Read urhobo 1 Kọrẹnt 15 Bible Online

1 Kọrẹnt 15 - urhobo bible

1 Kọrẹnt 15

¹Imoni, me guọnọre nẹ me karohọ ovwan, iyẹnrẹ esiri ri mi ghwoghwo kẹ ovwan, rẹ ovwan reyọre, rẹ ovwan mudia phihọ,

²ra wan oma rọye sivwi ovwan, ọ da dianẹ ovwan yọnerọ ga — jokpa nẹ ovwan di segbuyota ghevweghe.

³Kidie ọye hẹ obo ri me yovwi re me reyọre re me vwọ kẹ ovwan, nẹ Kristi ghwu kẹ imwemwu rẹ avwanre kirobo rẹ ọbe ọfuanfon na tarọ,

⁴nẹ e shiro, nẹ o vrẹnushi vwẹ ẹdẹ rerha kirobo rẹ ọbe ọfuanfon na tarọ,

⁵nẹ ọ vwẹ oma phia kẹ Kẹfas, tavwe ọ ke vwẹ oma phia kẹ ihwivẹ na.

⁶Tavwẹ ọ ke je vwẹ oma phia kẹ imoni ri bunọ ujori iyori ẹsiẹvo, buebu rọye je hẹ akpọ rhi te nonẹ na, dede na buebu rẹ ayen ji ghwure.

⁷Ọ ke je vwẹ oma phia kẹ Jems, eriyin ji te iyinkọn na ejobi.

⁸Ukuko rọye ejobi, ọ ke vwẹ oma phia kẹ vwẹ, ohwo ra fobọ vwiẹ-ẹ.

⁹Kidie mẹvwẹ hẹ ọyinkọn rẹ ọkuko, ro fori re se ọyinkọ-ọn, kidie mi mu kpahe ishọshi rẹ Ọghẹnẹ.

¹⁰Ẹkẹvuọvo vwẹ ẹserọphẹ rẹ Ọghẹnẹ me vwọ hẹ obo re me epha na, ẹserọphẹ rọ vwọ kẹ vwẹ na rha dia ọ ri ghevweghe-e. Kidie me wian gan nọ ayen ejobi, dede na ọ dia omẹvwẹ-ẹ, ẹkẹvuọvo ẹserọphẹ rẹ Ọghẹnẹ rọ hẹ evun mẹ.

¹¹Owenẹ ọ dia omẹvwẹ eyẹ ayen, ọtiọye avwanre ghwoghwori ọtiọye ovwan ji segbuyota.

¹²Asakiephana e de ghwoghwo nẹ Kristi vrẹn nẹ ughwu rhe, komavọ evo rha vwọ tanẹ evrẹnushi rẹ otu ri ghwuru herọ-ọ?

¹³Ẹkẹvuọvo ọ da dianẹ evrẹnushi rẹ otu ri ghwuru herọ-ọ, yi Kristi rhe vrẹn nẹ ughwu-u;

¹⁴ọ da dianẹ Kristi rhe vrẹn nẹ ughwu-u, yẹ eghwoghwo rẹ avwanre ki ghevweghe esegbuyota rẹ ovwan ki ghevweghe.

¹⁵Yọ gbe dia obo rẹ Ọghẹnẹ epha kọye avwanre djeri-i, fikiridie avwanre se oseri nẹ Ọghẹnẹ kpare Kristi nẹ ughwu, da yo vrẹnri-i ọ da dianẹ ghine hẹ uyota nẹ irivwi rhe vrẹn nẹ ughwu-u.

¹⁶Kidie ọ da dianẹ irivwi rhe vrẹn nẹ ughwu-u, yi Kristi rhe vrẹn nẹ ughwu rhe-e.

¹⁷Ọ da dianẹ Kristi rhe vrẹn nẹ ughwu rhe-e, yẹ esegbuyota rẹ ovwan kẹ ofefe yẹ ovwan je hẹ evun rẹ umwemwu rẹ ovwan.

¹⁸Yẹ otu re vwerhẹre vwẹ evun ri Kristi ghwọrọ kufia.

¹⁹Iphiẹrohọ rẹ avwanre vwọ kpahe Kristi da dia ọ rẹ akpọ nana ọvo, avwanre keye hẹ ihwo re me vwerhi kẹ nọ ihwo ejobi.

