Read urhobo Joshua 18 Bible Online

Joshua 18 - urhobo bible

Joshua 18

¹Etiyin ukoko rẹ ihwo rẹ Izrẹl ejobi da rhe ghwẹ koko vwi Shiloh, ayen da gba utughẹ ra da vwa oma phihọ etiyin; yẹ ayen phi otọ na ejobi kua nure.

²Yẹ orua ighwrẹn rẹ ihwo rẹ lzrẹl ji chekọ ra je ghare uku raye-en.

³Etiyin Joshua da ta ke ihwọ re Izrẹl, mavọ ovwan mudia krite wa ke ra reyọ otọ na, rẹ Ọrovwohwo, Ọghẹnẹ rẹ esẹ rẹ ovwan na, vwọ kẹ ovwan?

⁴We phi ihwo erherha phihọ otọ vwẹ orua ọvuọvo, rere mi ji ayen re ki otọ na, re ayen dje obo rẹ otọ na epha rere uku na vwo ja ghare kẹ ayen, tavwe rẹ ayen ki bru vwe rhe.

⁵Ayen gharẹ akueghwrẹ, Juda kọ je dia ubrotọ ro obọrhe ọnre na, uwevwi ri Josẹf kọ je dia otọ rọye rọ obọhwẹre ọnre na.

⁶Ku wo dje otọ na wọ gharọ ẹkẹn ighwrẹn rere wọ vwẹ obo wo djere te vwo rhe vwe vwẹ etinẹ, ki mi che duvwu itẹ kẹ ovwan vwẹ obaro rẹ Ọrovwohwo Ọghẹnẹ rẹ avwanre.

⁷Ihwo ri Livae vwo ẹkẹn vwẹ ohri rẹ ovwa-an, kidie ughwẹ rẹ orherẹn rẹ Ọrovwohwo na ọye ẹkẹn uku rayen, te Gad te Ruben kugbe ubrọ rẹ orua ri Manasse reyọ ẹkẹn uku rayen nure vwẹ obo ovrẹn ri Jọdan vwẹ obaro ọnre, ri Mosis odibo rẹ Ọrovwohwo vwọ kẹ ayen.

⁸Etiyin ihwo na da yanran; Joshua de ji urhi kẹ ihwo ri re dje idjedje rẹ otọ na tanẹ, We kio rhe kio kpo ru we si obo rẹ otọ na epha, re we bru vwe rhe, ki mi duvwu itẹ kẹ ovwan vwi Shiloh vwẹ obaro rẹ Ọrovwohwo.

⁹Etiyin ihwo na da yanran re kio otọ na rhe kio kpo ayen de sio phihọ ọbe vwẹ orhorho ẹkẹn ighwrẹn, etiyin ayen de bru Joshua rhe vwẹ obo erhọn na vwi Shiloh.

¹⁰Joshua de duvwu itẹ kẹ ayen vwi Shiloh vwẹ obaro rẹ Ọrovwohwo; etiyin Joshua da ghare otọ na ẹkẹnkẹn kẹ ihwo rẹ Izrẹl, dohwo dẹkẹn rọye.

¹¹Ute rẹ orua ri Benjamin kirobo rẹ ekru rọye epha, ubrotọ ro tere da hẹ uvwre rẹ orua ri Juda vẹ orua ri Josẹf.

¹²Vwẹ abọ rẹ obọhwere ọnre ughwru rayen de mu phihọ nẹ Jọdan rhe, ughwru na de mu re te asan eghwabọ vwẹ obọhwẹre ọnre vwi Jeriko, o de rhe mu kpenu ra wan orho rẹ ugbenu na vwẹ obọrhe ọnre, o de rhi vwo oba vwẹ asan aghwa ri Betaven.

¹³Nẹ etiyin rhe ughwru na da rhe wanvrẹn obuko ọnre ro hirhe aro ku Luz, re te eghwabọ ri Luz (re se Bẹtẹl), ughwru na da wan oba rẹ otọ na re te Atarotadda, vwẹ enu rẹ ugbenu ro mu vwẹ obọrhe ọnre vwi Bẹthọrọn vwẹ obotọ.

¹⁴Ughwru na da rha jẹn oghọn kpo abọ ọfa, o de hirhe aro ku obuko ọnre vwẹ obọhwẹre rẹ ugbenu na rọ ghwẹ oma kpo obọrhe ọnre, vwẹ obaro ri Bẹthọrọn, o de vwo oba vwi Kiriatbaal (kọye, Kiriatjearim), orere rẹ orua ri Juda. Ọnana kẹ obuko ọnre ọ epha.

¹⁵Abọ rẹ obọrhe ọnre na de mu phihọ vwẹ ughere ri Kiriatjearim; ughwru na de ne etiyin yanran re te Efrọn, re te ogbugbu rẹ ame ri Neftoah;

¹⁶etiyin ughwru na de rhe mu rheotọ vwẹ oma rẹ ugbenu na ro hirhe aro ku iyara re emọ ri Hinnọm, rọ obo oba vwẹ obọhwẹre ọnre vwẹ iyara ri Refaim; o da rha yanran rhi te iyara ri Hinnọm, vwẹ obọrhe ọnre vwẹ eghwabọ rẹ ihwo ri Jẹbu, rha ghwrọrọ rheotọ rhi te Enrogẹl;

¹⁷etiyin o de rhe gunu ro obọhwẹre ọnre rhiri re te Enshemesh, ọ de rhe nẹ etiyin re te Gelilọt, ro hirhe aro ku asan eyere kpenu rẹ Adummim, o de rhe nẹ etiyin re te oragha ri Bohan rẹ ọmọ ri Rubẹn;

¹⁸ọ rha wan nẹ etiyin kpo obọhwẹre ọnre vwẹ asan eghwabọ ri Betaraba ọ da yanran re te obo Araba;

¹⁹etiyin ughwru na da rha wan re te obọhwẹre ọnre vwẹ asan eghwabọ ri Betọglah; ughwru na de rhe vwo oba vwẹ obohwẹre ọnre vwẹ obenu rẹ avware rẹ Abadi rẹ Ughweraka na, vwẹ obo oba rẹ obọrhe ọnre vwi Jọdan, ọnana kọye ughwru rọ obọrhe ọnre.

²⁰Jọdan kọye rha ughwru rọ obaro ọnre. Ọnana kọye ẹkẹn uku re orua ri Benjamin kirobo rẹ ekru rọye epha, ughwru ra rhuọn ki riarie.

²¹Asakiephana irere rẹ orua ri Benjamin vwẹ ekrekru rayen da dia Jeriko, Bẹtoglah, Emekeziz,

²²Betarabah, Zemaraim, Bẹtẹl,

²³Avvim, Para, Ofra,

²⁴Kefarammoni, Ofni, Geba irere ihwivẹ vẹ eko rayen:

²⁵Gibeọn, Ramah, Beerot,

²⁶Mizpeh, Kefira, Moza.

²⁷Rekem, Irpeel, Tarala,

²⁸Zela, Haelef, Jebu (kọye, Jerusalẹm), Gibeah kugbe Kiriatjearim irere ihwẹne vẹ eko rayen. Ọnana kọye ẹkẹn uku rẹ orua ri Benjamin kirobo rẹ ekru rayen epha.