Read urhobo 2 Kọrẹnt 11 Bible Online

2 Kọrẹnt 11 - urhobo bible

2 Kọrẹnt 11

¹Mi rori nẹ we vwo odiri kẹ ughenghẹn mẹ emerha. Biko vwo odiri!

²Me hẹ evu rẹ omaẹriọ ro nẹ obenu rhe kpahe ovwan, kidie me sa ovwan vwọ hẹ otọ kẹ Kristi rere ovwan dia omamọ rẹ ọpha kẹ ọshare ọvuọvo na.

³Ẹkẹvuọvo oshọ mu vwẹ nẹ kirobo rẹ ọrọdekọ vwẹ ona phiẹn Ivi na, iroro rẹ ovwan che ghwru nẹ omamọ rẹ ẹga ru we vwo kẹ Kristi.

⁴Kidie ọ da dianẹ otu evo rhere rhi ghwoghwo Jesu ọfa nọ ọvuọvo na rẹ avwanre ghwoghwori na, eyẹ ovwan de vwo erhi ọfa san nọ rẹ ovwan vwori jovwo na, eyẹ ovwan da rha reyọ iyẹnre esiri ọfa nọ rẹ ovwan reyọre na, yọ ọphẹrẹ ovwan reyọ nọ.

⁵Mi rori nẹ me hanvwe nọ otu nana ri mu odẹ rẹ ọyinkọn bara oma na-a.

⁶Owẹnẹ mi jẹ ota ẹriẹn ta dede, yẹ erianriẹn kanre ovwẹ-ẹ; avwanre dje ọnana phia kẹ ovwan vwẹ emu ejobi.

⁷Ki mi ru umwemwu re me vwọ vwẹ oma mẹ kpotọ rere a vwọ kpare ovwan kpenu, fikiridie mi ghwoghwo iyẹnre esiri rẹ Ọghẹnẹ na kẹ ovwan ọphọphẹ?

⁸Mi cho ishọshi efa re me vwọ reyọ ọchuko mie ayen rere me vwọ mrasan ga ovwan.

⁹Re me vẹ ovwan vwọ herọ rọ vwọ bẹn vwẹ, mi kru oghwa nyẹ ohwo ọvuọvo-o, kidie imoni ri nẹ Masidonia rhe kẹ vwẹ obo re me guọnọre. Vwẹ ọtiọye na ki mi si oma reyọ ki mi ghine si oma mẹ reyọ me rha dia oghwa kẹ ovwan vwẹ idjerhe ọvuovo-o.

¹⁰Kirobo rẹ uyota ri Kristi hẹ evun mẹ, ubrakpọ rẹ Akaya se gbe eyan nana re me yan na vwọ hẹ ovwẹ unu-u.

¹¹Kidie sorọ? Fikiridie me guọnọ ovwa-an? Ọghẹnẹ riẹnre nẹ me guọnọ ovwan!

¹²Obo ri mi ruẹ na ọye mi ji ru, rere ayen otu re vwẹ iruo rẹ ayen ruru vwọ yan eyan na vwọ mre vughe nẹ obo rẹ ayen ruẹ vẹ ọ rẹ avwanre dia abọvo-o.

¹³Kidie ihwo etieye na hẹ iyinkọn rẹ efian, iruiruo rẹ ophiẹvwe, re vwẹ oma nẹ nẹ ayen iyinkọn ri Kristi.

¹⁴A gbe ta-a, kidie ekpuyovwi rẹ Idẹbono vwẹ oma nẹ kerẹ amakashe rẹ urhukpe.

¹⁵Ọtiọye na ọ rhe gbe unu-u ọ da dianẹ idibo rọye je vwẹ oma nẹ kerẹ idibo rẹ ọvwata. Oba rẹ ayen vẹ uruemu rẹ ayen che she phihọ vwẹ obọ.

¹⁶Me vwariẹ obo re me ta na, e jẹn ohwo ọvuọvo vwẹ ovwẹ roro ẹkpa-a; ọ da tobọ dianẹ wo ru ọtiọye, reyọ ovwẹ kerẹ ẹkpa, rere me vwọ yoma emerha.

