Read urhobo Ẹfesọs 1 Bible Online

Ẹfesọs 1 - urhobo bible

Ẹfesọs 1

¹Ọbe ri Pọl, ọyinkọn ri Kristi Jesu vwẹ ọhọre rẹ Ọghẹnẹ, Ro si rhe ihwo efuanfon ri vwo esegbuyota kpahe Kristi Jesu:

²Eserọphẹ dia kẹ ovwan kugbe ufuoma ro nẹ obọ rẹ Ọghẹnẹ Ọsẹ rẹ avwanre rhe kugbe Ọrovwavwanre Jesu Kristi.

³Ebruba kẹ Ọghẹnẹ kugbe Ọsẹ rẹ Ọrovwavwanre Jesu Kristi, ro bruphihọ kẹ vwi Kristi vẹ emu buebu rẹ erhi guọnọre vwẹ obo odjuvwu,

⁴mrẹmrẹ kirobo rọ jẹ avwanre reyọ vwẹ evun rọye nẹ ẹtuọhọ rẹ akpọ na rhe, nẹ avwanre fon rere avwanre vwo jẹ abe ẹriọ vwẹ obaro rọye.

⁵O de rhi avwanre vwẹ ẹguọnọ nẹ avwanre dia emọ rọye vwẹ oma ri Jesu Kristi, kirobo rẹ ẹguọnọ rẹ ọhọre rọye epha,

⁶vwọ kẹ ejiro rẹ urinrin rẹ ẹserọphẹ rọye rọ de vwọ kẹ avwanre ọphọphẹ vwẹ evun rẹ Ọrọguọnọre na.

⁷Evun rọye avwanre wan vwo ẹtanhirhe vwẹ oma rẹ ọbara rọye, evwoghovwo rẹ urhi ẹchọ rẹ avwanre, kirobo rẹ ẹserọphẹ rọye bute

⁸rọ de raphiẹ kẹ avwanre.

⁹Kidie ọ nẹrhẹ avwanre riẹn vwẹ evun rẹ aghwanre ejobi kugbe emramrẹ rẹ igbunu rẹ ọhọre rọye, kirobo rẹ ejiroro rọ jẹ kpahe Kristi epha.

¹⁰Iroro kpahe ẹgba rẹ ọke na, ro che vwo kue emu na ejobi gbe vwẹ oma rọye, emu rẹ odjuvwu kugbe emu rẹ akpọ na.

¹¹Vwẹ evun rọye, kirobo rẹ iroro rẹ ohwo ro ru emu na ejobi gba epha kirobo rẹ iroro rẹ ọhọre rọye epha.

¹²Avwanre ihwo ri ke phiẹrohọ Kristi na ke rhi avwanre a da vwẹ avwanre mu nẹ e dia vwọ kẹ ejiro vẹ urinrin rọye.

¹³Vwẹ evun rọye ovwan, ri nyo ota rẹ uyota na, iyẹnrẹ esiri rẹ esivwo rẹ ovwan na, ri de se gbuyota, ka ka oka rẹ ive rẹ Erhi Ọfuanfon na phihọ ayen.

¹⁴Kọye hẹ iviẹnwa rẹ ukuẹriọ rẹ avwanre bẹsiẹ ro ki te avwanre obọ, vwọ kẹ ejiro vẹ urinrin rọye.

¹⁵Fiki rẹ ọnana, ri mi vwo nyo usi rẹ esegbuyota rẹ ovwan kpahe Ọrovwavwanre Jesu kugbe ẹguọnọ rẹ ovwan vwo kpahe ihwo efuanfon na,

¹⁶unu mẹ rha ka vẹ ẹrhovwo re me nẹ kẹ ovwa-an, me karohọ ovwan vwẹ erhovwo mẹ,

¹⁷rere Ọghẹnẹ rẹ Ọrovwavwanre Jesu Kristi, Ọsẹ rẹ urinrin na, sa kẹ ovwan erhi rẹ aghwanre kugbe ẹvwọphia vwẹ evun rẹ erianriẹn rọye,

¹⁸Ọke rẹ ẹro rẹ udu rẹ ovwan de rhie nu, ovwan vwọ sa riẹn obo rẹ iphiẹrohọ rẹ use re se ovwan phihọ na epha, obo rẹ urinrin rẹ ukuẹriọ bute kẹ ihwo efuanfon na.

¹⁹Obo rẹ ọrho rẹ ogangan rọye vwẹ evun rẹ avwanre otu ri sere gbuyota na epha, kirobo rẹ iruo rẹ ẹgba rode rọye epha.

²⁰Ọ ro ru gba vwẹ evun ri Kristi ọke rọ vwọ kparọ nẹ ughwu rhe o de vwo tidia obọrhe rọye vwẹ obo odjuvwu,

²¹ro kpenu nọ ivie ejobi kugbe isuesun ejobi kugbe ogangan ejobi kugbe ubrakpọ ejobi, rọ nọ odẹ kodẹ re se ejobi, ọ dianẹ kẹ oge nana ọvo-o ẹkẹvuọvo ji te oge rọ cha;

²²ọ da vwẹ emu na ejobi hwa otọ kẹ chiyi o de vwo ru olori rẹ emu ejobi vwọ kẹ ishọshi na,

²³kọye hẹ oma rọye, ọvọnvọn rọ vọn ro emu na ejobi oma.