Read urhobo Rom 5 Bible Online

Rom 5 - urhobo bible

Rom 5

¹Rẹ avwanre vwọ rease fiki rẹ esegbuyota rẹ avwanre nure na, e gbe jẹ avwnare vẹ Ọghẹnẹ rhuẹrẹ kugbe vwẹ oma ri Jesu Kristi Ọrovwavwanre.

²Oma rọye avwanre wan vwo ẹserọphẹ rẹ avwanre mudia phihọ na, avwanre ke ghọghọ vwẹ iphiẹrohọ nẹ avwanre vwo ẹkẹn vwẹ urinrin rẹ Ọghẹnẹ na.

³Ọ je dia ọye ọvo-o, avwanre je ghọghọ vwẹ evun rẹ oja rẹ avwanre, vẹ ẹriẹn nẹ oja nẹrhẹ e vwo odiri,

⁴odiri nẹrhẹ e vwo uruemu, uruemu kọ nẹrhẹ e vwo iphiẹrohọ,

⁵iphiẹrohọ na sa phiẹn ohwo-o, fikiridie e ku ẹguọnọ rẹ Ọghẹnẹ phihọ udu rẹ avwanre vwẹ oma rẹ Erhi Ọfuanfon na ra vwọ kẹ avwanre.

⁶Kọye ọke rẹ avwanre rhe vwo ọchuko-o na, vwẹ ọke ro shehọ Kristi de rhi ghwu kẹ oruimwemwu.

⁷Kidie, ọ pha bẹnbẹn ra vwọ mrẹ ohwo ọvo ro ghwu kẹ ọvwata, — dede na ọkeọvo a me mrẹ ohwo ọvo ro yivwi ghwu kẹ ohwo esiri.

⁸Ẹkẹvuọvo Ọghẹnẹ dje ẹguọnọ rọye kẹ avwanre nẹ ọke rẹ avwanre vwọ hẹ iruimwemwu Kristi de rhi ghwu kẹ avwanre.

⁹Asakiephana, rẹ ọbara rọye vwo brorhiẹ kẹ avwanre nu na, ko ji ghwe sivwi avwanre nẹ ophu rẹ Ọghẹnẹ fiki rọye.

¹⁰Ọ da dianẹ ọke rẹ avwanre vẹ ọye vwọ hẹ ọvweghrẹ na a da vwẹ ughwu rẹ Ọmọ rọye vwọ rhuẹrẹ avwanre vẹ Ọghẹnẹ kugbe, kẹ eriyin na, vwẹ asakiephana rẹ avwanre vwọ rhuẹrẹ kugbe nu na, avwanre ke rhọ fiki rẹ arhọ rọye.

¹¹Ọ dia ọtiọye ọvo-o, ẹkẹvuọvo avwanre je ghọghọ rhe vwẹ oma rẹ Ọghẹnẹ fiki rẹ Ọrovwavwanre Jesu Kristi, rẹ avwanre wan oma rọye vwo arhuẹrẹ phihọ.

¹²Kirobo rẹ umwemwu wan oma rẹ ohwo ọvo rhe akpọ rẹ ughwu da wan oma rẹ umwemwu rhe na, ọtiọye na ughwu da hrabọ ro ihwo ejobi fikiridie ihwo ejobi ru umwemwu —

¹³uyota umwemwu ghene hẹ akpọ na tavwe rẹ urhi ke rhe dia, ẹkẹvuọvo a rha vwẹ umwemwu ba keri-i fikiridie ye ji ji urhi na-a.

¹⁴Dede na yẹ ughwu herọ nẹ ọke rẹ Adam rhe rhi te Mosis, eriyin ọ je epha kẹ otu ri ru umwemwu kirobo rẹ Adam ruru-u, kọye oka rẹ ohwo rọ cha na.

¹⁵Ẹkẹvuọvo ẹserọphẹ na rha họhọ urhi ẹchọ-ọ. Kidie ọ da dianẹ ihwo buebu ghwuru vwẹ oma rẹ urhi ẹchọ rẹ ohwo ọvo, eriyin na ẹsẹrophẹ rẹ Ọghẹnẹ kugbe ẹsẹrophẹ rẹ ohwo ọvo na Jesu Kristi bu phihọ kẹ otu buebu.

¹⁶Ẹserọphẹ yena rha họhọ oja rẹ umwemwu rẹ ohwo ọvo yena-a. Kidie orhiẹ re bruru fiki rẹ umwemwu rẹ ohwo ọvo yena ọye hẹ obruhwe, ẹkẹvuọvo ẹserọphẹ ro nene urhi ẹchọ obuebu yena da vwẹ ase-ẹriọ rhe.

¹⁷Ọ da dianẹ, fiki rẹ urhi ẹchọ rẹ ohwo ọvo na, ughwu da vwẹ fiki rẹ ohwo ọvo na rhe, eriyin ọ je dia kẹ ayen otu re reyọ ẹserọphẹ obuebu yena kugbe ẹsẹrọphẹ re ọvwata na vwo arhọ vwẹ oma rẹ ohwo ọvo na Jesu Kristi.

¹⁸Etiyin na rẹ urhi ẹchọ rẹ ohwo ọvo na vwọ nẹrhẹ obruhwe dia kẹ ihwo ejobi, ọtiọye na uruemwu rẹ ọvwata rẹ ohwo ọvo na kọ nẹrhẹ esiobọ nẹ ohwo ji kugbe arhọ kẹ ihwo buebu.

¹⁹Kidie obo ri ijọghọevwo rẹ ohwo ọvo ru ihwo buebu phihọ iruimwemwu na, ọtiọye na ọghọemuo rẹ ohwo ọvo rhe ru ihwo buebu phihọ ọvwata.

²⁰Ukuko rọye urhi da rhe, rhi ru urhi ẹchọ na bu phihọ; ẹkẹvuọvo asan rẹ umwemwu de bu, etiyin ẹserọphẹ de me buẹ.

²¹Ọtiọye na, kirobo rẹ umwemwu suẹn vwẹ evun rẹ ughwu na, ọtiọye rhe ẹserọphẹ je wan oma rẹ ọvwata su re te arho ri bẹdẹ vwẹ oma ri Jesu Kristi Ọrovwavwanre.