¹⁷(Obo re me ta na me tarọ vwẹ ogangan rẹ Ọrovwohwo-o ẹkẹvuọvo kerẹ ẹkpa, rọ vwẹ ugheghẹ yoma,

¹⁸rẹ ihwo buebu vwọ vwẹ ekuakua rẹ akpọ na yan eyan na, ke me je yoma rhe.)

¹⁹Kidie wo se vwo odiri kẹ ẹkpa vẹ omavwerhovwẹ, kidie yẹ ekpuyovwi rẹ ovwan ghwanre!

²⁰Kidie wo se vwo odiri ọ da dianẹ ohwo vwẹ owẹ ru ọviẹn, eyẹ rọ da ghwa wẹ ria, eyẹ ro de she nyẹ wẹ, eyẹ ro de muẹ oma kpenu, eyẹ rọ da ghwiẹ wẹ opharo.

²¹Me ta ọnana kẹ omaẹvuọ mẹ, me tare nẹ, avwanre vwiẹre nọ kẹ ọyena. Ẹkẹvuọvo kemu kemu rẹ ohwo sa vwọ yan eyan — me ta ọnana kerẹ ẹkpa — me je sa yoma rẹ ọyena.

²²Ayen Ihwo ri Hibru? Ọtiọye me je epha. Ayen Ihwo rẹ Izrẹl? Ọtiọye me je epha. Ayen uvwiẹ rẹ Ebraham? Ọtiọye me je epha.

²³Ayen idibo ri Kristi? Mi yovwi nọ ayen — me ta ota kerẹ ọrhuẹ — vwẹ owian buebu, vwẹ uwodi buebu, vwẹ ehwe o vwo unu-u, edegbe ughwu vwẹ okẹ buebu.

²⁴Asiyori ihwo ri Ju fa vwẹ abọ ọgban gbẹ irhiri kerẹ urhi rẹ efafa rayen.

²⁵Asiarha a vwẹ ọkpọ fa vwẹ; e phi vwẹ obọvo. Okọ shu vwẹ asiarha; ason ọvo kugbe ẹdẹ ọvo mi vwo bo vwẹ evun rẹ abadi;

²⁶oyan phẹre phẹre, vwẹ ukpokpogho rẹ urhie, oshọ rẹ igbunegbu, ukpokpogho rẹ ihwo mẹ, ukpokpogho rẹ ihwo ri Keferi, ukpokpogho vwẹ evun rẹ orere, ukpokpogho vwẹ evun rẹ aghwa, ukpokpogho vwẹ abadi, ukpokpogho rẹ imoni rẹ efian;

²⁷vwẹ omaẹlaghọ vẹ ọbẹnvwẹ, ovwerhẹ ẹgha vwẹ ason buebu, vwẹ owẹvwe vẹ urhuru rẹ ame, ọkẹ buebu o vwo emuọre-e, vwẹ ekpahe vẹ orhuoghi.

²⁸Vwọ ba enana ejobi, Ọghwa re kẹdẹ kẹdẹ ri mi mu ghwa kẹ ẹnwan rẹ ishọshi na ejobi.

²⁹Ono oma rhọ, rẹ oma de jẹ uvwe ẹrhọ? Ono ri sheri, rẹ ivun de jẹ uvwe emiovwo?

³⁰Ọ da dianẹ ke me yan eyan, ke me yan eyan rẹ obo ri dje ovwiẹre mẹ phia.

³¹Ọghẹnẹ kugbe Ọsẹ rẹ Ọrovwohwo Jesu, ohwo ra vwẹ ebruba kẹ bẹdẹ, riẹnre nẹ me vwọnrọn ọfia-an.

³²Vwi Damaskọs, osun na vwẹ otọ rẹ Ovie Arẹtas da gba riariẹ orere ri Damaskọs rere e shabọ họ ovwẹ,

³³ẹkẹvuọvo a da vwẹ obere lọrọ ovwẹ wan evakpo rọ hẹ igbẹhẹ rhe otọ, me da djẹ vabọ.