Read urhobo 1 Tẹsalonaika 3 Bible Online

1 Tẹsalonaika 3 - urhobo bible

1 Tẹsalonaika 3

¹Ọke ro rhe jẹ avwanre chiri-i, avwanre ke dẹ oma ji vwẹ obo Atẹn,

²avwanre ki ji Timoti, oniọvo rẹ avwanre kugbe odibo rẹ Ọghẹnẹ vwẹ iyẹnre esiri ri Kristi, nẹ o rhi ru esegbuyota rẹ ovwan gan ro rhe bru ovwan uche.

³Avwanre ru ọnana rere udu vwo jẹ ovwan ekpokpo fiki rẹ ukpokpogho nana. Ekpuyovwi rẹ ovwan riẹnre nẹ ọnana re cha dia ẹkẹn ute rẹ avwanre.

⁴Ọke rẹ avwanre vẹ ovwan vwọ herọ, avwanre ta kẹ ovwan jovwo nẹ avwanre cha reoja rẹ ukpokpogho nana; rọ rhe vwọ phia na, ẹro rẹ ovwan ghwe te.

⁵Fiki rẹ ọnana na, ọke ri mi gbi se chiro-o, kọye mi vwo ji ikọn rhe vwọ mrẹ obo rẹ esegbuyota rẹ ovwan epha, vẹ oshọ nẹ ọkeọvo ukọn na vwo jẹ ovwan ẹdavwọ rere owian rẹ avwanre vwo jẹ ghwọrọ kuẹfia.

⁶Ẹkẹvuọvo asakiephana ri Timoti vwo rhivwi nẹ oboyi bru avwanre rhe, rọ rhe vwọ nẹ iyẹnrẹ rẹ esegbuyota kugbe ẹguọnọ rẹ ovwan vwori kugbe obo ro rhe gbe ikun rẹ obo rẹ ovwan karohọ avwanre te rẹ urhuru rẹ avwanre siẹ ayen te kirobo rẹ urhuru rẹ ovwan ji siẹ avwanre —

⁷fiki rẹ ọnana, imoni, rẹ avwanre vwo nyo ikun esiri rẹ ovwan vwẹ evun rẹ uvwerhe vẹ ukpokpogho rẹ avwanre epha na evun da ghwa vọn avwanre vwẹ ẹkuoma rẹ esegbuyota rẹ ovwan.

⁸Kidie asakiephana avwanre gbi ghwu ọfa-a, rẹ avwanre vwo nyo obo rẹ ovwan mudia gan vwẹ evun rẹ Ọrovwohwo.

⁹Ki didi ẹkpẹvwẹ ri rhe fo ra vwọ kẹ Ọghẹnẹ fikẹ rẹ ovwan, nọ aghọghọ nana ejobi rẹ avwanre vwori vwẹ oma rẹ ovwan vwẹ obaro rẹ Ọghẹnẹ rẹ avwanre?

¹⁰Te ason te uvo avwanre vwọ rẹ kẹ ovwan rere avwanre vwọ sa mrẹ opharo rẹ ovwan rere asa rọ chọre vwẹ esegbuyota rẹ ovwan avwanre rhuẹrẹ phihọ?

¹¹Asakiephana e gbe jẹ Ọghẹnẹ rẹ avwanre kugbe ekpuyovwi rẹ Ọsẹ na, kugbe Ọrovwavwanre Jesu, sun avwanre vwẹ idjerhe bru ovwan rhe.

¹²E gbe jẹn Ọrovwohwo ru ẹguọnọ rẹ ovwan kẹ ohwohwo kugbe ihwo efa, kirobo rẹ avawnre vwo kẹ ovwan na,

¹³kọye ovwan vwọ dia fuanfon vwẹ obaro rẹ Ọsẹ na, rere udu rẹ ovwan vwọ ghwaotọ re wa vwọ rease vwẹ ẹdẹ rẹ ẹcha rẹ Ọrovwavwanre Jesu vẹ emakashe rọye.