Read urhobo 1 Kọrẹnt 1 Bible Online

1 Kọrẹnt 1 - urhobo bible

1 Kọrẹnt 1

¹Pọl, re seri vwẹ ọhọre rẹ Ọghẹnẹ nẹ ọ rhe dia ọyinkọn ri Kristi Jesu, kugbe oniọvo rẹ avwanre Sọstẹnis.

²Vwo rhe ishọshi rẹ Ọghẹnẹ rọ hẹ Kọrẹnt, vwo rhe ihwo re rufon vwẹ evun ri Kristi Jesu, re seri ne rhe dia ihwo efuanfon kugbe ayen ejobi re hẹ kasan kasan ri se odẹ rẹ Ọrovwavwanre Jesu Kristi, ọye hẹ Ọrovwohwo rayen kugbe ọ rẹ avwanre.

³Ẹserọphẹ kugbe ufuoma ro nẹ obọ rẹ Ọghẹnẹ Ọsẹ rẹ avwanre kugbe Ọrovwohwo Jesu Kristi nene ovwan dia.

⁴Me kpẹvwẹ Ọghẹnẹ kọke kọke kẹ ovwan fiki rẹ ẹserọphẹ rẹ Ọghẹnẹ ra vwọ kẹ vwẹ vwẹ evun ri Kristi Jesu,

⁵nẹ vwẹ idjerhe kidjerhe ọye ovwan vwo fe vwẹ evun rọye vwẹ ephẹrẹ ejobi kugbe erianriẹn ejobi —

⁶mrẹmrẹ kirobo rẹ iseri ri Kristi gan te vwẹ ohri rẹ ovwan —

⁷nẹ ẹse rẹ erhi na sa kanre ovwa-an, rẹ ovwan vwọ hẹrhẹ ẹvwọphia rẹ Ọrovwavwanre Jesu Kristi;

⁸rọ cha yọnre ovwan rhi te oba, rere we vwo jẹ abe-ẹriọ vwẹ ẹdẹ rẹ ẹcha rẹ Ọrovwavwanre Jesu Kristi.

⁹Ọghẹnẹ ohwo rẹ uyota, oma rọye a wan se ovwan rhe okugbe rẹ Ọmọ roye, Jesu Kristi Ọrovwavwanre.

¹⁰Me rẹ ovwan, imoni mẹ, vwẹ odẹ rẹ Ọrovwavwanre Jesu Kristi, nẹ ovwan ku evun gbe nẹ ohẹriẹ rha dia vwẹ ohri rẹ ovwa-an, ẹkẹvuọvo rere ovwan ku evun gbe ọvo rere we bru orhiẹ ọvo.

¹¹Imoni mẹ, ihwo rẹ uwevwi ri Kloi nẹ iyẹnrẹ kẹ vwẹ nẹ ẹghwọ herọ vwẹ ohri rẹ ovwan.

¹²Obo re me ta na na nẹ ohwo ọvo vwẹ usun rẹ ovwan tanẹ, Mẹvwẹ ọ ri Pọl, eyẹ mẹvwẹ ọ rẹ Apolọs, eyẹ mẹvwẹ o ri Kifas, eyẹ mẹvwẹ ọ ri Kristi.

¹³A ghare Kristi? A kanre Pọl mu agbagba kẹ ovwan? Eyẹ a vwẹ ame kẹ ovwan vwẹ odẹ ri Pọl?

¹⁴Me kpẹvwẹ Ọghẹnẹ nẹ me vwẹ ame kẹ ohwo ọvnọvo-o jokpa ri Krispọs kugbe Gaeọs;

¹⁵ọ rha dia ọtiọye-e ohwo ọvo da rha tanẹ a vwẹ ame kẹ we vwẹ odẹ mẹ.

¹⁶(Me je ghene vwẹ ame kẹ evwruwevwi ri Stifinas. Ọye de no nu, me rha riẹn se me je vwẹ ame kẹ ohwo ọfa-a.)

