Read urhobo Galesha 5 Bible Online

Galesha 5 - urhobo bible

Galesha 5

¹Kidie Kristi si avwanre nẹ ọviẹn nure; we gbe mudia gan, wa gbe jẹ oghrọrọ rẹ ọviẹn phihọ ohọre rẹ ovwan ọfa-a.

²Nighe mẹvwẹ, ri Pọl, ta kẹ ovwan nẹ, ovwan da yanvwe Kristi gbi fi emuọvo kẹ wẹ-ẹ.

³Mi se oseri kpahe kohwo kohwo rọ yanvwere nẹ, ọ yọnre irhi na ejobi gbagba.

⁴Ka hẹriẹ ovwan nẹ oma ri Kristi, ovwan re guọnọ rease fiki rẹ urhi na; ovwan she nẹ ẹserọphẹ nure.

⁵Kidie vwẹ oma rẹ Erhi, fiki rẹ esegbuyota, avwanre vwọ hẹrhẹ iphiẹrohọ rẹ ọvwata.

⁶Kidie, vwẹ evun ri Kristi Jesu, oyanvwe kugbe ijẹyanvwọ fi emu ọvuọvo-o; ẹkẹvuọvo esegbuyota ro ru iruo vwẹ evun rẹ ẹguọnọ.

⁷Omamọ rẹ onẹ ovwan djẹ jovwo; kono rha djẹ ovwan nẹ we rhe mu ọghọ kẹ uyota na-a?

⁸Oriẹriẹvwe nana dia obọ rẹ ohwo ro se ovwan na o nurhe-e.

⁹Imi iphuephu tutuno ọye phuẹ ọko na ejobi.

¹⁰Me vwẹ ẹro so Ọrovwohwo nẹ ovwan rha reyọ uyono ọfa nọ ọmẹ na-a; ohwo ro kpokpo ovwan na re cha ghwa ekan rọye, kohwo kohwo rọ ephan ejobi.

¹¹Ẹkẹvuọvo ọ da dianẹ omẹvwẹ, imoni, kọye rha rhoma ghwoghwo oyanvwe, kidie e rhe vwo kpokpo uvwe? Vwe ọtiọye na ye ghwie uchukurhe umwemwu rẹ agbagba na no nure.

¹²Me guọnọre nẹ ihwo ri kpokpo ovwan ejobi na gba ton ibrebru phihọ oma rẹ ayen.

¹³Imoni e se ovwan rhe egbemọphẹ; ovwan rha vwẹ egbemọphẹ rẹ ovwan na nenesi rẹ ugboma-a, ẹkẹvuọvo, vwẹ evun rẹ ẹguọnọ ovwan gbe odibo kẹ ohwoohwo.

¹⁴Kidie ẹ ku urhi na ejobi gbe vwẹ ota ọvuọvo, Wọ me guọnọ ọrivẹ wẹ ọtiobo wọ guọnọ oma wẹ.

¹⁵Ẹkẹvuọvo ọ da dianẹ ovwan ke rhọvwa, ke ria omoma rẹ ovwan ovwan gba riẹn nẹ ovwan cha ghwọrọ omoma rẹ ovwan.

¹⁶Ẹkẹvuọvo me tare nẹ, yan vwẹ evun rẹ Erhi na, we gbi nenesi rẹ ẹguọnọ rẹ ugboma na-a.

¹⁷Kidie ẹguọnọ rẹ ugboma na mu kpahe Erhi na ọtiọye ẹguọnọ rẹ Erhi na ji mu kpahe ugboma na; kidie, ayen ivẹ na ivwighrẹ kẹ ohwohwo, o gbi jẹ uwe ru obo wọ guọnọ ru-u.

¹⁸Ẹkẹvuọvo Erhi na de sun we yu wọ gbe hẹ otọ re urhi na-a.

¹⁹Asakiephana iruo rẹ ugboma na e pha phephẹ; igberadja, ọfanrhiẹ rẹ ehware, jẹ ẹme-enyo,

²⁰ẹdjọ ẹgọ, orhan, ohọnre vẹ ẹghwọ, ohẹriẹ, evun ephuo, ophuemuo, mẹvwẹ marho, emuo kpahe ihwo ride, uyono rẹ efian,

²¹omaẹriọ, ozighẹ, idi ẹda, udu ọ gangan, kugbe uruemu efa etieye na. Ri mi bunu rẹ ayen kẹ ovwan jovwo na nẹ ohwo kohwo ro ro imu nana sa reuku rẹ uvie rẹ Ọghẹnẹ-ẹ.

²²Ẹkẹvuọvo omamọ re Erhi na hẹ ẹguọnọ, aghọghọ, ufuoma, ako echiro, ufuefu, uyoyovwi, esegbuyota,

²³dẹndẹn, oma echiro; enana gbi vwo urhi ọfa ro mu aye-en.

²⁴Ayen ihwo re dia ọ ri Kristi nure, ayen kanre ugboma na vẹ oja rọye kugbe ẹguọnọ rọye mu agbagba nure.

²⁵Ọ da dianẹ avwanre de yeri vwẹ evun re Erhi na, gbe jẹn avwanre yan vwẹ oma rẹ Erhi na.

²⁶E jẹn avwanre ta nẹ oma mẹ te ke vwẹ-ẹ ohwohwo kpare ohwohwo-o ophu-u a reoma kpahe ohwohwo-o.