Read urhobo Joshua 2 Bible Online

Joshua 2 - urhobo bible

Joshua 2

¹Etiyin Joshua rẹ ọmọ ri Nọn da bẹbẹ ji ihwo nẹ otọ ri Shitim nẹ i re dọrhẹ, tanẹ, Yanran, re ni otọ na, marho ki Jeriko. Ayen da yanran, ayen de rhi te uwevwi rẹ igberadja ọvo re se odẹ rọye Rehab, ayen de won phihọ etiyin

²A da rhe vuẹ ovie ri Jeriko, Kighere, ihwo rẹ Izrẹl evo rhe etinẹ vwẹ ason na rhe guọnọ otọ rẹ otọ na.

³Etiyin ovie ri Jeriko de ji ikọn re se Rehab, tanẹ, Reyọ ihwo ri rhi wọn uwevwi wẹ na rhe vwe; kidie ayen rhe guọnọ otọ rẹ otọ na.

⁴Ẹkẹvuọvo aye na da reyọ ihwo ivẹ na o de si ayen nu; ọ da ta, Uyota, ihwo evo bru vwe rhe, ẹkẹvuọvo me riẹn asan rẹ ayen nurhe-e;

⁵ra cha vwọ kare ẹchẹ, vwẹ ason na, ihwo na da ro otafe; asan rẹ ihwo na rare me riẹnre-e, vwọ tua ayen kpata kpata, kidie wọ cha djẹ mu ayen.

⁶Ẹkẹvuọvo ọ da reyọ ayen kpo obo okpo, o de re si ayen nu vwẹ ohri rẹ rẹ igbẹn rọ ghwẹ phihọ obenu rẹ okpo na.

⁷Etiyin ihwo na da vwọ tua ayen nene idjerhe ro kpo obo Jọdan re te ushuame na, rẹ ihwo re vwọ tua ayen na vwo yanran nu, a da karẹ ẹchẹ na.

⁸Tavwe rẹ ayen ki rhi shevwerhẹ, o de yeri okpo na bru ayen ra,

⁹ọ da ta kẹ ihwo na, Me riẹnre nẹ Ọrovwohwo na phi otọ na phihọ ovwan obọ nure, nẹ oshọ ro ovwan ko di muẹ avwanre kpakpa, ihwo rẹ orere na wranre kakare.

¹⁰Kidie avwanre nyo obo rẹ Ọrovwohwo nẹrhẹ Abadi Ọvwavware na kpọ yamu rẹ ovwan vwo nẹ Ijipt cha, kugbe obo wo ru kẹ ivie ivẹ rẹ ihwo rẹ Amọr re hẹ ovrẹn ri Jọdan, kẹ Sihọn kugbe Ọg, ru wọ guọghọre tototo.

¹¹Rẹ avwanre ghwe vwo nyo, udu rẹ avwanre da wran, udu de nẹ avwanre awọ, fiki wẹn, kidie Ọrovwohwo Ọghẹnẹ wẹn ọye Ọghẹnẹ rọ hẹ obenu rẹ odjuvwu kugbe obotọ rẹ akpọ na.

¹²Asakiephana, gbe duvwu iyori kẹ vwẹ, Vwẹ odẹ rẹ Ọrovwohwo nẹ kirobo me nabọ serọ rẹ ovwan na, ku wa je nabọ sẹro rẹ uwevwi rẹ ọsẹ mẹ, re wa kẹ vwẹ oka ro muẹro.

¹³Wo ji sivwi ọsẹ mẹ vẹ ọni mẹ, iniọvo mẹ re eshare vẹ e rẹ emetẹ, kugbe obo rẹ ayen vwori ejobi, rere wo si avwanre nẹ ughwu.

¹⁴Eshare na da ta kẹ, Arho rẹ avwanre me vwo wene kẹ ovwan! Wo rha vwẹ umẹ nana gbẹ iku-un, avwanre ke nabọ sẹro wẹn dẹndẹn. Vwẹ ọke rẹ Ọrovwohwo da vwẹ otọ na kẹ avwanre.

¹⁵Etiyin ọ da vwẹ ufi lọrọ ayen wan evakpo na, kidie a bọn uwevwi rọye tamu igbẹhẹ rẹ orere na, kẹ etiyin ọ dia.

¹⁶Aye na da ta kẹ ayen, Yanran kpo obo igbenu na, ihwo re vwọ tua ovwan na da rha mrẹ ovwan, we sioma rẹ ovwan nu ẹdẹ erha vwẹ oboyi, bẹsiẹ rẹ ihwo re vwọ tua ovwan vwo rhivwi kpo; tavwe re ovwan ke ro idjerhe kpo.

¹⁷Eshare na da ta kẹ, Iyori nana wọ vwẹ avwanre duvwu na che mu avwanre-e.

¹⁸Nighere, ọke rẹ avwanre da rhe otọ na, ku wo churu ufi rẹ isene na mu evakpo ru wo da lọrọ avwanre rhe otọ na, ku wọ reyọ ọsẹ wẹn vẹ oni wẹn rhe uwevwi wẹn, iniọvo wẹn rẹ eshare ejobi, kugbe evwruwevwi rẹ ọsẹ wẹn ejobi.

¹⁹Ọ da dianẹ ohwo ọvo wan anurhoro na ro evun rẹ urhuvwu, ọbara rọye kọ dia uyovwi rọye, ye avwanre gbe re abe-e; ẹkẹvuọvo obọ de te ohwo rọ vẹ ovwan gba hẹ evun rẹ uwevwi na, ọbara rọye kọ dia uyovwi rẹ avwanre.

²⁰Ẹkẹvuọvo wọ da vẹn ume nana rẹ avwanre vẹ owẹ rere na, yẹ iyori nana rẹ avwanre vẹ owẹ duvwuru na gbi mu avwanre-e.

²¹Aye na da ta, Kirobo rẹ eta rẹ ovwan epha na gbe jọ dia ọtiọye. Etiyin o de siobọ nẹ ayen kpọo, ayen da yanran, o de churu ufi rẹ isene na mu evakpo na.

²²Ayen da yanran, kpo obo igbenu na, ayen da dia etiyin ẹdẹ erha, bẹsiẹ rẹ ihwo re vwọ tua ayen na vwo rhivwi, kidie ayen guọnọ ayen nene idjerhe na ejobi yẹ a mrẹ aye-en.

²³Etiyin eshare ivẹ na de wotọ nẹ enu rẹ igbenu na rhe, ayen da wanvrẹn rhi te asan ri Joshua rẹ ọmọ ri Nọn epha; ayen de gbe ikun rẹ obo re phia kẹ ayen ejobi kẹ

²⁴Ayen da ta kẹ Joshua, Uyota Ọrovwohwo phi otọ na ejobi phihọ obọ rẹ avwanre nure; ọ rọ marho udu re bru ihwo na gangan fiki rẹ avwanre.