Read urhobo 2 Kọrẹnt 8 Bible Online

2 Kọrẹnt 8 - urhobo bible

2 Kọrẹnt 8

¹Imoni, avware jẹ ovwan riẹn, vwọ kpahe eserọphẹ ra vwọ kẹ ishọshi re hẹ Masidonia,

²kidie vwẹ evun rẹ odavwini vwẹ ukpokpogho ọgangan, aghọghọ rayen vwẹ evun rẹ ogbere rọde na de rhi hirhe phihọ efe vẹ obọ esiono buebu vwẹ ẹbẹrẹ rayen.

³Kidie ayen da ke kirobo rẹ ayen vwo bu te, kirobo ri mi se oseri kpahọ, ayen tobọ vwẹ ọhọrobọ rayen kẹ bunọ obo rẹ ayen vwọ te.

⁴Ayen ke tobọ rẹ avwanre nẹ a kẹ ayen uphẹ rẹ ayen ji vwo obọ vwẹ arhọghọ re torọ rhe ihwo efuanfon na.

⁵Ọnana, dia obo rẹ avwanre phiẹrohọ jovwo-o, ẹkẹvuọvo ayen de ke siobọ nẹ oma rẹ ayen kẹ Ọrovwohwo vẹ avwanre vwẹ ọhọre rẹ Ọghẹnẹ.

⁶Ọtiọye dẹn kọye avwanre vuẹ Taitọs nẹ kirobo rọ ghwa tuọn phihọ na, o gbe ghwe ru iruo rẹ arodọvwẹ na gba vwẹ ohri rẹ ovwan.

⁷Asakiephana rẹ ovwan vwọ ka enu vwi kemu kemu na — vwẹ esegbuyota, vwẹ ephẹrẹ ejẹ, vwẹ erianriẹn, vwẹ ẹnwan ẹruọ, vwẹ ẹguọnọ rẹ ovwan kẹ avwanre — gba mrẹ nẹ wọ je ka enu vwẹ iruo rẹ arodọvwẹ nana rhe.

⁸Me ta ọnana ọ dianẹ kerẹ urhi-i, ẹkẹvuọvo re vwo dje ọdavwẹ rọye kẹ ihwo efa nẹ ẹguọnọ rẹ ovwan ghine omamọ rhe.

⁹Kidie ovwan riẹn ẹserọphẹ rẹ Ọrovwavwanre Jesu Kristi na nẹ, dede nẹ obo ro fe te na, yẹ fiki rẹ avwanre ọ da rhe dia ogbere, rere vwẹ oma rẹ ogbere roye avwanre vwọ mrasan fe.

¹⁰Uche mi brẹ vwẹ oma rẹ ota nana: o yoma kẹ ovwan vwẹ asakiephana ru we ru iruo ru we muphiho rhawe ukpe na gba, ọ dianẹ kẹ eruo ọvo-o ẹkẹvuọvo oruru re vwo ruo.

¹¹Omaecha wẹn vwẹ ẹguọnọ kugbe obo ru wo vwori ru wo vwo ruo gba me dia ẹrhẹnrẹ.

¹²Kidie omaecha na da hẹ etiyin, ka sa reyọ kirobo rẹ ohwo na vwori, o dianẹ kirobo rẹ ohwo na je evwo-o.

¹³O dianẹ, ke me tanẹ ihwo efa fiabọ rere e kru oghwa na nyẹ ovwa-an,

¹⁴ẹkẹvuọvo rere emu na ejobi vwọ dia abavo. Siobọ nẹ obo ru wo vwori buebu vwẹ ọke nana kẹ ayen otu re guọnọ, rere ayen je sa kẹ wẹ obuebu vwẹ obo rẹ ayen vwori, rere ọ vwọ sa dia ẹrhẹnrhẹnre.

¹⁵Kirobo re siro, O rọ ghwe koko buebu vwo emu ọvuọvo ro chekọ-ọ, ọ rọ ghwe emerha koko ọ je kanrọ-ọ.

¹⁶Ẹkẹvuọvo ẹkpẹvwẹ kẹ Ọghẹnẹ ro phi ẹnwẹn rẹ ẹro evwote rẹ ovwan ọvuọvo na phihọ udu ri Taetọs.

¹⁷Kidie ọ dianẹ ota rẹ avwanre na ọvo ọ reyọre-e, ẹkẹvuọvo fiki robo rọ vwọ ro ẹnwan rẹ ovwan na koye ọ vwọ vwẹ ọhọrobọ rọye bru ovwan cha na.

¹⁸Avwanre ji oniọvo na ro kperi usi vwẹ ishọshi na ejobi vwẹ eghwoghwo rẹ iyẹnrẹ esiri na vwọ ba cha.

¹⁹Ọ dia ọye ọvo-o, ẹkẹvuọvo ishọshi na vwiro mu nẹ ọ yan nene avwanre rhe vwẹ iruo rẹ arodọvwẹ nana rẹ avwanre ruẹ na, fiki rẹ urinrin rẹ Ọrovwohwo kugbe rere o vwo dje ọhọre esiri re avwanre phia.

²⁰Avwanre guọnọre nẹ ohwo ọvuọvo harhe avwanre vwẹ oma rẹ ẹse nana rẹ avwanre rhievun ruẹ na-a,

²¹kidie ọ dianẹ obo ri vwo ọghọvwẹ obaro rẹ Ọrovwohwo ọvo avwanre roro-o ẹkẹvuọvo ji te obaro rẹ ihwo rẹ akpọ.

²²Avwanre ji oniọvo rẹ avwanre, rẹ avwanre davwini, rẹ avwanre je vwẹ ẹro so vwẹ ọke ejobi vwi kemu kemu vwọ ba ayen rhe, ẹkẹvuọvo kọye rha ma ro ẹnwan rẹ ovwan fiki rẹ ẹro rọ vwọ so ovwan gangan.

²³Vwọ kẹ Taitọs, ọye hẹ ọko mẹ kugbe usun mẹ ri ruẹ iruo kẹ ovwan na; ra vwọ kẹ imoni rẹ avwanre na, ayen kẹ iyinkọn rẹ ishọshi na, urinrin ri Kristi na.

²⁴Vwẹ otiọye na gbe dje oka rẹ ẹguọnọ wẹn kugbe eyan wẹn kpahe ihwo nana phia kẹ ishọshi na.