Read urhobo 1 Tẹsalonaika 1 Bible Online

1 Tẹsalonaika 1 - urhobo bible

1 Tẹsalonaika 1

¹Ọnana ọbe ri Pọl, Silvanọs, kugbe Timoti si rhe ishọshi rẹ Ọghẹnẹ Ọsẹ na kugbe Ọrovwohwo Jesu Kristi rọ hẹ obi Tẹsalonaika; Ẹserọphẹ nene ovwan dia.

²Avwanre kpẹvwẹ Ọghẹnẹ kọke kọke vwọ kẹ ovwan ejobi, avwanre ji se odẹ rẹ ovwan vwẹ ẹrhovwo rẹ avwanre kọke kọke.

³Avwanre karohọ ovwan vwọ kẹ Ọghẹnẹ kugbe Ọsẹ na iruo rẹ eseghuyota rẹ ovwan kugbe owian rẹ ẹguọnọ kugbe emudia gan rẹ iphiẹrohọ rẹ ovwan vwẹ evun rẹ Ọrovwavwanre Jesu Kristi.

⁴Kidie avwanre riẹnre, imoni nẹ Ọghẹnẹ guọnọ ovwan, nẹ ọ je sanọ ovwan reyọ nure.

⁵Kidie iyẹnre esiri rẹ avwanre bru ovwan rhe vwẹ ọ rẹ ota ọvo-o, ẹkẹvuọvo vwẹ evun rẹ ogangan kugbe evun rẹ Erhi Ọfuanfon rọ nabọ dje ota na rọ vwọ ro ovwan. Ovwan je riẹn oghẹre rẹ ihwo rẹ avwanre phi oma rẹ avwanre phihọ fiki rẹ ovwan.

⁶Ovwan da rhe vwẹ ẹro kere avwanre kugbe Ọrovwohwo na, kidie evun rẹ ukpokpogho rode ovwan da reyọ ota na, vẹ aghọghọ rẹ Erhi Ọfuanfon na phihọ evun rẹ ovwan.

⁷Ọda nẹrhẹ ovwan dia oniru kẹ ayen ejobi ri segbuyota vwi Masidonia kugbe Akaya.

⁸Kidie ọ dianẹ usi rẹ ota rẹ Ọrovwohwo na ọvo ri kperi nẹ obọ rẹ ovwan rhe vwi Masidonia kugbe Akaya-a, ẹkẹvuọvo esegbuyota rẹ ovwan kpahe Ọghẹnẹ ji kperi usi ro kasan kasan, ọtiọye na o gbi vwo emu ọvuọvo rẹ avwanre ta-a.

⁹Kidie ekpuyovwi rẹ ayen nẹ iyẹnrẹ kẹ avwanre oghẹre rẹ edede rẹ avwanre vwori vwẹ ohri rẹ ovwan, kugbe obo rẹ ovwan siobọ nẹ ẹdjọ bru Ọghẹnẹ rhe, rhe ga Ọghẹnẹ rẹ uyota ro jeghwo,

¹⁰rere a hẹrhẹ Ọmọ rọye ro che nẹ odjuvwu rhe, rọ kpare nẹ ughwu rhe, Jesu ro sivwi avwanre nẹ ophu rọ cha.