se vwo iphiẹrohọ.

⁵Asakiephana Ọghẹnẹ rẹ erhiori kugbe uchebro ru ovwan vwọ dia evun ọvo, vwẹ oma ri Jesu Kristi,

⁶rere avwanre kuoma gbe ọvo vẹ urhuru ọvo vwo jiri Ọghẹnẹ kugbe Ọsẹ rẹ Ọrovwavwanre Jesu Kristi.

⁷Vwẹ eriyin na ovwan dede ohwohwo, kirobo ri Kristi dede ovwan, vwọ kẹ urinrin rẹ Ọghẹnẹ.

⁸Kidie me ta kẹ owẹ nẹ Kristi rhi hirhe oma phihọ odibo vwọ kẹ ihwo re yanvwere ro vwo dje uyota rẹ Ọghẹnẹ phia, rere o vwo ru ive ro ve kẹ esẹ ride na gba.

⁹Rere otu ri Keferi vwọ mrasan vwẹ urinrin kẹ Ọghẹnẹ fiki rẹ aruẹdọn rọye. Kirobo re siro, Fiki rẹ eriyin na ki mi jiri uwe vwẹ ohri ri Keferi ke me so une kẹ odẹ wẹn;

¹⁰ọ da rhoma ta, Ghọghọ, E Keferi, kugbe ihwo rọye;

¹¹ọfa, Jiri Ọrovwohwo, ovwan Keferi ejobi, jẹn ihwo na ejobi jiro;

¹²Ọfa, Aizaya tare nẹ, Vwẹ evun rẹ uvwiẹ ri Jẹsse na ohwo ọvo che mu ro che sun ihwo ri Keferi; ọye ihwo ri Keferi na che phiẹrohọ.

¹³Gbe jẹn Ọghẹnẹ rẹ iphiẹrohọ vọn udu rẹ ovwan vẹ aghọghọ kugbe ufuoma rẹ esegbuyota, rere vwẹ ogangan rẹ Erhi Ọfuanfon na ovwan vwo se bu phihọ vwẹ iphiẹrohọ.

¹⁴Imoni mẹ, o mu vwe ẹro nẹ, ovwan vọnre vẹ uruemu esiri buebu, nẹ ovwan je vọn vẹ erianriẹn, rẹ ovwan vwo se yono ohwohwo.

¹⁵Ẹkẹvuọvo ọbe nana ri mi si rhe ovwan ọ pha tuatua vwẹ kẹ ekarohọ rẹ ovwan, fiki rẹ ẹserọphẹ rẹ Ọghẹnẹ vwọ kẹ vwẹ

¹⁶nẹ a vwo vwẹ ru ọyinkọn ri Kristi Jesu vwọ kẹ otu ri Keferi vwẹ ẹga rẹ orherẹn rẹ iyẹnrẹ rẹ Ọghẹnẹ na, rere a vwọ mrasan reyọ izobo rẹ otu ri Keferi na, rẹ Erhi Ọfuanfon na ru fon na.

¹⁷Vwẹ ọtiọye na, ke me sa yan eyan rẹ iruo ri mi ru kẹ Ọghẹnẹ vwẹ evun ri Kristi Jesu.

¹⁸Kidie mi se yivwi gbe ikun rẹ emuọvo-o jokpa nẹ obo ri Kristi vwẹ ovwẹ ru re otu ri Keferi se vwo mu ọghọ kẹ, vwẹ ota kugbe uruemu.

¹⁹Vwẹ ogangan rẹ eka kugbe igbunu, vwẹ ogangan rẹ Erhi Ọfuanfon na, ọtiọye na nẹ Jerusalẹm re duvwu Irikọm ọye me da nabọ ghwoghwo iyẹnrẹ esiri ri Kristi na.

²⁰Kọye ẹnwan re me rua na nẹ mi ghwoghwo iyẹnrẹ esiri na, yọ dianẹ asan re de se odẹ ri Kristi nure-e, me da rha bọn phihọ enu rẹ uchivwo rẹ ohwo ọfa.

²¹Ẹkẹvuọvo kirobo re siro, Ayen cha mrẹ ohwo re ji gbe ikun rọye kẹ ayen dẹvo-o ayen ki vwo ẹruo rẹ ohwo rẹ ayen ji nyo umri rọye dẹvo-o.

²²Kẹ ọna re da vwẹ jẹ ri mi vwo jẹ ovwan e bro cha rhan wẹ dẹye.

²³Ẹkẹvuọvo vwẹ asakiephana, re me rha mrasan de ru iruo vwẹ ubrakpọ yena-a na, rẹ urhuru rẹ ovwan vwo sivwe vwẹ ikpe buebu re mi vwo bru ovwan rhe na,

²⁴mi phiẹrohọ nẹ me cha vwẹriẹ mrẹ ovwan re me da cha wanvrẹn kpo Spen, me vẹ ovwan da bẹnẹ kẹ oma nu, ku we sun vwe yanran.

²⁵Vwẹ etinẹ na, mi kpo Jerusalẹm vẹ arhọghọ re toro kẹ vwẹ vwo rhe ihwo efuanfon na.

²⁶Kidie ihwo ri Masidonia kugbe Akaya toro arhọghọ ni mi vwo rhe ivwiogbere re hẹ ohri rẹ ihwo efuanfon na vwẹ obi Jerusalẹm.

²⁷O je ayen nẹ ayen ruo, uyota ayen reosa rẹ ayen, ọ da dianẹ otu ri Keferi na rhi vwo ẹkẹn vwẹ ebruphihọ rẹ erhi na, ke je vwẹ abọvo rẹ iruo rẹ ayen rẹ ayen vwọ vwẹ ebruphihọ rẹ ugboma rẹ ayen vwọ ga ayen.

²⁸Ọke re me da yan uwevwi re ji vwe nu, re me da vwẹ arhọghọ na te ayen obọ nure, ki me wan obo rẹ ovwan kpo Spenẹ

²⁹Me riẹnre nẹ ọke re me da rhe omamọ rẹ ebruphihọ rọ vọnre rọ ghare ro nẹ obọ ri Kristi rhe, ọye me cha ghwa rhe ovwan.

³⁰Imoni mẹ, me vwẹ odẹ ri Jesu Kristi rẹ ovwan, kugbe ẹguọnọ rẹ Erhi na, rere ovwan ejobi ku unu gbe rẹ Ọghẹnẹ kẹ vwẹ;

³¹rere otu ri jesegbuyota re hẹ obi Juda vwo ju vwe ekpokpo, rere imoni re hẹ obi Jerusalẹm re ghwẹ ẹga rhe na, vwo rhie abọ reyọ ovwẹ.

³²Ọ da dianẹ Ọghẹnẹ rhọvwere ki mi bru ovwan rhe vẹ udu rẹ aghọghọ, rere okẹ re me vẹ ovwan dia oboyi te, ọ sa dia ọ rẹ ufuoma.

³³Ọghẹnẹ rẹ ufuoma o nene ovwan dia. Isẹ.