¹⁷Kidie Kristi ju vwe nẹ me rhe vwẹ ame kẹ ihwo-o ẹkẹvuọvo nẹ mi re ghwoghwo iyẹnrẹ esiri na, ọ dia ọ rẹ aghwanre rẹ ohwo-o, e de rhe si ogangan rọ hẹ agbagba ri Kristi na no.

¹⁸Kidie ota rẹ agbagba na hẹ ugheghẹ kẹ otu re ghwọrọ kuẹfia, ẹkẹvuọvo kẹ ogangan rẹ Ọghẹnẹ kẹ avwanre re sivwẹ rhọ na.

¹⁹Kidie e siro, Me ghwọrọ aghwanre rẹ ọvwẹghwanre, erianriẹn rẹ ọ rọ mariẹn ko she fia.

²⁰Tivọ ọvwẹghwanre na he epha? Tivọ osiọbe na epha? Tivọ ọgbaphro rẹ oge na epha? Ọ dianẹ Ọghẹnẹ hirhe aghwanre rẹ akpọ na phihọ ugheghẹ?

²¹Kidie, vwẹ evun rẹ aghwanre rẹ Ọghẹnẹ, akpọ na gbe vwẹ aghwanre yena riẹn Ọghẹnẹ na-a, o de jẹ Ọghẹnẹ nẹ vwẹ oma rẹ ugheghẹ rẹ avwanre ghwoghwo na o vwo se sivwi ayen otu ri segbuyota.

²²Kidie ihwo ri Ju guọnọ eka ihwo ri Grik ke rha guọnọ aghwanre,

²³ẹkẹvuọvo avwanre ghwoghwo Kristi ra kanre mu agbagba na, uchukurhe umwemwu kẹ otu ri Ju ke rha vwẹ ughẹghẹ kẹ otu ri Keferi,

²⁴ẹkẹvuọvo kẹ otu re seri, ihwo ri Ju kugbe ihwo ri Grik, Kristi hẹ ogangan rẹ Ọghẹnẹ kugbe aghwanre rẹ Ọghẹnẹ.

²⁵Kidie ugheghẹ rẹ Ọghẹnẹ ghwanre nọ ọ rẹ ihwo, ovwiẹre rẹ Ọghẹnẹ ọ ga oma nọ ọ rẹ ihwo.

²⁶Kidie imoni mẹ, we gbe roro use rẹ ovwan na; ọ dia ovwan buebu re ghwanre kirobo rẹ aghwanre rẹ akpọ na epha-a, ọ dia buebu re ganre-e, ọ dia buebu e vwiẹri phihọ okporua-a;

²⁷ẹkẹvuọvo Ọghẹnẹ jẹ otu rẹ akpọ se ọvwugheghẹ na reyọ rere ọ vwọ phọphọ ọvwẹghwanre, Ọghẹnẹ jẹ obo rẹ akpọ se ọvwiẹre reyọ rere ọ vwọ phọphọ otu re ganre.

²⁸Ọghẹnẹ jẹ otu ri kpotọ kugbe otu ra jẹfia vwẹ akpọ na reyọ, obo re herọ dede-e, rere o vwo hirhe obo re herọ dẹn na vwọ hẹ emu diodi,

²⁹rere ohwo rẹ akpọ vwo jẹ eyan ẹyan vwẹ obaro rẹ Ọghẹnẹ.

³⁰Ọye hẹ esiri rẹ arhọ wẹn vwẹ evun ri Kristi Jesu, ọye Ọghẹnẹ ru phihọ aghwanre rẹ avwanre, ọvwata, orufuọn kugbe ẹtanhirhe rẹ avwanre;

³¹fiki rẹ ọtiọye na, kirobo re siro, Jẹn ohwo rọ yan eyan ejobi, vwẹ Ọrovwohwo yan eyan.