Read urhobo 2 Kọrẹnt 13 Bible Online

2 Kọrẹnt 13 - urhobo bible

2 Kọrẹnt 13

¹Ọnana obọ rerha ri mi vwo bru ovwan cha na. Tavwe rẹ urhi ki mu ohwo a me mrẹ iseri ivẹ eyẹ erha ri se muo.

²Me ta kẹ ayen otu ri ru umwemwu jovwo kugbe efa ejobi, me je ta kẹ ayen asakiephana re me hẹ etiyi-in na, kirobo ri mi ruru re me vẹ ovwan vwọ herọ vwẹ ẹcha mẹ rivẹ, nẹ me da rhọma rhe mi che ni ohwo opharo-o —

³rẹ ovwan vwọ guọnọ oka nẹ Kristi re ta ota vwẹ evun mẹ na. Ọ dia ọvwiẹrẹ vẹ ovwan gbe ruẹ na-a, ẹkẹvuọvo ogangan rode vwẹ evun rẹ ovwan.

⁴Kidie a kaerọ mu agbagba vwẹ ovwiẹrẹ, ẹkẹvuọvo jọ herọ vwẹ ogangan rẹ Ọghẹnẹ. Kidie avwanre vwiẹre vwẹ evun rọye, ẹkẹvuọvo rẹ avwanre vẹ ovwan vwo ruẹ na avwanre vẹ ọye ke dia vwẹ ogangan rẹ Ọghẹnẹ.

⁵Wa davwe oma rẹ ovwan ni, sẹ ovwan churu obọ mu esegbuyota rẹ ovwan na. Wa davwe oma rẹ ovwan ni. Ovwan rha mrẹ vughe nẹ Jesu Kristi hẹ evun rẹ ovwa-an? — jokpa nẹ udu rẹ ovwan rha gba odavwini na-a!

⁶Mi phiẹrohọ nẹ ovwan cha guọnọ otọ rẹ ọyena mrẹ nẹ avwanre gbi she-e.

⁷Ẹkẹvuọvo avwanre rẹ Ọghẹnẹ rere ovwan vwo je ruo chọ — ọ dianẹ avwanre vwẹ oma nẹ nẹ avwanre wan odavwini na-a, ẹkẹvuọvo rere ovwan vwo ru obo ri yovwiri, dede na ya mrẹ kerẹsiẹ rẹ avwanre e de she.

⁸Kidie avwanre se ru emu ọvuọvo rọ chọre kpahe uyota na-a, ẹkẹvuọvo obo re dia uyota.

⁹Kidie oma vwerhe avwanre vwẹ ọke rẹ avwanre da hẹ ọvwiẹrẹ rẹ ovwan da rha gan oma. Obo rẹ avwanre nẹ ẹrhovwo kẹ na, kẹ ọna nẹ, ovwan yovwi phihọ.

¹⁰Mi si ọnana vwẹ ọke re me vwọ hẹ asa oshesheri kẹ ovwan, rere ọke re me da rhe mi vwo jẹ aroesio vwẹ ogangan rẹ Ọrovwohwo vwọ kẹ vwẹ ni mi vwo ru iruo kẹ ovwan fiki rẹ ebanbọn ọ dianẹ kẹ ekporo she-e.

¹¹Ọ rọ ka oba, imoni, kẹ ẹdẹfa. Wa rhuẹrẹ idjerhe rẹ ovwan, wa kerhọn rẹ ota mẹ, ovwan ohwohwo ro ohwo, wa dia vwẹ ufuoma, Ọghẹnẹ rẹ ẹguọnọ kugbe ufuoma ko nene ovwan dia.

¹²We yere ohwohwo vẹ unuẹfiọnfiọn ọfuanfon.

¹³Ihwo efuanfon na ejobi yere ovwan.

¹⁴Ẹserọphẹ rẹ Ọrovwohwo Jesu Kristi kugbe ẹguọnọ rẹ Ọghẹnẹ kugbe ugbeyan rẹ Erhi Ọfuanfon nene ovwan ejobi dia.