²⁰Ẹkẹvuọvo vwẹ ọ rẹ uyota Kristi ghine vrẹn nẹ ughwu rhe, ọye hẹ omamọ rẹsosuọ rẹ ayen otu ri ke ghwu.

²¹Kidie kirobo rẹ ughwu wan oma rẹ ohwo ọvo rhe, ọtiọye evrenushi rẹ otu ri ghwuru je wan oma rẹ ohwo ọvo rhe.

²²Kidie kirobo rẹ ihwo ejobi wan oma rẹ Adamu ghwu, ọtiọye rhe vwẹ oma ri Kristi ihwo ejobi ke cha rhọ.

²³Ẹkẹvuọvo dohwo dute rọye. Kristi kẹ omamo rẹsosuọ, kẹsiẹye o ki rhi te otu ri Kristi vwẹ ọke rẹ ẹcha rọye.

²⁴Tavwe rẹ oba na ki rhi te, ọke rọ da ghwọrọ isuesun kisuesun kugbe ọrho kugbe ogangan nu kọ vwẹ uvie na kẹ Ọghẹnẹ rẹ Ọsẹ na.

²⁵Kidie ọ re rhiri bẹsiẹ rọ vwọ vwẹ ivwighrẹ rọye hwa otọ kẹ chiyi.

²⁶Ughwu hẹ ọvweghrẹ rọ ka uko rọ cha ghwọrọ.

²⁷Kidie Ọghẹnẹ vwẹ emu na ejobi hwa otọ kẹ chiyi nure. Ẹkẹvuọvo ọke rọ vwọ tanẹ, A vwẹ emu na ejobi hwa otọ kẹ chiyi, o phẹri nẹ e phiẹrohọ ohwo rọ cha vwẹ emu na ejobi hwa otọ kẹ chiyi.

²⁸Ọke ra da vwẹ emu na ejobi hwa otọ kẹ chiyi nu, ekpuyovwi rẹ Ọmọ na kọ je vwẹ oma kpotọ kẹ ohwo rọ vwẹ emu na ejobi hwa otọ kẹ chiyi na, rere Ọghẹnẹ vwọ dia kemu kemu kẹ ohwo ọvuọvo.

²⁹Ọ rha dia ọtiọye-e, kidie a rha vwọ vwẹ ame kẹ ihwo vwẹ odẹ rẹ otu ri ghwuru? Ọ da dianẹ irivwi rhe vrẹn kakaka-a, kidie a rha vwọ vwẹ ame kẹ ihwo vwẹ ọde rayen?

³⁰Kidie me rha vwọ hẹ ukpokpogho rẹ ughwu kọke kọke?

³¹Me phrọ ọnana, imoni, vwẹ oma rẹ eyan rẹ me yan vwẹ evun ri Kristi Jesu Ọrovwavwanre, mi ro ghwẹ kẹdẹ kẹdẹ!

³²Didi erere ri te vwe ọ da dianẹ, me ta ọnana kerẹ ohwo rẹ akpọ, re me vẹ eranvwe vwọ họnre vwẹ Ẹfesọs? Ọ da dianẹ irivwi rhe vrẹn nẹ ughwu-u, E gbe jẹn avwanre re re a da, kidie odẹ rọ cha na ki me ghwẹ.

³³Wo jẹ a phiẹn wẹ-ẹn: Otu umwemwu gbe uruemu esiri kuẹ.

³⁴Nabọ vwẹ udu kpotọ, wo gbi ruẹ imwemwu ọfa-a. Kidie ẹvo vwọ erianriẹn rẹ Ọghẹnẹ na-a. Me ta ọnana rere oma vwọ vo ovwan.

³⁵Ẹkẹvuọvo evo ke cha nọ nẹ, Mavọ irivwi vrẹn wan? Didi oghẹrẹ rẹ oma ayen che vwo vrẹn?

³⁶Wẹ ẹkpa na! Obo ru wọ kọnre na sa djẹ rhe-e jokpa nẹ o ghwuru tavwe.

³⁷Obo ru wọ kọnre na ọ dia oma ro che vwo vwobo ọye wọ kọnre-e, ẹkẹvuọvo ubi diodi, ọkeọvo ubi rẹ ọka eyẹ oghẹre rẹ ọka ọfa.

³⁸Ẹkẹvuọvo Ọghẹnẹ vwẹ oma kẹ kirobo ro jere, kuẹ ubi kuẹ oma rọye.

