Read urhobo Kolose 1 Bible Online

Kolose 1 - urhobo bible

Kolose 1

¹Pọl oyinkọn ri Jesu Kristi vwẹ ẹguọnọ rẹ Ọghẹnẹ, kugbe Timoti oniọvo rẹ avwanre,

²si rhe ihwo efuanfon ri se Kristi gbuyota vwẹ obi Kolose. Ẹserọphẹ kugbe ufuoma ro nẹ obọ rẹ Ọghẹnẹ Ọsẹ rẹ avwanre rhe nene ovwan dia.

³Avwanre kpẹvwẹ Ọghẹnẹ, Ọsẹ rẹ Ọrovwavwanre Jesu Kristi, avwanre ke rha je rẹ kẹ ovwan kẹdẹ kẹdẹ,

⁴rẹ avwanre vwo nyo obo rẹ ovwan se Jesu Kristi gbuyota te, kugbe ẹguọnọ rẹ ovwan vwori kẹ ihwo efuanfon ejobi,

⁵fiki re iphiẹrohọ re koko phihọ obo odjuvwu kẹ ovwan, ọye ota rẹ uyota rẹsosuọ rẹ ovwan ke nyo vwẹ evun rẹ iyẹnrẹ esiri na.

⁶Ota ro bru ovwan rhe na, obo rẹ ota na hrabọ ro akpọ na ejobi te, kirobo rọ je ghwa hrabọ te vwẹ uherevie rẹ ovwan na, nẹ ẹdẹ rẹsosuọ rẹ ovwan vwo nyo ota rẹ uyota rẹ ẹserọphẹ rẹ Ọghẹnẹ na.

⁷Ọtiobo rẹ Epafras odibo ọghaghare na yono ovwan. Omamọ rẹ ohwo kugbe ọyinkọn ri Kristi rẹ uyota vwọ kẹ avwanre;

⁸Ọye je hẹ ohwo ro gbe ikun rẹ eguọnọ rẹ ovwan vwori kpahe Erhi na kẹ avwanre.

⁹Vwẹ ọtiọye na, rhanwẹ ọke rẹ avwanre vwo nyo ikun nana unu rẹ avwanre rha ka vẹ ẹrhovwo ra nẹ kẹ ovwa-an, rere evun rẹ ovwan sa vwọ vọn vẹ erianriẹn rọye, vẹ iroro rẹ erhi na kugbe rere ovwan vwo vwo ẹruọ rẹ ota rọye.

¹⁰Rere eyere rẹ ovwan vwo se fo kẹ Ọrovwohwo, re uruemu rẹ ovwan ejobi vwo se je rere ovwan vwo ru iruo esiri phia kugbe rere erianriẹn rẹ Ọghẹnẹ rẹ ovwan vwo bu.

¹¹Ọtiobo rẹ ogangan rọye rho te na, kọ je kẹ ovwan ogangan vwi kemu kemu ejobi; re we vwo erhiori kugbe rere wa ghọghọ vwẹ evun rẹ oja.

¹²Wa mia vwẹ ekpẹvwẹ kẹ Ọsẹ na, ro ru avwanre fo ihwo re vẹ irherẹn rẹ Urhukpe na gbe koko reuku na.

¹³Ohwo ro si avwanre nẹ obọ rẹ ogangan rẹ ebri, o de wene avwanre vwo kpo akpọ rẹ uvie rẹ ẹguọnọ rẹ Ọmọ rọye.

¹⁴Oma rọye a wan tan avwanre hirhe, je vwẹ oma rọye avwanre wan vwo evwoghovwo rẹ imwemwu.

¹⁵Ọye hẹ uhoho rẹ Ọghẹnẹ re jẹ mrẹ na, ọmọ ọkpako rẹ emama na ejobi.

¹⁶Kidie oma rọye a wan ma kemu kemu ejobi, re hẹ obo odjuvwu kugbe re hẹ otọ rẹ akpọ na, emu ra mrẹ kugbe irejẹmrẹ owenẹ o dia obenu rẹ ekete rẹ ivie eyẹ ubrakpọ re suẹn, eyẹ ihwo ride eyẹ ogangan; obọ rọye a wa ma kemu kemu ejobi, ọye a je ma ayen kẹ.

¹⁷Ọ herọ tavwe ra ke rhe ma emu ejobi, ọye hẹ osunsun ro ku emu ejobi gbe.

¹⁸Ọye hẹ uyovwi rẹ oma na, kọye hẹ ishoshi na; ọye hẹ ẹtuọhọ, ọye hẹ ọmọ ọkpako ro ke vrẹn nẹ ughwu rhe, rere ekpuyovwi rọye ọvo vwọ dia ọ ro me kpenu vwẹ enu rẹ emu na ejobi.

¹⁹Kidie o de je Ọghẹnẹ nẹ ọvọnvọn rọye ejobi dia oma rọye da gba.

²⁰Oma rọye a wan rhuẹrẹ emu na ejobi phihọ kẹ oma rọye, ọbara rẹ obọ rọye vwẹ enu rẹ agbagba ọye ọ vwọ rhuẹrẹ emu na ejobi phihọ, te emu rọ hẹ enu rẹ akpọ na, te ọ rọ hẹ obevun rẹ odjuvwu.

²¹Ovwan rẹ erhorha kugbe ivwighrẹ rẹ iruo esiri jovwo na, ka je rhuẹrẹ ovwan kugbe.

²²Vwẹ ugboma fiki rẹ ughwu rọye, rere ọ vwọ sa vwẹ ovwan phia kẹ fuanfon, ro jẹ upe vẹ abe evwo vwẹ obaro rọye.

²³Ọ da dianẹ ovwan yọnrọn esegbuyota rẹ ovwan na gan, rẹ ovwan de mudia kokoroko, rẹ odju rhe dju ovwan she nẹ ota rẹ iyẹnrẹ esiri na rẹ ovwan nyori na re ghwoghwo kẹ akpọ na ejobi re na fiki rẹ oye a vwo reyọ Pọl mu ọyinkọn na.

²⁴Asakiephana me ghọghọ vwẹ evun rẹ oja mẹ fiki rẹ ovwan, ri mi vwo mu oghwa rẹ oja nana ri Kristi re chekọ na kpahe oma mẹ fiki rẹ ishoshi rọye.

²⁵Fiki rẹ ọye na a vwọ vwẹ ovwẹ mu ọyinkọn ro gbe odibo vwẹ evun rẹ ishọshi rọye, rere oghwa rẹ Ọghẹnẹ kru kẹ vwẹ na me sa vwọ ghwa.

²⁶Uyota nana kọye hẹ, igbunu re sinu rhahae na; ẹkẹvuọvo asakiephana ka rhe vwọ phia kẹ ihwo efuanfon rọye.

²⁷Ihwo re evun rẹ ayen vwerhe Ọghẹnẹ, rọ da vwẹ odjahọ nana phia kẹ ayen rere ayen ghwoghwo kẹ otu ri Keferi, kọye hẹ Kristi na iphiẹrohọ rẹ urinrin na.

²⁸Kọye avwanre ghwoghwo na, rere kohwo kohwo ejobi sa vwọ dia ohwo ri Kristi;

²⁹Fiki rẹ ọnana kọye me vwọ wian rhe, me vwọ pharha kẹ iruo na, kirobo rẹ oruru rẹ iruo na gan te vwẹ evun mẹ.