Read urhobo Galesha 2 Bible Online

Galesha 2 - urhobo bible

Galesha 2

¹Rẹ ẹgbukpe ihwẹnẹ vwọ wan nu, me vẹ Banabas da rhoma kpo Jerusalẹm, me da reyọ Taitọs vwo nene oma ra.

²Vwẹ evun rẹ ẹvwọphia me vwọ yanran ra bẹbẹ gbe ikun rẹ iyẹnrẹ esiri na ri mi ghwoghwo vwẹ ohri ri Keferi na vwọ kẹ otu rẹ iyinkọn na ri kperi usi vwẹ usun rayen, rere iruo ri mi mu phihọ na vwo jẹ orukufia ẹdia.

³Ẹkẹvuọvo ekpuyovwi ri Taitọs rẹ ohwo ri Grik ro nene uvwe ra na, ohwo ọvuọvo gbarọ nẹ ọyanvwe tavwe-e.

⁴Ẹkẹvuọvo, fiki rẹ imoni rẹ efian na re bẹbẹ rhe, ri sioma nu rere ayen vwọ mrẹ otọ rẹ egbemọphẹ rẹ avwanre vwori vwẹ oma ri Kristi Jesu, rere ayen vwọ mrasan vwẹ avwanre ru eviẹn.

⁵avwanre rha kẹ ayen uphẹn kakaka-a, rere a sa vwọ sẹro rẹ uyota rẹ iyẹnrẹ esiri na kẹ ovwan.

⁶Ẹkẹvuọvo, ihwo ẹvo re tanẹ ayen rhoro (yẹ eyena fi emuọvo kẹ vwẹ-ẹ, Ọghẹnẹ ni ikparo rẹ ohwo-o) — ihwo yena, me ta, ri kperi usi na vwẹ emuọvo ba kẹ vwẹ-ẹ.

⁷Ọfa kẹ ọna, rẹ ayen rhi vwo vugbe nẹ a vwẹ iyẹnrẹ esiri rẹ otu ri jẹyanvwọ na vwọ kẹ vwẹ, kirobo ra vwẹ iyẹnrẹ esiri rẹ otu re yanvwere na vwọ kẹ Pita.

⁸Kidie ohwo ọvuọvo ro ru iruo vwẹ oma ri Pita vwọ kẹ ihwo re yanvwere na, ọye na ọvo ji ru iruo vwe oma mẹ vwọ kẹ ihwo ri Keferi

⁹rẹ ayen vwọ mrẹ ẹserọphẹ ra vwọ kẹ vwẹ rẹ, Jems vẹ Pita kugbe Jọn, re dia osunsun na, de rhie evun reyọ ovwẹ vẹ Banabas gangan, nẹ avwanre gbe bru otu ri Keferi ra re ayen rhe bru otu re yanvwere;

¹⁰ayen da ta kẹ avwanre nẹ a karohọ ivwiogbere, emu nana dẹn kọye avwanre phievu phihọ ru gangan; ọtiọna na ye je hẹ evun mẹ jovwo.

¹¹Ẹkẹvuọvo, ri Pita rhi vwo te Antiọk, me da ghwọ kuo vwẹ irharo rọye, fikiridie ọ reabe.

¹²Kidie tavwe rẹ ihwo ẹvo ki nẹ obo ri Jems rhe, ọ vẹ otu ri Keferi na gba ria emu kuẹgbe, ẹkẹvuọvo rọ ghwa vwọ mrẹ ihwo nana nu ọ da hẹriẹ oma rọye reyọ, fiki rẹ oshọ rẹ otu re yanvwere na.

¹³Kọye otu ri Ju ri chekọ de ghwe nene.

¹⁴Ẹkẹvuọvo, mẹ rhe vwọ mrẹ nẹ ayen kpọvi vwẹ oma rẹ uyota rẹ iyẹnrẹ esiri na-a, me da ta kẹ Pita vwẹ irharo rẹ ayen ejobi, Wọwẹ, dede na nẹ we ohwo ri Ju, de yere eyere rẹ ihwo Keferi, ọ gbe rha họhọ otu ri Ju-u, komavọ wọ vwọ gba otu ri Keferi re ayen vwo yeri kerẹ otu ri Ju?

¹⁵Ekpuyovwi rẹ avwanre, re dia ihwo ri Ju vwẹ uvwiẹ re dia Keferi rẹ iruimwemwu-u,

¹⁶dede ye riẹnre nẹ ohwo sa vwi fiki rẹ iruo rẹ urhi na rease-e ẹkẹvuọvo vwẹ oma rẹ esegbuyota vwi Jesu Kristi, mrẹmrẹ avwanre vwo esegbuyota vwẹ Jesu Kristi, rere vwẹ esegbuyota vwẹ oma ri Kristi avwanre vwọ sa rease, ọ dianẹ kẹ fiki rẹ iruo rẹ urhi na-a, fikiridie ọ da dia fiki rẹ iruo rẹ urhi na ohwo ọvuọvo sa rease-e.

¹⁷Ẹkẹvuọvo ọ da dianẹ, rẹ avwanre vwọ pharha ra vwọ rease vwẹ oma ri Kristi ekpuyovwi rẹ avwanre da rhoma rhi hirhe phihọ iruimwemwu, Kristi kẹ ikọn rẹ umwemwu o ruẹ? kaka vwo!

¹⁸Ẹkẹvuọvo ọ da dianẹ me rhoma bọn erọvwọ yena re me guọghọ te otọ jovwo na, yẹ ekpuyovwi mẹ kẹ ohwo ro gbe urhi.

¹⁹Kidie me wan oma rẹ urhi na ghwu kẹ urhi nure rere me vwọ mrasan rhọ kẹ Ọghẹnẹ.

²⁰A kanre ovwẹ vi Kristi mu agbagba nure, ọ gbe dia omẹvwẹ re herọ na-a, ẹkẹvuọvo, kẹ Kristi re herọ vwẹ evun mẹ; akpọ ri mi yere vwẹ esegbuyota rọ hẹ oma rẹ ọmọ rẹ Ọghẹnẹ, rọ guọnọ ovwẹ rọ da vwẹ oma rọye kẹ vwẹ.

²¹Mi jẹ ẹserọphẹ rẹ Ọghẹnẹ kufia-a; kidie ọ da dianẹ ase-ẹriọ kẹ oma rẹ urhi na o wan rhe, yẹ ughwu ri Krisri na gbi fi emuọvo-o.