Read urhobo 1 Kọrẹnt 6 Bible Online

1 Kọrẹnt 6 - urhobo bible

1 Kọrẹnt 6

¹Ọke rẹ ọvo vwẹ usun rẹ ovwan na vẹ omoni rọye de vwo ẹghwọ, ko se ẹdjọ vwẹ ẹguare ri Keferi ro gbobọnyẹ ukoko rẹ ihwo efuanfon na?

²Ovwan rha riẹn nẹ ihwo efuanfon na ri che guẹdjọ rẹ akpọ na? Ọ da dianẹ ovwan ri che guẹdjọ rẹ akpọ na, udu rẹ ovwan rha sa gba erharhe rẹ ẹdjọ nana-a?

³Ovwan rha riẹn nẹ avwanre cha vwẹ emakashe guẹdjọ-ọ? Komavọ ọ epha kẹ ẹdjọ rẹ akpọ nana!

⁴Ọ da dianẹ ovwan vwo eghẹre rẹ eta tiọnana, die ovwan vwọ vwẹ ayen rhe otu ri fi emuọvo kẹ ishoshi na-a?

⁵Me ta ọnana rere oma vwọ vo ovwan. Kọye ohwo rọ ghwanre ọvuọvo rha hẹ ohri rẹ ovwan ro se brorhiẹ rẹ imoni na,

⁶rẹ oniọvo de siọbe se oniọvo, vwẹ ẹguare rẹ ihwo ri je segbuyota?

⁷Ọye omaẹphọphọ kẹ ovwan rẹ ohwohwo vwo siọbe se ohwohwo vwẹ ẹguarẹ. Kidie we gbi diẹ oruchọ na phihọ oma-a? Kidie a gbe ghwa wẹ ria-a?

⁸Ẹkẹvuọvo ekpuyovwi rẹ ovwan ghwa ihwo ria ovwan ji ru ayen chọ, marho kẹ imoni rẹ ovwan na dẹn.

⁹Ovwan rha riẹn nẹ ihwo umwemwu cha sa reuku rẹ uvie rẹ Ọghẹnẹ na-a? Wo jẹ a phiẹn wẹ-ẹn; ọvwọfanrhiẹ, eyẹ ọgedjọ, eyẹ o gbe igberadja, eyẹ ọshare ro duẹ ọshare,

¹⁰eyẹ iji, eyẹ ọvwurhuru, eyẹ ọgbidi, eyẹ ọharhekan, eyẹ ogborhugborho sa reuku rẹ uvie rẹ Ọghẹne na-a.

¹¹Ọtiọye evo vwẹ usun rẹ ovwan na epha jovwo. Ẹkẹvuọvo a họ ovwan, e ru ovwan fon, ovwan rease vwẹ odẹ rẹ Ọrovwohwo Jesu Kristi kugbe Ẹrhi rẹ Ọghẹnẹ rẹ avwanre.

¹²Emu na ejobi wan urhi kẹ vwẹ, ẹkẹvuọvo yẹ emu na ejobi fori-i. Emu na ejobi wan urhi kẹ vwẹ, ẹkẹvuọvo ye me cha dia ọviẹn rẹ emu ọvuọvo-o.

¹³A ma emuọre vwọ kẹ egede egede vwọ kẹ emuọre — yẹ Ọghẹnẹ cha guọghọ tọna tọye. A ma oma na kẹ ọfanrhiẹ egbe-e, ẹkẹvuọvo vwọ kẹ Ọrovwohwo, Ọrovwohwo rha vwọ kẹ oma na.

¹⁴Ọghẹnẹ da kpare Ọrovwohwo vrẹn kọ je kpare avwanre vrẹn vwẹ ogangan rọye.

¹⁵Ovwan rha riẹn nẹ oma rẹ ovwan na ekuakua rẹ oma ri Kristi? Ke me vwẹ ekuakua ri Kristi vwo ru ekuakua rẹ igberadja? Kaka bẹdẹ!

¹⁶Ovwan rha riẹn nẹ ohwo ro kuoma gbe igberadja yẹ ọ vẹ ọye kẹ oma ọvo? Kidie, kirobo re siro, Ayen ivẹ na ke cha dia oma ọvo.

¹⁷Ẹkẹvuọvo ohwo ro kuoma gbe Ọrovwohwo ọ vẹ ọye kẹ ọvo vwẹ erhi.

¹⁸Si oma nẹ ọfanrhiẹ. Kumwemwu kumwemwu ọfa obo uphẹphẹ ọ epha; ẹkẹvuọvo ohwo ro gbe ọfanrhiẹ ru umwemwa kpahe oma rẹ obọ rọye.

¹⁹Ovwan rha riẹn nẹ oma rẹ ovwan hẹ uwevwi rẹ Erhi Ọfuanfon na rọ hẹ evun rẹ ovwan, rẹ ovwan vwo nẹ obọ rẹ Ọghẹnẹ rhe? Wo vwo oma wẹ-ẹn;

²⁰o vwo unuigho ra de wẹ. Ọtiọye na gba vwẹ urinrin kẹ Ọghẹnẹ vwẹ oma wẹn.