Read urhobo Filipae 4 Bible Online

Filipae 4 - urhobo bible

Filipae 4

¹Fiki rẹ eriyin na, imoni mẹ, re me guọnọre rẹ urhuru rẹ ayen si vwe, aghọghọ mẹ kugbe erhu rẹ uvie mẹ, we mudia gan vwẹ evun rẹ Ọrovwohwo, ihwo mẹ rẹ eghaghare.

²Me rẹ Eyudia me rẹ Sintiki rere ayen ivẹ na ku evun gbe vwẹ odẹ rẹ Ọrovwohwo.

³Me je rẹ ovwan rhe, otu mẹ rẹ uyota re me vẹ ayen gbe mu urhekpẹ ọvo na, wa cha eya nana uko, kidie ayen mudia kẹrẹ ovwẹ kpẹkpẹkpẹ vwọ wian owian rẹ iyẹnrẹ esiri na kugbe Klẹmẹnt kugbe ayen otu rẹ iruiruo ri chekọ, re si edẹ rayen phihọ ọbe rẹ arhọ na.

⁴Ghọghọ vwẹ evun rẹ Ọrovwohwo kẹdẹ kẹdẹ; me rhoma ta, Ghọghọ.

⁵E jẹn Ihwo riẹn akoechiro rẹ ovwan. Ẹcha rẹ Ọrovwohwo te otọ re.

⁶Wa ro ẹnwan rẹ emuọvo-o, ẹkẹvuọvo vwi kemu kemu orẹ kugbe oyare kugbe ẹkpẹvwẹ ta ọdavwẹ wẹn kẹ Ọghẹnẹ.

⁷Ufuoma rẹ Ọghẹnẹ ro nẹ ẹruọ ejobi, kọ yọnrọn udu vẹ iroro rẹ ovwan vwi Kristi Jesu.

⁸Ọ rọ ka oba, imoni, emu ejobi rọ dia uyota, emu ejobi ro vwo ọghọ, emu ejobi rọ dia ọsoso, emu ro yovwiri, emu ejobi ro vwo ẹguọnọ, emu ejobi ro vwo erhuvwu, ọ da dianẹ o vwo uyoyovwi, ọ da dianẹ o vwo obo ro fo ejiro, gbe roro imu nana.

⁹Obo rẹ ovwan yonori rẹ ovwan reyọre rẹ ovwan nyori rẹ ovwan mrẹre vwẹ obọ mẹ, ruo; Ọghẹnẹ rẹ ufuoma kọ vẹ ovwan dia.

¹⁰Me ghọghọre vwẹ evun rẹ Ọrovwohwo gangan nẹ asakiephana ovwan rha rhe ro ẹnwan mẹ ovwan ghine ro ẹnwan mẹ ẹkẹvuọvo ovwan mrẹ obọ-ọ.

¹¹Ọ dianẹ mi vwiro brenu rẹ ọbẹnvwẹ-ẹ; kidie mi yonori, nẹ vwẹ idjerhe kidjerhe re me epha ejobi, evun ghwa vọn vwẹ.

¹²Me riẹn obo rọ kanre ohwo, me je riẹn obo rọ lọhọ kẹ ohwo; vwẹ idjerhe kidjerhe ejobi. Mi yono odjahọ rẹ obo re chirẹ owẹvwe, obo re vwo obuebu kugbe obo rọ kanre ohwo.

¹³Mi se ru emu ejobi vwi Kristi rọ kẹ vwẹ ogangan.

¹⁴Dede na yẹ ovwan ruru gangan rẹ ovwan vwọ karohọ ovwẹ vwẹ evun rẹ ukpokpogho mẹ.

¹⁵Ovwan ihwo ri Filipae na riẹnre nẹ ẹtuọhọ rẹ iyẹnrẹ na rhe, ri mi vwo nẹ Masidonia rhe, me vẹ ishọshi ọvuovo ta ota rẹ ekakẹ kugbe imiemie-e jokpa rẹ ovwan ọvo;

¹⁶Kidie me vwọ hẹ Tẹsalonaika we kru oghwa rhe vwe obọvo eyẹabọivẹ.

¹⁷Ọ dianẹ ke me guọnọ ọko-o; ẹkẹvuọvo obo re me guọnọre kẹ iruo esiri rẹ ovwan.

¹⁸A hwa osa gba kẹ vwẹ, a tobọ hwa kpahe; evun vọn vwẹ, ọko re wa phare kẹ Epafroditọs vwo rhe vwe te vwe obọ, ọko ro gbo ọnrhe ororo, iye ro miere ro je Ọghẹnẹ.

¹⁹Ọghẹnẹ mẹ kọ kẹ ovwan obo rẹ ovwan guọnọ kirobo rẹ efe rọye vwẹ urinrin ri Kristi Jesu epha.

²⁰Ọghẹnẹ rẹ avwanre kugbe Ọsẹ a vwẹ urinrin kẹ bẹdẹ bẹdẹ. Isẹ.

²¹Yere kohwo ọfuanfon kohwo ọfuanfon vwi Kristi Jesu. Imoni na re vẹ ovwẹ gba herọ yere ovwan.

²²Ihwo efuanfon na ejobi yere ovwan, marho kẹ evwruwevwi ri Siza.

²³Ẹserọphẹ rẹ Ọrovwohwo Jesu Kristi nene erhi rẹ ovwan dia.