Read urhobo Galesha 1 Bible Online

Galesha 1 - urhobo bible

Galesha 1

¹Pọl rẹ ọyinkọn (ọ dianẹ o rẹ ihwo-o, eyẹ obọ rẹ ihwo o nurhe-e, ẹkẹvuọvo vwẹ oma ri Jesu Kristi kugbe Ọghẹnẹ rẹ Ọsẹ na, rọ kpare Jesu Kristi nẹ ughwu).

²Kugbe imoni na ejobi re vẹ ovwẹ gba herọ, mi si ọbe nana rhe Ishọshi re hẹ otọ ri Galesha.

³Ẹserọphẹ vẹ ufuoma ro nẹ obọ rẹ Ọghẹnẹ rẹ ọsẹ rhe, kugbe obọ rẹ Ọrovwavwanre Jesu Kristi nene ovwan dia;

⁴ohwo rọ reyọ oma rọye vwo ru ẹse kẹ avwanre rere ovwo se sivwi avwanre nẹ umwemwu rẹ akpọ nana vwẹ ọtiobo ro de fo kẹ ẹserọphẹ rẹ Ọghẹnẹ rẹ ọsẹ rẹ avwanre.

⁵Ọye a vwẹ urinrin ejobi kẹ bẹdẹ bẹdẹ. Isẹ.

⁶O gbe vwe unu gangan ra vwọ fobọ sa phiẹ ovwan nẹ idjerhe nana kpo ọfa, nẹ iyẹnrẹ esiri rẹsnosnọ re vwo rhe ovwan vwẹ ẹserọphẹ ri Jesu Kristi na.

⁷Nighe, ikun egbe rẹ iyẹnrẹ esiri ọfa gbe herọ vrẹn ọnana-a; ẹkẹvuọvo, yẹ ihwo ẹvo herọ re guọnọ obo rẹ ayen vwo se ku idjerhe rẹ iyẹnrẹ esiri ri Jesu Kristi na rhẹriẹ.

⁸Ẹkẹvuọvo, ọ da tobọ dianẹ kẹ ekpuyovwi rẹ avwanre nana ọvo, eyẹ amakashe rẹ odjuvwu rhe gbe ikun rẹ iyẹnrẹ esiri ọfa rọ dia ọ rẹsuosuọ na-a, yẹ ohwo yena vwo ekan rẹ Ọghẹnẹ.

⁹Ọtiobo rẹ avwanre tare jovwo na, eriyin me je rhoma ta na, ohwo kohwo da rhoma ta iyẹnrẹ esiri ọfa kẹ ovwan vrẹn ọ rẹsuosuọ na, re ovwan reyọre jovwo na, e jẹn ekan rẹ Ọghẹnẹ dia kẹ ohwo yena.

¹⁰Ugbeyan rẹ ihwo me guọnọ dia vwo, gbenẹ ugbeyan rẹ Ọghẹnẹ? Eyẹ me guọnọ re mi ru obo ri je ihwo? Mi de ru obo ri je ihwo ye me gbe dia odibo ri Kristi-i.

¹¹Kidie me guọnọ nẹ ovwan riẹn ọnana, imoni, nẹ iyẹnrẹ esiri ri mi ghwoghwo kẹ ovwan na dia iyẹnrẹ esiri rẹ ohwo-o.

¹²Kidie ọ dia obọ rẹ ohwo rẹ akpọ na me da reyọ-ọ, eyẹ kẹ obọ rẹ ohwo rẹ akpọ na mi de yono-o, ẹkẹvuọvo Jesu Kristi ọvo vwe rọ phia kẹ vwẹ.

¹³Kidie ovwan nyo ikun mẹ jovwo, re me vwọ hẹ egagọ ri Ju, obo ri mi kpokpo Ishọshi rẹ Ọghẹnẹ te rere a vwọ ghwọrọ kufia.

¹⁴Me riẹn egagọ ri Ju na gangan nọ edje mẹ na ejobi re hẹ ohri rẹ ihwo mẹ, oruru rẹ uruemu re esẹ ride de mu vwe gangan.

¹⁵Ẹkẹvuọvo ohwo rọ sanọ ovwẹ nẹ evun rẹ oni mẹ rhe jovwo na, ro se vwe vwẹ ẹserọphẹ rọye,

¹⁶o de je nẹ ọye vwẹ Ọmọ rọye na phia kẹ vwẹ, rere me vwọ mrasan ghwoghwo vwẹ ohri ri Keferi me ka nọ vwẹ obọ re ohwo tavwe-e,

¹⁷eyẹ kpo Jerusalẹm ra nọ vwẹ obọ rẹ otu re karo kẹ vwẹ vwẹ iyinkọn na-a, ẹkẹvuọvo ke me ghwa yanran kpo Arebia; ukoko rọye re, me da rhoma rhe Damaskọs.

¹⁸Re ikpe erha vwọ wan nu, mi de kpo Jerusalẹm ra mrẹ Pita, mi de nene dia ason ihwiori.

¹⁹Ẹkẹvuọvo me gbe mrẹ ọyinkọn ọvuọvo ọfa-a, jokpa ri Jems rẹ oniọvo rẹ Ọrovwohwo na.

²⁰Ọghẹnẹ ye hẹ oseri mẹ, nẹ eta nana ri mi si rhe ovwan na, ọ dia ofian me vwọrọ-ọn.

²¹Kọye me da rhe otọ ri Siria vẹ Silisha.

²²Ihwo ri Ishọshi ri Kristi re hẹ Judia na ejobi ọvuọvo ro riẹn vwẹ vwẹ opharo herọ-ọ.

²³Emu ọvuọvo re ayen nyori kẹ ọna, nẹ ohwo ro ke kpokpo avwanre jovwo na, ọ rhoma kurhẹriẹ, rhi ghwoghwo esegbuyota rẹ iyẹnrẹ esiri na ro kpokpori jovwo na.

²⁴Ayen ejobi de jiri Ọghẹnẹ fiki mẹ.