Read urhobo Joshua 1 Bible Online

Joshua 1 - urhobo bible

Joshua 1

¹Ọke ri Mosis odibo rẹ Ọrovwohwo vwo ghwu nu, Ọrovwohwo da ta kẹ Joshua ọmọ ri Nọn, otota ri Mosis nẹ,

²Mosis rẹ odibo mẹ o ghwu nure, asakiephana gbe vrẹn, ru wọ wan Jọdan nana vrẹn, wẹ vẹ ihwo nana ejobi, vwo kpo otọ re me cha vwọ kẹ ayen, kọye ihwo rẹ Izrẹl.

³Kasan kasan rẹ ẹhẹrhowọ wẹn chiri kẹ me vwọ kẹ wẹ, kirobo mi veri kẹ Mosis.

⁴Nẹ aton nana kugbe Lẹbanọn nana rhiri re te urhie rode na, urhie ri Yufretis, otọ rẹ ihwo ri Hẹt ejobi re te Abadi Rode na rhiri re te asan rẹ ọnre de she kpotọ kọ dia ubrotọ wẹn.

⁵O vwo ohwo ọvuọvo ro che yivwi hirhe opharo ku we vwẹ ẹdẹ rẹ akpọ wẹn ejobi-i; kirobo mi vi Mosis diarọ, ọtiọye me vẹ owẹ je cha dia; me cha phiẹn wẹ-ẹn eyẹ me cha sẹn wẹ-ẹn.

⁶Gba goma rere wo yivwaro, kidie wẹ re cha nẹrhẹ ihwo nana riuku rẹ otọ ri mi duvwu iyori kẹ esẹ rẹ ovwan nẹ me vwọ kẹ ayen na.

⁷Wọ me goma rere wo yivwaro gangan, vwẹ ẹro te otọ dẹndẹn vwọ yọnrọn irhi na ejobi ri mi ji kẹ Mosis odibo mẹ nẹ ọ vwọ kẹ ovwan, wo kuoma rhẹriẹ kpo obọrhe eyẹ obọhwere-e, rere o vwo yovwi kẹ wẹ vwi kasan kasan re wọ cha ra.

⁸Ọbe nana rẹ urhi na che nẹ uwe unu-u, ẹkẹvuọvo wọ vẹ ọye se umẹ te asọn te uvo, rere wọ vwẹ oma kpotọ ru obo re si phihọ ejobi; kọ nẹrhẹ idjerhe wẹn yovwi, ko ji yovwi kẹ wẹ.

⁹Ọ dia omẹvwẹ ri ji urhi na kẹ wẹ-ẹ? Goma wo yivwaro gangan, wọ phariẹ-ẹ, wo jẹ ofu dje we-e, kidie Ọrovwohwo Ọghẹnẹ wẹn vẹ owẹ herọ vwi kasan kasan wọ ra ejobi.

¹⁰Etiyin Joshua de ji urhi kẹ inotu rẹ ihwo na,

¹¹Wan erhọn na vrẹn, re wo ji urhi kẹ ihwo na nẹ, Choma rẹ emuọre kpahe, kerẹ emu rẹ ẹdẹ erha ki nonẹ yanran ku wa cha wan Jọdan nana vrẹn, ra reyọ ughwẹ rẹ otọ na rẹ Ọrovwohwo Ọghẹnẹ wẹn vwọ kẹ wẹ na.

¹²Vwọ kẹ orua ri Rubẹn, orua ri Gad, kugbe ubro rẹ orua ri Manasse eye Joshua ta kẹ nẹ,

¹³Karophihọ ota ri Mosis odibo rẹ Ọrovwohwo ta kẹ owẹ, tanẹ, Ọrovwohwo Ọghẹnẹ na cha kẹ wẹ asan rẹ omaerovwo, kọ je kẹ wẹ otọ nana.

¹⁴Eya wẹn, imitete wẹn, kugbe uchuru wẹn ke cha daji otọ na ri Mosis kẹ ovwan vwẹ abọ oboyi ri Jọdan; ẹkẹvuọvo eshare ri yivwaro ejobi kẹ choma rẹ ofovwi re karo kẹ imoni rẹ ovwan re cha ayen uko,

¹⁵bẹsiẹ rẹ Ọrovwohwo vwọ vwẹ omaerovwo kẹ imoni wẹn kugbe ovwan, ayen ejobi ke ra reyọ ughwẹ rẹ otọ na rẹ Ọrovwohwo Ọghẹnẹ vwọ kẹ ayen na; kẹsiẹye ovwan ki rhivwi kpo otọ rẹ ughwẹ rẹ ovwan, ku we vwo, otọ na ri Mosis odibo rẹ Ọrovwohwo na vwọ kẹ ovwan vwẹ abọ oboyi ri Jọdan vwẹ abọ rẹ ọnre da vacha.

¹⁶Ayen da kpahe kẹ Joshua, Obo wọ ta kẹ avwanre ejobi ọye avwanre ru, kasan kasan wo ji avwanre ra ọye avwanre ra.

¹⁷Kirobo re avwanre mu ọghọ kẹ Mosis vwi kemu kemu na, ọtiọye avwanre ji mu ọghọ kẹ wẹ, takpe e jẹ Ọrovwohwo Ọghẹnẹ wẹn nene uwe dia, kirobo rọ vi Mosis diarọ.

¹⁸Kohwo kohwo ro gbe kpahe urhi wẹn na ro rhe mu ọghọ kẹ ota wẹ-ẹn, kurhi kurhi ri wo ji kẹ, ka teyọ hwe. Takpe goma re wo yivwaro ọvo.