³⁹Kidie uvwo na ejobi dia oghẹre ọvo-o, ẹkẹvuọvo uvwo ọvo ọ rẹ ihwo, ọfa ọ re eranvwe, ọfa ọ rẹ ephran, ofa ọ rẹ eri.

⁴⁰Oma rẹ obo odjuvwu herọ oma rẹ akpọ na herọ; ẹkẹvuọvo urinrin rẹ obo odjuvwu na san, urinrin rẹ akpọ na san.

⁴¹Urinrin ọvo ọ rẹ ọnre, ọfa ọ rẹ emeranvwe, urinrin ọfa ọ rẹ isio; isio ọvo fẹnẹ isio ọfa vwẹ urinrin.

⁴²Ọtiọye evrẹnushi rẹ irivwi epha. Obo ra kọnre na obo re ghwọrọ, obo re cha varhe na obo ri jẹ ghwọrọ.

⁴³A kọnrọ vwi jẹ ọghọ evwo, ọ varhe vwẹ urinrin. A kọnrọ vwẹ ovwiẹre, ọ varhe vwẹ ogangan.

⁴⁴A kọnrọ vwẹ ugboma diodi, ọ varhe vwẹ ugboma rẹ erhi. Ọ da dianẹ ugboma diodi herọ, ọtiọye ugboma rẹ erhi je herọ rhe.

⁴⁵Kenẹ e siro, Ohwo rẹsosuọ Adam da rhe dia ohwo ọkpokpọ; Adam rọ ka uko da rha dia ohwo rọ kẹ erhi rọ kẹ arhọ.

⁴⁶Ẹkẹvuọvo ọ dia ọ rẹ erhi na re dia ohwo rẹsosuọ-ọ ẹkẹvuọvo ọ rẹ ugboma na, tavwe ro ki rhi te ọ rẹ erhi.

⁴⁷Ohwo rẹsosuọ na otọ o nurhe, ohwo rẹ ẹkpẹn; ohwo rivẹ na odjuvwu o nurhẹ.

⁴⁸Kirobo rẹ ohwo rẹ ekpẹn na epha, ọtiọye otu rẹ ekpẹn na je epha; kirobo rẹ ohwo rẹ odjuvwu epha, ọtiọye otu rẹ odjuvwu je epha.

⁴⁹Ọtiobo rẹ avwanre ku uhoho rẹ ohwo rẹ ekpẹn phihọ na, avwanre ji che ku uhoho rẹ ohwo rẹ odjuvwu phihọ.

⁵⁰Me ta ọnana kẹ ovwan, imoni; nẹ ugboma vẹ ọbara sa reuku rẹ uviẹ rẹ Ọghẹnẹ na-a, eyẹ obo re ghwọrọ sa reuku rẹ obo ri jẹ ghwọrọ-ọ.

⁵¹Nighe igbunu me ta kẹ ovwan na. Avwanre ejobi cha vwerhẹ-ẹ, ẹkẹvuọvo e che wene avwanre ejobi,

⁵²vwẹ ọmọke na, vwẹ ẹroẹbrẹ na, rẹ owanre rẹ obo oba na. Kidie owanre na che hworo, irivwi na ki che vrẹn vwi jegbo, ke che wene avwanre.

⁵³Kidie oma nana ro ghwẹ na ko che ku oma ro jeghwo phihọ.

⁵⁴Ọke rẹ oma ro ghwẹ na de ku oma ro jeghwo phihọ, yẹ ota ra tare re siri na gbare nẹ, A rọ ughwu vwẹ obọẹkparọ.

⁵⁵Ẹ ughwu, obọẹkparọ wẹn rhọ? E ughwu, obi wẹn rhọ?

⁵⁶Obi rẹ ughwu ọye hẹ umwemwu, ogangan rẹ umwemwu ọye hẹ urhi.

⁵⁷Ẹkẹvuọvo ẹkpẹvwẹ kẹ Ọghẹnẹ, rọ kẹ avwanre obọẹkparọ vwẹ oma rẹ Ọrovwavwanre Jesu Kristi.

⁵⁸Ọtiọye na, imoni mẹ re ghare, mudia gan, wo yeghe oma-a, dje ebuo-ebuo phihọ vwẹ iruo rẹ Ọrovwohwo, vẹ ẹriẹn nẹ owian re wọ wian kẹ Ọrovwohwo ghwruru-u.