Read urhobo Ẹfesọs 6 Bible Online

Ẹfesọs 6 - urhobo bible

Ẹfesọs 6

¹Emọ na, we mu ọghọ kẹ esẹ vẹ ini rẹ ovwan vwẹ evun rẹ Ọrovwohwo, kidie ọna ri shehọ.

²Mu ọghọ kẹ ọsẹ wẹn vẹ oni wẹn (onana hẹ urhi rẹsosuọ re ve ive phihọ),

³rere o vwo yovwi kẹ wẹ rere wọ vwọ tọn vwẹ akpọ na.

⁴Esẹ na, wa kpare emọ rẹ ovwan ophu-u, ẹkẹvuọvo wa ghẹrẹ ayen vwẹ ẹghwọ kuo kugbe uyono rẹ Ọrovwohwo.

⁵Eviẹn, we mu ọghọ kẹ ihwo re dẹ ovwan vwẹ akpọ na, vẹ ophariẹ vẹ oshọ, kugbe evun ọvo, kirobo ru we ru kẹ Kristi;

⁶ọ dianẹ kẹ avwerhe rẹ unu ofefe-e, re ihwo vwo jiri ovwa-an, ẹkẹvnọvo kerẹ idibo ri Kristi, ri ruẹ ọhọre rẹ Ọghẹnẹ nẹ udu cha,

⁷re vwẹ evun esiri ruẹ iruo kerẹsiẹ re ruo kẹ Ọrovwohwo ọ dia ihwo rẹ akpo-ọ,

⁸vẹ ẹriẹn nẹ kemu kemu esiri rẹ ohwo ruru ejobi, osa rọye ọ je reyọ vwẹ obọ rẹ Ọrovwohwo, owenẹ ọ dia ọviẹn eyẹ ọmuvwiẹ.

⁹Ovwan otu re dẹ ihwo, we ji ru abavo na kẹ ayen, wa djẹ oshọ mu aye-en, riẹn nẹ Ohwo ọvo rọ dẹ ovwan vẹ ayen hẹ obo odjuvwu, o muẹ ọghọ kẹ ohwo ọvo jẹ ọvo vwo-o.

¹⁰Ọ rọ ka oba, wa gan oma vwẹ evun rẹ Ọrovwohwo kugbe ogangan rẹ ẹgba rọye.

¹¹Ghwẹ ekuakua rẹ ofovwi rẹ Ọghẹnẹ vwọ hẹ oma, rere we se vwo mudia hirhe aro ku ophiẹvwe rẹ idẹbono.

¹²Ọ dianẹ ugboma vẹ ọbara a họnra na-a, ẹkẹvuọvo ikpihwo ride, ogangan ride, ihwo ride ri suẹn akpọ rẹ ebri nana, otuofovwi rẹ erhi umwemwu re hẹ obo obenu na.

¹³Vwẹ ọtiọye na gba ghwẹ ekuakua rẹ ofovwi rẹ Ọghẹnẹ phihọ, rere we vwo se mudia gan vwẹ ẹdẹ umwemwu na, we de ru enana ejobi nu, gbe mudia.

¹⁴Mudia koi, vwe uyota na chobiẹ ehun, vwẹ ọghan rẹ ovwata mu arhare,

¹⁵vwẹ iyẹnrẹ esiri rẹ ufuoma na ru isabato kuhọ awọ wẹn.

¹⁶Ọ rọ ka enu gba reyọ ekpọfia rẹ esegbuyota na, kọye wa vwọ kpọ ibiri rẹ erhanre rẹ idẹbono kufia.

¹⁷Gba vwẹ ubierhu rẹ esivwo na tughẹ, kugbe ọlọkọ rẹ Erhi na, kọye hẹ ota rẹ Ọghẹnẹ na.

¹⁸Nẹ ẹrhovwo kọke kọke vwẹ evun rẹ Erhi na, vwẹ ẹrhovwo ẹnẹ ejobi kugbe oyare. Vwẹ ọtiọye na gbe jeje oma vẹ ẹrhiori, rere wa yare oyare kẹ ihwo efuanfon na.

¹⁹Ovwan je rẹ kẹ vwẹ rhe, rere mi vwo vwo aroeyivwo vwo rhie unu mẹ vwo ghwoghwo igbunu rẹ iyẹnrẹ esiri na.

²⁰Fiki rọye me vwọ hẹ ọyinkọn vwẹ igoni na; rere mi vwo se ghwoghwo vẹ udu, kirobo re me sa ta te.

²¹Asakiephana re ovwan vwọ sa riẹn obo re me epha kugbe obo ri mi ruẹ, Taekikọs oniọvo mẹ rẹ ọghaghare na kugbe ogbeodibo rẹ esiri na vwẹ evun rẹ Ọrovwohwo na ko gbe emu ejobi kẹ ovwan.

²²Mi jiro bru ovwan rhe fiki rẹ emu nana ọvo, rere wa vwọ riẹn obo rẹ avwanre epha rere ọ rha je sasa ovwan oma.

²³Ufuoma dia kẹ imoni na, kugbe ẹguọnọ vẹ esegbuyota, ro nẹ obọ rẹ Ọghẹnẹ Ọsẹ na rhe kugbe Ọrovwohwo Jesu Kristi.

²⁴Ẹserọphẹ dia kẹ ayen ejobi re guọnọ Ọrovwavwanre Jesu Kristi vẹ ẹguọnọ ro je ghwo.