Read urhobo 1 Tẹsalonaika 4 Bible Online

1 Tẹsalonaika 4 - urhobo bible

1 Tẹsalonaika 4

¹Ọ ra ka oba, imoni avwanre rẹ ovwan bru ovwan uche vwẹ evun rẹ Ọrovwohwo Jesu, nẹ kirobo rẹ ovwan yono miẹ avwanre vwọ kpahe obo rẹ ovwan yeri re we vwo se ru obo ri je Ọghẹnẹ, kirobo rẹ ovwan ruẹ na, we gbe ru ọtiọye phihọ.

²Kidie ovwan riẹn uyono rẹ avwanre wan oma rẹ Ọrovwohwo Jesu vwọ kẹ ovwan.

³Kidie ọnana hẹ ọhọre rẹ Ọghẹnẹ, kọye hẹ orufuọn rẹ ovwan; nẹ we siobọ nẹ igberadja;

⁴rere ohwo ọvuọvo vwọ riẹn obo ra rọvwọ aye ọvo vwẹ ẹfuọn kugbe ọghọ.

⁵Ọ dia ọ rẹ urhuru sivwe rẹ ugboma kerẹ ihwo ri Keferi re riẹn Ọghẹnẹ-ẹ.

⁶E jẹn ohwo ọvuọvo chọ urhi-i, e jo gbe oniọvo rọye kuẹ vwẹ ota nana-a, fikiridie Ọrovwohwo hẹ ọreihri rẹ imu nana ejobi, kirobo rẹ avwanre kpa okpa phihọ ovwan obọ na.

⁷Kidie Ọghẹnẹ se avwanre rhe iruo rẹ inuhu-u, ẹkẹvuọvo vwẹ evun rẹ ẹfuọn.

⁸Vwẹ ọtiọye na ohwo ro se uyono nana gbe emu-u, ọ dia ohwo rẹ akpọ ọ jefia-a ẹkẹvuọvo Ọghẹnẹ, rọ vwẹ Erhi Ọfuanfon rọye na kẹ ovwan.

⁹Ẹkẹvuọvo vwọ kpahe ẹguọnọ rẹ imoni na o rhe fo rere ohwo ọvo vwo si rhe ovwa-an, kidie Ọghẹnẹ yono ekpuyovwi rẹ ovwan nẹ ohwohwo guọnọ ohwohwo.

¹⁰Uyota ovwan ghine guọnọ imoni na ejobi re hẹ Masidonia. Ẹkẹvuọvo avwanre bru ovwan uche, imoni, rere ovwan ru nọ ọtiọye.

¹¹Ovwan pharhe re we ru dẹndẹn, we nenesi rẹ iruo rẹ obọ rẹ ovwan, wa vwẹ abọ rẹ ovwan wian owian, kirobo rẹ avwanre yono ovwan.

¹²Rere ihwo rẹ obo ada vwo mu ọghọ kẹ ovwan, ovwan vwẹ ẹro so ohwo-o.

¹³Imoni mẹ, avwanre rha guọnọ nẹ ovwan dia ogbori, kpahe ayen otu re vwerhẹ na-a, rere ovwan vwo jẹ ayen evwerhe kerẹ ayen otu ri jẹ iphiẹrohọ evwo.

¹⁴Kidie avwanre de segbuyota nẹ Jesu ghwuru rọ da rhoma vrẹn nẹ ughwu, ọtiọye rhe ihwo ejobi ri vi Jesu gba vwerhe na, Ọghẹnẹ kọ kpare ayen re vwerhẹ na vẹ ọye vrẹn.

¹⁵Kidie ọnana ota ro nẹ unu rẹ Ọrovwohwo rhe avwanre ghwoghwo kẹ ovwan na, nẹ avwanre otu re herọ na, ri ghwu chekọ akpọ na rhi te ẹdẹ rẹ Ọrovwohwo cha vwọ rhe na, cha sa ka obaro kẹ ayen otu re vwerhẹ na-a.

¹⁶Kidie ekpuyovwi rẹ Ọrovwohwo dẹn che wotọ nẹ odjuvwu rhe vẹ edo, kugbe urhuru rẹ onotu rẹ emakashe, kugbe edo rẹ ọgban rẹ Ọghẹnẹ. Irivwi ri ghwuru vwẹ evun ri Kristi ki ke vrẹn.

¹⁷Kẹsiẹye o ki rhi te re hẹ ekpokpo, ri ghwu chekọ, ka ghwẹ avwanre rhi koko kugbe ayen otu re hẹ obenu na, ke ku usun họ ra vwa Ọrovwohwo na vwẹ obo irharheghe, kẹ oboyi avwanre vẹ Ọrovwohwo da dia bẹdẹ.

¹⁸Fiki rẹ ọtiọye na ovwan gba vwẹ eta nana bru ohwohwo uche.