Read urhobo 2 Kọrẹnt 6 Bible Online

2 Kọrẹnt 6 - urhobo bible

2 Kọrẹnt 6

¹Rẹ ayen vẹ ọye vwo ru iruo kuẹgbe na, avwanre ke rẹ ovwan nẹ, ovwan rha reyọ ẹserọphẹ rẹ Ọghẹnẹ na ghevweghe-e.

²Kidie ọ tare nẹ, Me kerhọn rẹ ovwan vwẹ ọke ro shephihọ, me cha ovwan uko vwẹ ẹdẹ rẹ esivwo. Nighe, asakiephana hẹ ẹdẹ ro shephihọ na; nighe, asakiephana hẹ ẹdẹ rẹ esivwo na.

³Avwanre phi ọghrọrọ phihọ idjerhe rẹ ohwo ọvuọvo-o, rere e vwo jẹ ogbeku ẹmrẹ vwẹ odiboegbe rẹ avwanre,

⁴ẹkẹvuọvo avwanre dje oma rẹ avwanre phia kerẹ idibo rẹ Ọghẹnẹ vwẹ idjerhe kidjerhe: vwẹ oma rẹ akoechiro rode, vwẹ oma ẹlaghọ, vwẹ obẹnvwẹ, okpetu,

⁵efafa, uwodi, edo, owian, ẹrhẹrẹ, owẹvwe;

⁶vwẹ evun ẹfuọn, erianriẹn, odiri, arodọvwẹ, Erhi Ọfuanfon na, omamọ rẹ ẹguọnọ,

⁷ota rẹ uyota, kugbe ogangan rẹ Ọghẹnẹ; vwẹ ekuakua rẹ ọvwata vwẹ obọrhe vẹ obọhwẹre;

⁸vwẹ ọghọ vẹ ijọghọ evwo, vwẹ odẹ omiomiovwi vẹ odẹ oyoyovwi. Kẹ ru avwanre kerẹ ihwo ri muẹ ọrho bare oma, yẹ ayen ihwo rẹ uyota;

⁹kerẹ ihwo re jẹ riẹn, yẹ a riẹn ayen yoyovwi; kerẹ ihwo ri ghwẹ, nighe yẹ avwanre herọ; kerẹ ihwo re hweri, yẹ ayen ghwuru-u;

¹⁰kerẹ ihwo re reoja, yẹ ayen ghọghọ kọke kọke; kerẹ ivwiogbere, yẹ ayen nẹrhẹ ihwo buebu fe; kerẹ ihwo ri vwo emuọvo-o, yẹ ayen vwo emu kemu.

¹¹Unu rẹ avwanre rhie phihọ kẹ ovwan, E ihwo ri Kọrẹnt; udu rẹ avwanre rhie phihọ.

¹²Avwanre gba ovwan abọ-ọ, ẹkẹvuọvo ẹguọnọ rẹ ovwan ọvo re gba ovwan.

¹³Obo ri mi ru — Ke me ta ota kẹ ovwan kerẹ imitete — we gbe rhie udu rẹ ovwan phihọ rhe.

¹⁴Ovwan vẹ ihwo ri Keferi gba-a. Didi okugbe ọvwata vẹ orukuruku vwori? Eyẹ didi okugbe urhukpẹ vẹ ebri vwori?

¹⁵Didi okugbe re herọ kẹ Kristi vẹ Bẹliai? Eyẹ die otu ri segbuyota vẹ otu ri je segbuyota vwo kẹ oma?

¹⁶Didi ẹrhọvwọkugbe uwevwi rẹ ẹga rẹ Ọghẹnẹ vẹ ọ rẹ ẹdjọ vwo kugbe? Kidie avwanre hẹ uwevwi rẹ ẹga rẹ Ọghẹnẹ ri bẹdẹ na; kirobo rẹ Ọghẹnẹ tare, Ke me dia evun rẹ ayen ke me yan vwẹ ohri rẹ ayen, ke me dia Ọghẹnẹ rayen, ayen ke dia ihwo mẹ.

¹⁷Fiki rẹ ọtiọye na gbe vrẹn nẹ ohri rẹ ayen, gba hẹriẹ oma nẹ ayen, eriyin Ọrovwohwo tare, Wọ vwẹ obọ te emu ogbegbe-e; ki mi dede ovwan reyọ

¹⁸ke me dia ọsẹ kẹ ovwan, ovwan ke dia emeshare mẹ vẹ emetẹ mẹ, eriyin Ọrovwohwo ro vwo Ẹgba na tare.