Read urhobo 1 Kọrẹnt 2 Bible Online

1 Kọrẹnt 2 - urhobo bible

1 Kọrẹnt 2

¹Imoni mẹ, ọke ri mi vwo bru ovwan rhe, ọ dia eta ride ifefe eyẹ aghwanre mi vwo ghwoghwo iseri rẹ Ọghẹnẹ na kẹ ovwa-an.

²Kidie mi veri nẹ me riẹn emuọvo vwẹ ohri rẹ ovwa-an jokpa ri Jesu Kristi kugbe ọ ra kanre mu agbagba na.

³Me vẹ ovwan da dia vwẹ ovwiẹrẹ kugbe oshọ rode kugbe ẹphariẹ.

⁴Eta mẹ kugbe ovuẹ mẹ dia eta rẹ avwerhe rẹ aghwanre-e, ẹkẹvuọvo vwẹ idjedje rẹ Erhi na vẹ ogangan,

⁵rere esegbuyota rẹ ovwan vwọ je dia ọ rẹ aghwanre rẹ ihwo ẹkẹvuọvo vwẹ ọ rẹ ogangan rẹ Ọghẹnẹ.

⁶Vwẹ ohri rẹ ihwo rẹ ghwanre kẹ ọye avwanre de yono aghwanre, dede na yọ dia aghwanre rẹ oge nana-a eyẹ ọ rẹ isun rẹ oge nana-a, ri che ghwrẹ kuẹfia na.

⁷Ẹkẹvuọvo avwanre yono obo re sinu, aghwanre rẹ Ọghẹnẹ rọ djahere, rẹ Ọghẹnẹ ji iji kpahe rhabae vwọ kẹ urinrin rẹ avwanre.

⁸Isun rẹ oge nana ọvnọvo vwo ẹruọ rẹ ọnana-a; kidie ọ dianẹ kẹ ayen vworo, ayen a rha kanre Ọrovwohwo rẹ urinrin na mu agbagba-a.

⁹Ẹkẹvuọvo, kirobo re siro, Obo rẹ ẹro je mrẹ dẹvo-o, eyẹ erhọn ji nyo-o, eyẹ udu rẹ ohwo rẹ akpọ ji roro phia-a, obo rẹ Ọghẹnẹ rhuẹrẹ phihọ otọ kẹ ayen otu re guọnerọ,

¹⁰Ọghẹnẹ vwe rọ phia kẹ avwanre vwẹ oma rẹ Erhi na. Kidie Erhi na guọnọ kemu kemu ejobi phia, mrẹmrẹ emu okokodo rẹ Ọghẹnẹ.

¹¹Kidie didi ohwo re sa riẹn iroro rẹ ohwo jokpa rẹ erhi rẹ ohwo na rọ hẹ evun rọye? Ọtiọye rhe ohwo ọvuọvo sa riẹn iroro rẹ Ọghẹnẹ-ẹ jokpa rẹ Erhi rẹ Ọghẹnẹ.

¹²Asakiephana ọ dia erhi rẹ akpọ na avwanre vwori-i, ẹkẹvuọvo Erhi na ro nẹ obọ rẹ Ọghẹnẹ rhe na, rere avwanre se vwo ẹruọ rẹ ẹse na rẹ Ọghẹnẹ ru kẹ avwanre na.

¹³Avwanre ki yono ọnana vwẹ eta ra vwẹ aghwanre rẹ ohwo rẹ akpọ yono-o ẹkẹvuọvo rẹ Erhi na yonori, re fan otọ rẹ uyota rẹ erhi na vwọ kẹ ayen otu ri vwo Erhi na.

¹⁴Ohwo ro vwo erhi na-a se vwo ẹse rẹ Erhi rẹ Ọghẹnẹ na-a, kidie ugheghẹ ọ dia kẹ, o se vwo ẹruọ rọye-e fikiridie erhi e vwo dje ayen.

¹⁵Ohwo rẹ erhi na guẹdjọ rẹ emu ejobi, ẹkẹvuọvo yẹ ohwo ọvuọvo se vwo guẹdjọ-ọ.

¹⁶Kidie kono riẹn iroro rẹ Ọrovwohwo rere o vwo se yono? Ẹkẹvuọvo avwanre vwo iroro ri Kristi.