Read urhobo Joshua 20 Bible Online

Joshua 20 - urhobo bible

Joshua 20

¹Etiyin Ọrovwohwo da ta kẹ Joshua nẹ,

²Ta kẹ ihwo rẹ Izrẹl, Wa bọn irere rẹ adjẹrhọ, re me wan unu ri Mosis ta kẹ ovwan na,

³rere ohwo rẹ obọ chọre hwe ohwo vwọ djẹ kpo etiyin, irere na ke dia asan rẹ adjẹrhọ kẹ ohwo rẹ ọ reihri rẹ ọbara.

⁴Kọ djẹ kpo ọvo vwẹ irere na ko mudia ughere rẹ orere na, ko gu ẹkunu rọye kẹ ekpako rẹ orere yena; ayen ke reyọ ro evun rẹ orere na, ka vwẹ asan kẹ dia, ọ vẹ ayen ke dia.

⁵Ohwo rọ ọreihri rẹ ọbara na da vwọ tua rhe, ayen siobọ nẹ ohwo rẹ obọ chọre na kẹ-ẹ; fikiridie obọ chọrọ hwe ọrivẹ rọye na, ọ vẹ ọye ghwọre jovwo-o.

⁶Kọ dia evun rẹ orere na bẹsiẹ ro che vwo mudia vwẹ obaro rẹ ukoko na vwẹ ẹdjọ, bẹsiẹ rẹ orherẹn rode rọ herọ vwẹ ọke yena vwo ghwu; kẹsiẹye ohwo rẹ obọ chọre na ki rhivwi kpo orho rọye vẹ uwevwi rọye, rọ dje nurhe.

⁷Etiyin ayen de phi Kedẹsh vwi Galili vwẹ obo orho rẹ ugbenu ri Naftali phihọ ovwanrhe, kugbe Shikẹm vwẹ obo orho rẹ ugbenu vwẹ Ifrem, kugbe Kiriatarba kọye Hebrọn vwẹ obo orho rẹ ugbenu ri Juda.

⁸Vwẹ obo ovren ri Jọdan vwẹ obaro ọnre vwi Jeriko, ayen de phi Bezer rọ obo aghwa vwẹ uphephe na phihọ ovwanrhe, vwẹ orua ri Rubẹn, ayen de rhe phi Ramọt vwi Gilead phihọ otọ, vwẹ orua ri Gad, ayen de rhe phi Golan vwi Bashan phihọ otọ, vwẹ orua ri Manasse.

⁹Enana keye irere re phihọ otọ kẹ ihwo rẹ Izrẹl, kugbe erhorha re dia ohri rẹ ayen, rere kohwo kohwo rẹ obọ chọre hwe ohwo vwọ dje kpo etiyin, rere ohwo rọ ọreihri rẹ ọbara na vwo je hwe, bẹsiẹ ro vwo mudia vwẹ obaro rẹ ukoko.