Read urhobo 2 Kọrẹnt 10 Bible Online

2 Kọrẹnt 10 - urhobo bible

2 Kọrẹnt 10

¹Mẹvwẹ, Pọl, rẹ ovwan, vẹ omaevwo-kpotọ kugbe edẹndẹn ri Kristi — mẹvwẹ rọ vẹ udu rẹ oshọ vwẹ ọke re me vẹ ovwan de hirhe opharo ku ohwohwo, ẹkẹvuọvo ro yivwaro vwẹ obuko rẹ ovwan! —

²me rẹ ovwan nẹ ọke re me da hẹ etiyin mi vwo jẹ aroeyivwo vẹ udu ọgangan ọtiobo ri mi vwo kpahe otu evo ri roro kpahe avwanre nẹ avwanre nenesi rẹ ekuakua rẹ akpo na.

³Kidie dede nẹ avwanre dia evun rẹ akpọ na yo dia ofovwi rẹ akpọ na avwanre phiẹ-ẹ.

⁴Kidie ekuakua rẹ avwanre vwo phiẹ ofovwi na dia e rẹ akpọ na-a ẹkẹvuọvo ọgangan rẹ obenu a vwọ guọghọ ẹgba egangan na.

⁵Avwanre guọghọ aphro kugbe eyan ri hirhe phihọ ukọn kẹ erianriẹn rẹ Ọghẹnẹ, rọ da vwẹ iroro kiroro vwo ru ọviẹn re e vwo jẹ ọghọ emuọ kẹ Kristi,

⁶rọ chọma ro vwo hwe ijẹọghọ emuo kijẹọghọ emuọ, vwẹ ọke rẹ ọghọ rẹ ovwan da rhe gba nu.

⁷Ni obo re hẹ obaro rẹ ovwan. Ọ da dianẹ ohwo ọvo vwẹ ẹro so nẹ ọye ohwo ri Kristi, e gbe jẹn ọ karohọ oma rọye nẹ kirobo re ọye epha vwẹ oma ri Kristi, ọtiọye avwanre epha.

⁸Kidie ọ da tobọ dianẹ me vwẹ ogangan rẹ avwanre vwori yan eyan bunọ emerha, rẹ Ọrovwohwo vwọ kẹ avwanre nẹ a vwọ kpọ ovwan vi na o dianẹ kọ ra vwọ guọghọ ovwa-an, ye oma rha sa vo ovwẹ-ẹ.

⁹Ọ gbe rha họhọ obo re me da vwẹ ẹbe djẹ uguegue muẹ ovwa-an.

¹⁰Kidie ayen ta, Ẹbe rọye vwo ọnye e ke je gan, ẹkẹvuọvo ugboma rọye epha puẹchẹ, ota rọye rue emuọvo-o.

¹¹Gbe jẹn ọ ro ihwo etiọye nẹ obo rẹ avwanre ta phihọ ọbe vwẹ obuko, ọye avwanre ruẹ vwẹ ọke rẹ avwanre da hẹ etiyin.

¹²Ọ dianẹ kẹ avwanre phi oma phihọ eyẹ kẹ avwanre vwẹ oma dje ayen otu ri jirẹ oma rẹ aye-en. Ẹkẹvuọvo ọke rẹ ayen da vwẹ oma rẹ ayen vwavwa ohwohwo, rẹ ayen da vwẹ oma dje ohwohwo, yẹ ayen vwo ẹruọ-ọ.

¹³Ẹkẹvuọvo avwanrẹ gbe yan eyan vrẹn ọtiọye-e, ẹkẹvuọvo avwanre ke yan ba asan rẹ Ọghẹnẹ ghare kẹ avwanre, rere avwanre vwo se te ovwan.

¹⁴Kidie avwanre rha sa riẹn vrẹn asan rẹ oma rẹ avwanre bare-e, kerẹsiẹ ra da mrẹ nẹ avwanre te ovwa-an, avwanre hẹ ihwo rẹsosuọ re ka vwẹ iyẹnre esiri ri Kristi na bru ovwan rhe.

¹⁵Avwanre rha yan eyan vrẹn ọtiọye, vwẹ owian rẹ ihwo efa-a; ẹkẹvuọvo iphiẹrohọ rẹ avwanre ke ọna nẹ kirobo rẹ esegbuyota rẹ ovwan vwo buẹ na, ako rẹ owian rẹ avwanre vwẹ ohri rẹ ovwan kọ rhọ phihọ,

¹⁶ọtiọye na avwanre ki se ghwoghwo iyẹnre esiri na vwẹ etọ re hẹ abọ oboyi rẹ ovwan, ọ rha dia ọ rẹ eyan rẹ iruo re ruru vwẹ ako owian rẹ ohwo ọfa-a.

¹⁷Jẹn ohwo rọ yan eyan, vwẹ Ọrovwohwo yan eyan.

¹⁸Kidie o dia ohwo ro jiri oma rọye ọye a reyọ-ọ, ẹkẹvuọvo ohwo rẹ Ọrovwohwo ji ri.