Read urhobo Rom 16 Bible Online

Rom 16 - urhobo bible

Rom 16

¹Mi dje oniọvo rẹ avwanre rẹ ọmọte Fibi kẹ ovwan, orherẹn re ishọshi ri Sinkia,

²rere ovwan reyọ vwẹ odẹ rẹ Ọrovwohwo kerẹ orherẹn ro fori, re wa vwẹ ọchuko kẹ vwi kemu kemu ejobi rọ guọnọre kidie ọ cha ihwo buebu uko eriyin ọ je cha vwẹ uko rhe.

³We yere Priska kugbe Akuila, otu mẹ re me vẹ aye gbe koko ru iruo kẹ Jesu Kristi.

⁴Ihwo ri dino ghwu fiki mẹ, me kpẹvwẹ ayen ọ dia omẹvwẹ ọvo-o, ẹkẹvuọvo ji te ishoshi ri Keferi na ejobi.

⁵We ji yere ishọshi rọ hẹ uwevwi rayen. We ji yere ọ re me guọnọre na Epanetus, rọ dia ohwo rẹsosuọ ro se Jesu gbuyota vwẹ ubrakpọ rẹ Esha.

⁶Yere Meri ro ru iruo gangan vwẹ ohri rẹ ovwan.

⁷Yere Andronikọs kugbe Junias imoni mẹ kugbe otu mẹ re me vẹ ayen gba re oja vwẹ uwodi; ayen emamọ rẹ ihwo vwẹ ohri rẹ iyinkọn na, e ke rha je dia ihwo ri ke nene Kristi tavwe mi ki rhi kurhẹriẹ.

⁸Yere Ampiatọs rọ nabọ ghare kẹ vwẹ vwẹ odẹ rẹ Ọrovwohwo.

⁹Yere Ubanọs, otu rẹ avwanre vwẹ iruo ri Kristi, kugbe Stakọs re me guọnọre na.

¹⁰Yere Apele, ro se Kristi gbuyota gangan na. Yere ekru rẹ Arisrobulọs.

¹¹Yere omoni mẹ Hẹrodiọn. Yere ayen re herọ vwẹ evun rẹ Ọrovwohwo ekru rẹ Nakisọs.

¹²Yere iruiruo rẹ Ọrovwohwo ejobi, Trifina kugbe Trifosa. Yere Pesis re me guọnọre ro ru iruo gangan vwẹ evun rẹ Ọrovwohwo.

¹³Yere Rufọs, ohwo rode kẹ Ọrovwohwo, kugbe oni rọye vẹ ọ mẹ.

¹⁴Yere Asinkritọs, Flẹgọn, Hẹms, Patrobas, Hẹmas, kugbe imoni re vẹ ayen gba herọ.

¹⁵Yere Filologọs, Julia, Nerus kugbe oniọvo rọye rẹ ọmọtẹ, kugbe Olimpas, kugbe ihwo efuanfon na re vẹ ayen gba herọ.

¹⁶Wa vwẹ unuefiọnfiọn ọfuanfon yere ohwohwo. Ishọshi ri Kristi ejobi yere ovwan.

¹⁷Me rẹ ovwan, imoni mẹ, re wa kenoma kẹ ihwo re vwẹ ohra kugbe ẹghwọ cha vwẹ uherevie rẹ ovwan, re vwẹ aphro ghwọrọ obo re yono ovwan kuẹfia; we tephe kẹ ayen.

¹⁸Kidie oghẹre rẹ ihwo ọtiọye na dia Ọrovwohwo Kristi ayen ga-a, ẹkẹvuọvo urhuru sivwe rẹ oma rayen, ihwo re vwẹ eta avwerhe kugbe unuẹrarọ vwọ phiẹn igbori kugbe ihwo ughẹnghẹn.

¹⁹Rẹ usi rẹ ọghọemuo rẹ ovwan vwo kperi ro asan ejobi na, re me vwọ ghọghọ kẹ ovwan na, me guọnọ nẹ ovwan ghwanre kpahe obo ri yovwiri re we jẹ abe-ẹriọ vwẹ oma rẹ obo re brare;

²⁰o chekọ emerha, Ọghẹnẹ rẹ ufuoma na ko che chihi Idẹbono muotọ. Ẹserọphẹ rẹ Ọrovwavwanre Jesu Kristi nene ovwan dia.

²¹Timoti, rẹ ọrivẹ mẹ, yere ovwan; ọtiọye hẹ Lushọs kugbe Jesin, kugbe Sosipata, rẹ omoni mẹ.

²²Mẹvwẹ Tẹtiọs, ro si ọbe nana, yere ovwan vwẹ odẹ rẹ Ọrovwohwo.

²³Gaeọs, ri mi won phihọ uwevwi rọye na, rẹ ishoshi na ejobi ji won na, yere ovwan.

²⁴Ẹserọphẹ rẹ Ọrovwavanre Jesu Kristi nene ovwan ejobi dia Isẹ.

²⁵Asakiephana vwọ kẹ ohwo ro se ru ovwan gan kirobo re iyenrẹ esiri mẹ epha kugbe eghwoghwo ri Jesu Kristi, kirobo rẹ ẹvwọphia rẹ igbunu rọye teri re sinu rhabae rhe

²⁶ẹkẹvuọvo ra rhe vwọ phia vwẹ asakiephana vwẹ oma rẹ isiesi rẹ emraro na ẹgborho rẹ akpọ na ejobi riẹnre na, kirobo re urhi rẹ Ọghẹnẹ ro jeghwo epha, ro nẹrhẹ e mu ọghọ kẹ esegbuyọta na —

²⁷Ọghẹnẹ ọvuọvo rọ ghwanre na a vwẹ urinrin kẹ bẹdẹ bẹdẹ vwẹ oma ri Jesu Kristi! Isẹ.