Read urhobo Rom 2 Bible Online

Rom 2 - urhobo bible

Rom 2

¹Wọ rha mrasa gun phihọ-ọ oghẹre rẹ ohwo re wọ epha ejobi wẹ ro brorhiẹ hwe ihwo efa na, obo ri wo brorhiẹ rẹ ihwo na eriyin wo ji ghwe brẹ hwe omaobọ wẹn, fikiridie wẹ, rẹ obrorhiẹ na ji ghwe ruẹ ọtiọye rhe.

²Avwanre riẹnre nẹ orhiẹ rẹ Ọghẹnẹ ọ hẹ enu rẹ otu ri ruẹ oghẹre rẹ emu ọtiọye na.

³Ku wo rori, E ohwo na, nẹ wo de brorhiẹ rẹ ihwo ri ru emu ọtiọye na ye okpuyovwi wẹn ji ruẹ ayen na, ku wọ cha vabọ rẹ orhiẹ rẹ Ọghẹnẹ?

⁴Gbinẹ ovwan di roro arodọvwẹ rẹ Ọghẹnẹ vẹ akoechiro rọye kugbe odiri rọye phapharhe? Wa rha karohọ nẹ arodọvwẹ rọye herọ re ovwan vwo kurhẹriẹ.

⁵Vwe evun rẹ udu rẹ ovwan na ovwan re koko abe kẹ oma rẹ ovwan vwẹ ẹdẹ ophu rọye vwẹ ọke rẹ ọvwata rẹ Ọghẹnẹ da cha vwẹ orhiebro rọye phia.

⁶Kidie ọ cha hwa osa kẹ ohwo kohwo kirobo rẹ iruo rọye epha.

⁷Ihwo re vwẹ erhiori ru omamọ rẹ iruo re guọnọ urinrin vẹ ọghọ kugbe erhi ro jeghwo, kọ vwẹ arhọ ri bẹdẹ kẹ ayen.

⁸Ẹkẹvuọvo vwọ kẹ ihwo re guọnọ ohẹriẹ re vwẹ ọghọ kẹ uyota na-a, ẹkẹvuọvo ri mu ọghọ kẹ evun umwemwu, ke mrẹ ivun emiovwo vẹ ophu.

⁹Ukpokpogho vẹ enuebro kọ dia kẹ ohwo kohwo ro ru umwemwu, ẹsosuọ kẹ ihwo ri Ju kugbe ihwo ri Grik rhe,

¹⁰ẹkẹvuọvo urinrin kugbe ọghọ kugbe ufuoma kọ dia kẹ ohwo kohwo ro ru ọ rẹ esiri, ẹsosuọ kẹ ihwo ri Ju kugbe ihwo ri Grik rhe.

¹¹Kidie Ọghẹnẹ ghwẹ oma ho ẹbẹre ọvo jẹ ọvo vwo-o.

¹²Ihwo ri ru umwemwu vwẹ obuko rẹ urhi je cha ghwọrọ vwẹ obuko rẹ urhi, ayen ejobi ri ru umwemwu vwẹ otọ rẹ urhi kẹ urhi na gu ayen ẹdjọ.

¹³Ọ dia ihwo ri nyo urhi eye hẹ ọvwata vwẹ obaro rẹ Ọghẹnẹ-ẹ, ẹkẹvuọvo e re vwẹ urhi na ru iruo eye re rease.

¹⁴Ọke rẹ ihwo rẹ Keferi ri vwo urhi na-a de ru obo rẹ urhi na guọnọre, yẹ ayen hẹ urhi na kẹ omaobọ rẹ ayen, dede na jẹ ayen vwo urhi na-a.

¹⁵Ayen dje phia nẹ e si obo rẹ urhi na guọnọre phihọ udu rayen, yẹ udu rayen ghwe se oseri kẹ ayen, yẹ iroro rayen rọ tagha ku ghwe brẹ hwe eyẹ brẹ kẹ ayen.

¹⁶Vwẹ ẹdẹ yena, kirobo rẹ iyẹnrẹ esiri mẹ epha, Ọghẹnẹ ko guẹdjọ rẹ odjahọ rẹ ihwo vwẹ oma ri Kristi Jesu.

¹⁷Ẹkẹvuọvo wo de se oma wẹn ohwo ri Ju wọ da vwẹ oma da urhi na wọ da vwẹ obo ru wọ vẹ Ọghẹnẹ epha yan eyan,

¹⁸wọ da riẹn ọhọre rọye ru wo de vughe obo ri yovwiri, fikiridie a vwẹ urhi na yono uwe,

¹⁹ro de mu uwe ẹro nẹ wẹ kẹ osun rẹ orhuẹro na, urhukpẹ kẹ otu re hẹ ebri,

²⁰ọ ro dje kẹ ẹkpa, oyono rẹ imitete, rẹ urhi na hirhe phihọ erianriẹn vẹ uyota kẹ —

²¹wẹ ro yono ihwo efa na, wo gbi rhe yono oma wẹn? We ro ghwoghwo nẹ e cho uji-i, ku wọ rhoma cho uji?

²²Wẹ rọ ta nẹ e gbe igberadja-a, ku wo rhe gbe igberadja? Wẹ rọ ta nẹ a gọ ẹdjọ-ọ, ku wọ rhoma gọ ẹdjọ?

²³Wẹ rọ vwẹ urhi yan eyan na, ku wọ rha vwẹ orukuruku wẹn miovwo urhi rẹ Ọghẹnẹ?

²⁴Kidie, kirobo re siro, otu ri Keferi na phọphọ odẹ rẹ Ọghẹnẹ fiki rẹ ovwan.

²⁵Ọyanvwe vwẹ ọ rẹ uyota vẹ erere ọ da dianẹ wọ yọnrọn urhi na; ẹkẹvuọvo wo de gbe urhi na ku, oyanvwe wẹn ko hirhe phihọ ijẹyanvwọ.

²⁶Ohwo rọ yanvwere-e da yọnrọn urhi na, wo rhe roro nẹ e kere ijẹyanvwọ rọye phihọ oyanvwe kẹ?

²⁷Wo rhe roro nẹ ijeyanvwọ rọ yọnrọn urhi na se brorhiẹ wẹ rọ vwẹ urhi na yan eyan rọ chọ urhi na?

²⁸Ohwo ri Ju rẹ unu ofefe dia omamọ rẹ ohwo ri Ju-u, eyẹ oyanvwe rẹ ohọroma dia omamọ rẹ oyanywe-e.

²⁹Ẹkẹvuọvo omamọ rẹ ohwo ri Ju vwenẹ, ọye ohwo rọ diarọ nẹ otọ rẹ evun rhe, rẹ oyanvwe rọye nẹ evun rẹ udu rhe kugbe ọ rẹ erhi ọ dia ọ rẹ unu ofefe-e. Rẹ ejiro rọye dia ọ rẹ ohwo rẹ akpọ-ọ ẹkẹvuọvo obọ rẹ Ọghẹnẹ o nurhe.