Read urhobo Kolose 3 Bible Online

Kolose 3 - urhobo bible

Kolose 3

¹Ọ da dianẹ ovwan vẹ Kristi gbe koko vrẹn ovwan gba guọnọ emu rọ hẹ obenu, asan ri Kristi epha, ro de tidia vwẹ obọrhe rẹ Ọghẹnẹ.

²We gbe ni emu rọ hẹ obenu, we ni emu re hẹ otọ rẹ akpọ na-a.

³Kidie ovwan ghwuru arhọ rẹ ovwan da hẹ obọ ri Kristi vwẹ evun rẹ Ọghẹnẹ.

⁴Ọke ra da cha vwẹ Kristi rẹ arhọ rẹ ovwan rheri na vwo phia, ovwan vẹ ọye ke phia kugbe vwẹ evun rẹ urinrin.

⁵Gbe hwe urhuru sivwe ofefe rẹ akpọ na re o ghwu; igberadja, inuhu, avwerhe rẹ ugboma, ẹguọnọ ọbrabra, urhuru evwo ro hirhe oma phihọ ẹdjọ.

⁶Fikiridie imu nana ophu rẹ Ọghẹnẹ rhe vwọ tua kpahe emọ ri jẹ ọghọ evwo na.

⁷Idjerhe rẹ imu nana ovwan ke nene jovwo, imu tiọnana kọye ovwan ruru.

⁸Ẹkẹvuọvo asakiephana ovwan gbe siobọ nẹ imu nana; ophu, ẹghwọ, eghrẹ, ota omiomiovwi, ogbegbeta ra ta nẹ unu cha.

⁹Wa vwọnrọn efian kẹ ohwohwo-o, kidie ovwan siobọ nẹ ohwo rẹ awanre na vẹ uruemu rọye ejobi nure.

¹⁰Ovwan ji ku ohwo ọkpokpọ na phihọ re, a da nabọ vwẹ erianriẹn vwọ ke rere ọ vwọ họhọ ohwo ro marọ.

¹¹Asan ro vwo ofẹnẹ-ẹ, o vwo Grik eyẹ Ju-u, oyanvwe eyẹ ijẹyanvwọ-ọ, Ivwevwe, Sintian, ọviẹn, ọmuvwiẹ, ẹkẹvuọvo Kristi hẹ emu ejobi, ọye ri vwo emu ejobi.

¹²Ovwan gba vwẹ uruemu esiri rhuo oma riariẹ kerẹ ikru rẹ Ọghẹnẹ re fonro re nabọ ghare, vẹ udu ọlọlọhọ rọ vọnre vẹ aruẹdon, oma evwo kpotọ, ufuefu kugbe odiri.

¹³Ohwohwo chirako kẹ ohwohwo, fobọ si ophu nẹ evun rere ohwohwo vwo ghovwo ohwohwo nẹ otọ rẹ evun rhe; kirobo rẹ Ọrovwohwo vwo ghovwo na, eriyin we ji vwo ghovwo rhe.

¹⁴Ọ rọ marho ejobi, ovwan gbe ku ẹguọnọ phihọ, kọye ufi ro churu ihwo kugbe.

¹⁵We gbe jẹ ufuoma ri Kristi vwọ kẹ udu rẹ ovwan na, fue oseghe, ẹghwọ kugbe ukpokpogho re hẹ udu rẹ ovwan ejobi, fiki rẹ ufuoma na e vwo se ovwan rhe vwọ dia oma ọvo rọye na. Ovwan gba kpẹvwẹ.

¹⁶We gbe jẹn ota ri Kristi dia evun rẹ ovwan, rọ kẹ ovwan aghwanre buebu, rere ovwan yono ohwohwo, rere ovwan bru ohwohwo uche, vwẹ akpata, vẹ une rẹ ejiro kugbe ine rẹ erhi, rere wa vwẹ udu rẹ ovwan so ine vwevwerhe kẹ Ọghẹnẹ.

¹⁷Kemu kemu rẹ ovwan ruẹ ejobi vwẹ ota eyẹ uruemu, we ru ayen vwẹ odẹ rẹ Ọrovwohwo Jesu, rere ovwan wan oma rọye vwẹ ẹkpẹvwẹ kẹ Ọghẹnẹ rẹ Ọsẹ na.

¹⁸Eya ri kpo orọvwe wa vwẹ oma kpotọ kẹ eshare rẹ ovwan, kirobo ro fori kẹ Ọrovwohwo.

¹⁹Eshare ri vwo eya ovwan guọnọ eya rẹ ovwan ovwan djẹ oma ku aye-en.

²⁰Ovwan emọ, we mu ọghọ kẹ esẹ vẹ ini rẹ ovwan, fikiridie ọtiọna ri je Ọrovwohwo.

²¹Ovwan esẹ, we ru emọ rẹ ovwan emu ọbrabra-a, ophu de rhe mu ayen.

²²Eviẹn na, we mu ọghọ kẹ inini rẹ ovwan vwi kemu kemu ejobi, ovwan nabọ ga ayen ọ dianẹ rẹ ihwo vwo jiri ovwa-an, ẹkẹvuọvo wa vwẹ evun ọvo ga ayen vwẹ oshọ rẹ Ọrovwohwo.

²³Kemu kemu we ruẹ ejobi wa vwẹ udu esiri ru ayen, kirobo ru we ruẹ kẹ Ọrovwohwo ọ dia ohwo rẹ akpọ we ru ayen kẹ-ẹ.

²⁴Ovwan riẹn nẹ obọ rẹ Ọrovwohwo ovwan da cha reyọ osa rẹ ovwan; Ọrovwohwo Kristi ọye ovwan gare.

²⁵Ohwo ro ru bra je cha reyọ osa rẹ obrabra rọye; ọ vwẹ ọghọ kẹ ohwo ọvo jẹ ọvo vwo-o.